小慈派 N1 下學期成績表

今日要去小慈學校見老師, 因為小慈派下學期成績表!  老師真係好有心機, 本發展報告寫得好詳盡, 仲要好精美!  老師們有愛心, 觀察力又好, 好細微既野都注意得到, 真係好勁!  老師話小慈最鍾意玩學習角, 每逢牆上面有新既教材教具, 小慈一定知道, 仲會放棄玩玩具而走去玩學習角, 就等於一個學生選擇唔去玩而去做左功課先一樣!  真係乖到不得了!  老師做教材教具係好辛苦既, 小慈竟然識欣賞, 所以你話老師唔錫小慈就奇啦!

小慈既體能唔錯, 所有 3 歲要做到既野佢都做到晒, 例如: 雙腳跳, 單腳跳, 拋波接波踢波完全冇問題, 駕玩具車時都會好小心避開雪糕筒唔會撞車

小慈自理能力非常好, 著衫除鞋上廁所都冇問題, 飲水食飯食生果唔會整污漕 (不過老師都話佢真係食得好慢), 又會依足指示跟顏色放回碗碟, 仲會小心翼翼斯文非常咁抹嘴!  老師話佢通常抹一次唔夠, 要來來回回抹好多次, 真係抹到好乾淨, 對自己好有要求架 XD

老師話小慈畫畫好有計劃, 諗好晒幅畫點樣畫先會動手!  慢慢塗漿糊, 撕紙, 一行一行好有心機咁做, 所以佢既圖工全部都好乾淨整齊

係老師眼中, 小慈係一個完美既好學生!  我地真係又自豪又驚訝!

老師講左好多次小慈係叻女!  好喜歡學習, 好投入, 好聰明, 表達力又好, 喜歡將自己既經驗同身邊既人分享, 課堂表現非常出眾, 因為小慈有好既反應, 老師好多時都會搵小慈幫手做示範, 仲試過俾任務小慈, 例如去 K1 課室搵葉老師攞圖書架, 小慈都會不負所托咁完成任務!  老師話唔係個個小朋友都做到架, 小慈係叻女黎既!  

老師又讚小慈係一個既細心又敏感的好孩子, 好多時老師只係講過 1 次既野, 小慈就會好上心, 會做齊, 仲會帶領其他小朋友一齊做!  有一次老師責備其他小朋友一窩風走去擺番 D 圖書, 因為爭先恐後冇排隊, 於是老師收起所有圖書冇出聲坐埋一邊, 當時全班靜晒, 跟住老師先開口責備, 但小慈以為老師話佢, 於是老師一路講小慈一路喊!  之後, 老師要同小慈做個別輔導, 因為老師知道小慈好乖, 其實佢冇份爭既, 但其他小朋友曳老師就要一齊話!  小慈真係好敏感, 要 handle with care 既呢!  不過老師話小慈既情緒已經好左好多, 當初最恐怖應該係弟弟岩岩出世, 小慈係可以無端端將全枱既玩具全部掃跌晒, 連其他小朋友玩緊既都掃跌埋, 脾氣之大真係嚇親街坊 @.@  但而家既佢已經好大進步, 好多時都能夠講出自己咩事唔開心, 會忍住唔喊, 安慰完佢解釋過後都會好快冇事!  

小慈確實係一個善良受教, 和順聽話又好記性既小朋友!  老師尤其安慰小慈好愛錫弟弟, 每次弟弟黎接佢放學佢都表現出好開心, 會做好多野講好多野去引弟弟笑, 又好樂意同老師分享佢既生活點滴, 真係一個好乖既小朋友!

小慈好寶寶親子悅讀大獎

星期一收到一張寫住 "領取獎項通知書" 既學校通告,  內容係咁既:

本校特函通知台端 將於 2009年 8月 14日 (星期五) 舉行之第 24 屆畢業典禮上, 獲頒發 "好寶寶親子 '悅' 讀計劃全年大獎", 以多謝家長參與及協助學校推行各項活動

嘩~~  真係估唔到小慈會羅獎啊 ^0^  第 1 年讀書就有獎呢!  個獎仲同讀書有關添!  我就真係冇諗過每個星期做既讀書報告會變成全年大獎!!  每一級得 3 個小朋友有獎架咋!!  

真係好開心今日就係小慈人生入面, 第一次上台羅獎既大日子喇~~~

第 24 屆畢業典禮係宣道會台山陳元喜小學禮堂舉行, 見唔見到場刊有小慈個名呀?

張證書好靚, 仲有禮物添!

叻叻呀小慈!  爸爸媽媽好開心^^

小慈睇醫生

星期一放學, 班主任已經打俾我話小慈全日都好多乞嚏鼻水, 叫我留意下睇下駛唔駛俾佢食 d 藥甚或睇醫生咁, 不過到我放工返去小慈又冇野喎, 全晚都係得一兩聲乞嚏, 鼻水都係透明, 精神又好好, 我估佢都係初起傷風, 可能上次游水凍親掛?  屋企仲有藥, 穩陣起見, 都係俾佢臨訓前食啦!

點知今朝起身小慈就黎料勒, 係咁打乞嚏, d 鼻水仲已經係黃色, 體溫仲有少少偏高添 @.@  我同秋今日都唔可以請假陪小慈睇醫生, 一係今晚放工先睇, 但小慈就要捱一日, 佢個鼻仔已經抹到紅晒, 即刻教小慈自己用濕紙巾抹鼻!

等到醫生開門打去掛號, 朝早 last booking 係 11:45 am, 於是我決定吩咐工人姐姐帶晒 2 個 B 一齊睇醫生, 屋企行過去診所要 5-10分鐘, 速去速回咁近應該冇問題既!  我仲叫工人姐姐一定要帶手提, 去到診所打俾我咁, 當我收到工人姐姐電話時, 原來佢地已經返左屋企!!  姐姐話小慈好醒目自己同醫生講左好多野, be le ba la 咁一輪嘴廣東話佢都聽唔明, 仲話醫生讚小慈 Smart & Clever!  病情好輕微, 係 common cold, 喉嚨冇紅, 肺好清, 冇痰

真係估佢唔到, 我仲叫工人姐姐帶手提去諗住我同醫生隔空用電話溝通架麻!  即刻叫小慈黎聽電話.....

我: "小慈, 姐姐帶你去睇醫生呀?"

小慈: "係呀, 仲有弟弟都一齊去添呀!  佢好乖, 冇喊呀!"

我: "你話俾醫生聽你邊度唔舒服呀?"

小慈: "我話俾醫生聽我有流鼻水同乞嚏羅!  個鼻鼻仲損左添呀!"

我: "咁叻呀? 講得好好喎!  醫生有冇睇下你個喉嚨仔有冇紅呀?"

小慈: "有呀, 但係我冇咳咳喎!  醫生俾左 3 支藥水, 一支紅色, 一支紅色, 同埋白色"

我: "2 支紅色, 1 支白色咁多?  咁你食左藥未呀?"

小慈: "食左勒! 支紅色好甜架...."

估唔到我既小慈咁勇敢, 咁獨立, 竟然自己識同醫生溝通!  雖然俾佢嚇一嚇, 但真係好開心佢自信心咁強呢!  上次佢喉嚨痛已經係咁, 入到診所都未坐低已經同醫生講佢唔舒服, 氹到醫生開心到同佢免費鉗耳屎 :DDD  不過小慈係好奇怪, 佢特別鍾意見醫生同食藥, 班主任都曾經講過俾我聽, 話小慈逢親餵藥時間 (12:00 noon & 4:00 pm) 就會去排隊等食藥!!  明明係其他小朋友唔舒服要餵藥唔關佢事, 佢硬係以為自己都有份, 堅持佢都要食 medicine!  真係俾佢笑死架 :DDDD

小慈成熟左

今朝送小慈返學時同班主任陳老師傾左幾句, 陳老師話我知小慈好錫弟弟, 弟弟又好鍾意小慈!  通常放學弟弟一見到小慈就會好開心, fing 手 fing 腳咁表示興奮!  小慈又會唱晒歌, 跳晒舞咁好肯撩弟弟玩, 次次弟弟都俾佢撩到卡卡笑, 好可愛, 成班老師就會圍住佢兩個, 好溫馨

我聽到當然好開心啦!  佢地兩個相親相愛係我既願望黎架麻!  兄弟姊妹係一輩子既朋友, 將來都希望小慈小明能夠明白呢個道理, 我會盡力做好自己既本份, 做個公平公正平易近人既母親, 幫佢地建立良好既姊弟關係!

陳老師仲話小慈成熟左好多, 做左家姐成個唔同晒!  係學校都好主動維持秩序, 有 d 同學仔做得唔好, 佢會好詳細咁解釋俾個同學仔知佢點解唔岩, 應該點做, 唔咁樣做老師會唔開心咁!  講野好大個, 好有條理, 有家姐風範

小慈係屋企都係咁啦!  成日都管住弟弟架勒, 唔俾佢去呢度去個度, 知道晒邊 d 玩具佢唔可以咬就一手幫弟弟撥開佢咁!  弟弟有時都會抗議喊喊架, 小慈識 d 唔識 d 都要慢慢教佢, 不過好明顯小慈係學足晒我地點對弟弟, 點樣同佢玩小慈又會照版煮碗  (身教啊~~~)

陳老師話小慈係學校情緒都好穩定, 呢兩日仲因為太好訓而尿濕左張床添!  不過陳老師話呢 d 都好平常, 高班既哥哥姐姐有時都會, 唔駛介意!  陳老師仲話小慈自理能力都唔錯, 可以自己除褲去廁所, 著衫著鞋都 ok, 又可以自己完成晒一碗飯, 唔駛老師幫手, 不過有時如果 d 餸比較硬 (例如菜), 小慈就會趙好耐都吞唔到, 會含住, 有時仲見佢食到 '中' 眼訓, 合埋左眼睛 ( 咁都得?!!)  要叫一叫佢先會醒番繼續食, 食得太耐老師都會幫佢, 俾 d 水佢飲等佢快 d 食完, 試過有一次食到所有小朋友上晒床訓佢都仲食緊飯  ( 唔係呀麻?!)  但好多時候都係係指定時間內食完既!

唉.... 食飯呢個問題係死症!  我地真係咩方法都試過架勒!  又唔係 d 牙有問題喎, 試過俾小慈食魷魚絲, 佢又好肯趙, 可以趙好耐都冇含住架噃, 硬係食飯就好似好困難咁, 已經俾得好少飯餸佢都要食至少 45 分鐘, 成日都勞氣佢含住唔吞..... 唯有希望佢大個好 d 啦!

不過今日聽到陳老師講左咁多小慈係學校既野我聽, 我真係好開心!  老師真係好好, 好留意照顧每一個小朋友, 多謝你地呀!

我鍾意返學

捱左 2 日炎熱既週末 (真係好熱呀, 連黃大仙都有 37.1 度 ), 都估緊唔知會唔會打風架勒, 果然今日就掛起 1 號風球

小慈睇新聞時發現左個颱風標誌, 穩陣起見佢都會問我 "咩黎架?"  當我證實左俾小慈聽呢個係 1 號風球時, 佢有咁既反應....

小慈: "打風呀? d 玻璃窗要打交叉羅?"

我: "係呀!  小慈記得喎!"

小慈: "打風, 我唔鍾意呀!"

我: "點解呀?"

小慈: "我要去公園玩, 要 go market 架!"

我: "咁點算呀?"

小慈: "我鍾意去公園, 我鍾意 go market, 我鍾意去 7-11, 我鍾意返學!"

我: "係呀, 打風就冇得去架勒..."

嘩~~ 我好開心呀! 小慈竟然話鍾意返學!  終於榜上有名!!

不過呢個星期返學已經冇喊了, 似乎連 Blue Monday 都不復再呢!

Keep it up 呀, 小慈!

小慈暑假正式結束

上星期五小慈班主任郭老師打俾我, 話下星期一開始學校有活動週, 主題係 "衛生常識", 教小朋友認識 H1N1, 學習注重個人及環境衛生, 預防染病等等.... 會有一連串既活動, 想問小慈會唔會返足一個星期, 就算唔係, 8月3日 (星期一) 都會正式開學, 分番自己班房上堂咁, 9月就會正式升 K1

之前之所以會間歇性返學, 主要原因係因為學校唔教書麻, 返去只係玩下玩具咁所以返唔返都冇所謂, 既然而家有主題, 咁就梗係要返學啦!  所以, 小慈既悠長暑假結束了~~~

百思不得其解, 小慈已經連續兩日返學都喊了  @.@

星期一, 明明係屋企好地地, 落車仲好開心, 返到學校望晒成間學校都唔見佢個班主任郭老師 / 陳老師就開始眼紅紅勒, 話要同媽媽一齊!  跟住到我同佢換完鞋放低書包佢就要媽媽抱, 我抱住佢一陣再交俾其他老師就即刻喊勒! 

星期二, 一早已經問我今日駛唔駛返學?  我話要呀, 小慈已經扁嘴, 我即刻同佢講:

"返學好開心架喎!  郭老師同陳老師好錫小慈架, 仲有好多小朋友都一齊返學呢!"

講完小慈都冇反應, 之後成程車都冇出過聲, 返到學校, 今日佢班主任陳老師係度當值, 仲諗住冇事啦, 點知連陳老師抱佢都喊, 話要攬住媽媽, 我過左手俾陳老師梗係唔抱番啦, 仲唔即刻 "bye bye 小慈" 跟住閃咩!  越留得耐個衰妹就越扭計!

之後老師打俾我, 話小慈好攪笑, 佢其實係我走左之後冇耐就收左聲, 不過過程係咁既:

老師抱住小慈請佢安靜

小慈: "我要落地, 我想自己坐低呀..."

老師意會小慈既意思係想自己坐埋一邊冷靜下

老師: "咁我幫你抹眼淚啦!"

小慈: "我想一陣間先呀....."

老師話佢好攪笑, 講野好大人, 唔理佢一陣由佢冷靜下又真係自己收左聲, 跟住全日返學都冇野, 仲好開心添!

我都唔知小慈攪咩, 咩事返學要喊咁淒涼先得架?  返學之麻!  之前全港停課 2 星期返番學都冇事, 咩事而家日日要佢返學就攪成咁先?!  唔理佢呀, 越扭計就越要返!  已經唔駛佢適應新學校都攪成咁, 真係.....

I love you, Baby First!

弟弟發高燒出玫瑰疹, 為免弱不禁風既弟弟出街吹風再病多兩錢重, 連帶小慈都冇得返學!  本來小慈呢個星期間歇性返學既, 但我唔想弟弟出去接小慈放學, 於是打左電話返學校同老師請假, 可能呢個星期都唔返學住

冇得返學, 連街市公園我都唔俾去, 直情係唔想弟弟出街, 太高燒喇真係!  我返工前已經吩咐定小慈, no market, no playground, ok?  講到明唔准扭姐姐去街, 叫小慈等我放工返屋企我先同佢出去, 好在小慈都好明白係因為弟弟發燒唔舒服先冇得出街, 完全冇扭計!  乖女

咁, 街都冇得出係屋企做咩好呢?  大家唔駛擔心, 小慈係好多玩具玩既!  我成日都做聖誕老人架麻, 將 d 玩具收埋, 隔一排又再羅番出黎玩就係新玩具一樣

小慈仲厲害, 除左玩玩具, 近排仲做埋電視精 (怕且全港學童都係咁)!   一早起身就問我夠鐘做 Baby First 未?  話好掛住 Harry the Bunny....  我咪教佢睇鐘羅, 支短針指去 8, 長針指去 12 就做 Baby First 架勒, 個衰妹都好快學識, 之後係咁望住個鐘, 又望住個電視機, 夠鐘上映時就歡呼大叫~~~

小慈: "有喇~~  開始喇~~  真係有 Baby First 喎, 媽媽!  睇完 Baby First 一陣就到 Sesame Street 架勒, 仲有 Scooby-Doo, 知唔知?"

真係勁!  好似背左電視台個節目表咁!  一見到個隻 Harry the Bunny 竟然開心到話:

"I love you, Baby First~~~"

駛唔駛咁呀..... 又唔見佢一望到我就同我講 I love you, 媽媽?!  哼

小慈既發音一直都係唔差既, 至少外人都聽得明佢講咩, 唔駛我翻譯, 不過有幾個音唔知點解佢發極都發唔到喎?!  例如:

- "姑媽" 小慈會讀成 "之媽"

- "鎖匙" 就次次都講左 "see saw" (攪到我幾次都誤會左佢想去公園玩搖搖板)

- "銀行" 會讀左 "民航" (不過呢兩個音我會放過佢, 好多大人都讀唔準啦!  遲 d 再糾正佢)

小慈近排又好鍾意著裙, 去邊度都話要著, 但佢有既裙仔真係寥寥無幾, 遲 d 要買多 d 俾佢先! 

一著住條裙就好開心, 仲走去照鏡又要求影相, 我細個有一段時間都好鍾意著裙架, 係大左先 like 著褲, 方便麻

有一日好攪笑, 又係預備出街, 同小慈著左條裙, 佢好 high, 因為我個日都係著裙, 佢話同媽媽一樣就好開心, 跟住轉頭望到爸爸, 就同爸爸講:

"爸爸, 我同媽媽一樣著裙呀, 你有冇著底褲呀?"

嘩哈哈哈~~~~~  笑到我同秋噴飯!!  點解佢無端端會咁講既?  深究之後, 發覺其實佢係想講 "短褲"!

"爸爸, 你有冇著短褲呀?"  :DDDDD

間歇性返學

由上星期四開始, 轉眼間小慈已經復課 1 星期, 本來仲擔心緊冇返學咁耐, 小慈會唔鍾意返學 or 扭計又攬住我喊咁..... 點知 1 次都冇!!  真係大個女了, 小慈好乖呀, 朝朝早都好合作咁起身返學, 日日都好順灘咁同我 bye bye, 乖到不得了  ^8^

反而係工人姐姐呢個星期明顯變殘, 佢話要趕住湊放學, 弟弟呢個星期傷風又痴身成日要抱, 冇小慈家姐係屋企分散下弟弟既注意力真係辛苦左好多!

呢 d 都唔係大問題, 最令我肉痛既反而係呢個星期落完雨日日出太陽, 今日沙田仲錄得 35 度高溫!!  連酷熱天氣警告都出埋, 湊弟弟出去接小慈放學咪熱瓜我隻肥豬仔?!  3, 4, 5 點真係好熱架喎, 又冇理由叫姐姐搭的士.....

忽發其想, 既然小慈返學唔返學都咁乖, 學校又講到明唔教書, 咁返唔返學都應該冇所謂啦?!  打番學校問下老師咁樣得唔得先!?

老師好好呀, 佢地好明白我既情況. 仲話其實佢地有同小朋友講 H1N1, 小朋友亦明白而家返學情況唔一樣, N1 + K1 會混齡上堂, 暫時唔分享, 要一人一份玩具, 要單向坐仲要坐開 d, 不過遲 d 真正返學就唔可以扭計, 又要同小朋友分享玩具, 小朋友知道晒咁話

於是我就放心勒!  初時仲擔心會俾壞榜樣小慈, 以為可以幾時想返學就返學, 既然佢地係學校都 sense 到同平時返學有分別咁我就易做好多, 而家決定小慈間歇性返學, 淨係返星期二同星期四, 其他時間係屋企同弟弟相處多 d 培養下感情, keep 住耐唔耐要返學等小慈習慣就 ok

暫時決定係咁, 唔 work 到時又再改變策略啦!  我地要返工真係幫唔到幾多

好耐冇曬過相, 平時影影埋埋 post 左上網就算, 係之前爺爺要返鄉下, 叫我曬 d 相俾佢帶番去俾人睇我先曬左 1 次咁大把..... 真係唔想再曬, 小慈出世個時又係狂影狂曬, 填滿左 10 本相簿之後真係唔想再曬相, 冇位放相簿 @.@

我既婆婆, 即係小慈小明既太婆 (我地鄉下叫亞白) 今個月 80 大壽, 於是我就 dick 起心肝曬 d 相寄俾佢睇, 寄之前又順便俾埋我 d 同事睇

估唔到一致好評, 個個都話弟弟好可愛, 讚到佢天上有, 地下冇, 攪到我呢個做呀媽既都沾沾自喜 ^u^

節錄同事朋友們對弟弟既評語:

- 你個仔攣毛架?!

- 好靚仔呀~~ 可以拍 BB 廣告呀~~

- 好肥呀你個仔, 你睇佢個面珠躉脹到成隻老虎狗咁!

- 好抵打呀佢!  好想啜佢一啖!

- 白雪雪成個女仔咁, 快 d 生多個, 下個一定係女!

- 嘩~~ 你睇佢碌脾, 真係好想搣佢呀~~

- 條眉長過對眼, 係聰明仔黎架喎!

- 成個醒目仔咁, 第時一定蝦家姐!

- 好可愛, 好得意呀你個仔! 你睇佢對眼大到!

- 兩個 b 都似爸爸喎! (係啦, 真係唔抵!!)

- 肥仔媽, 你工人湊得好好呀!

多謝晒你地呀~~~ ^^

媽媽, 我下次唔敢勒....

小慈 3 歲之後真係乖左好多, 好生性, 好聽話, 而家仲識睇人眉頭眼額添!

近期佢講得最多既係: "媽媽, 我下次唔敢勒, 唔好嬲我呀...."

好多時都只係我冇笑容 or 語氣粗少少 or 縐住條眉, 又或者冇望佢之麻, 都唔係鬧佢佢已經咁講, 攪到我好內疚, 對住佢要打醒十二分精神因為呢個女好敏感呢!

今朝又係, 我換緊衫返工, 小慈眼紅紅咁入黎, 我即刻問佢咩事?!

小慈話: "姐姐嬲我呀..... " (即刻大大滴眼淚流出黎)

我: "係唔係小慈曳曳唔聽話所以姐姐嬲呀?"

小慈: "我洗面...... 跟住姐姐行左去羅.... 唔睬我呀...."

咁岩姐姐行番黎, 我問佢咩事?  工人姐姐話小慈唔肯洗面, 佢想幫小慈但佢唔俾, 姐姐咪行開由得佢自己洗....  啊~~  我都即刻想像到當時既情況, 梗係小慈擰歪面啦!  有時佢會想自己擦牙, 洗面, 著鞋, 本來係好既, 但有時佢既態度好衰, 會搶 / 會避 / 會推開你 / 撥開你隻手咁... 我都有話過佢咁樣冇禮貌

於是我同佢講: "姐姐唔係嬲你, 姐姐想幫小慈洗面丫麻, 你睇下你隻眼仲有眼屎!  你頭先係唔係擰歪面推開姐姐先?  咁樣冇禮貌記唔記得呀?  姐姐好錫你架, 你下次想自己洗面, 你要同姐姐講 " I can do it! " 知唔知呀?  而家快 d 去錫番姐姐, 攬番佢同佢 say sorry 先!"

咁個衰妹先破涕為笑, 小朋友心靈係好弱小, 真係要好小心處理, 從佢既角度出發, 顧及佢既感受.....  而家已經叫做好左 d, 至少唔係咩都擘大喉嚨喊, 但小慈真係好薄皮, 好易流眼淚, 眼紅紅好似好淒涼咁....

今晚又同小慈講 bed time story, 又係指定要睇 First Experiences 既 Going to School, 我真係已經講到曉背

咁我都明白小朋友係重覆又重覆咁學習, 所以只要佢一日肯聽, 我都會繼續講 

我都算醒, 每次都會係同一個故事入面順帶講埋其他野, 例如: 故事入面小朋友返到學校, 咁我就會問小慈 "今日邊個冇返學呀?"

咁小慈就會答: "亨亨, 許樂瑤, 馮英倫同埋陳老師都冇返學!"

我: "點解陳老師冇返學既?  佢係唔係病左呀?"

小慈: "唔係呀, 陳老師去左第二間學校度同其他小朋友上堂呀!" 

我估小慈既意思係陳老師去左第 2 間分校度交流 or 觀課

講完一個故事, 小慈唔夠皮要再聽多一個, 於是我講埋 Moving House, 故事話小朋友要搬屋, 因為屋企唔夠住, 呢個小朋友屋企有爸爸, 媽媽, 哥哥同埋妹妹, 仲有個就黎出世既弟弟, 貓貓 & 狗狗,  我又順帶問埋小慈, 你屋企有咩人呀?

小慈答我: "有爸爸人, 媽媽人, 弟弟人, 姐姐人, 仲有小慈...."

嘩哈哈哈~~~~ 真係笑到我碌地 :)

小慈復課了

唔知咩原因, 小慈班主任郭老師打電話黎話學校呢幾日都有十幾個小朋友返學, 小慈同班既都有 5 個, 同組既亦有 1 個同學仔日日都有返, 如果有需要, 小慈都可以返學

不過學校冇學習活動 (即係唔教書), 但時間形式就會同平時一樣, 要著校服, 揹書包, 入學校前會量體溫, 消毒洗手, 1 人玩 1 份玩具, 單向坐, 全日戴口罩, 幾時接放學都冇問題

我就當係一個好消息黎架, 眼見小慈由日日問我駛唔駛返學, 到尋日問我係唔係去迪士尼樂園就知佢開始心散, 日日攬住個枕頭係梳化睇電視, 每日點都要出一轉街先心息..... 不過呢 2 個星期係屋企都有得著既, 就係小慈錫弟弟多左, 仲有英文好左, 日日都要用英文同工人姐姐溝通想唔好都唔得啦  ^^

不過真係估唔到當我將呢個好消息同工人姐姐講時, 佢俾我既反應係佢唔想小慈返學!?!  我仲以為佢唔駛 1 對 2 會減輕左佢既工作量,  點知佢答我已經習慣左, 係屋企唔駛趕住接放學, 仲話 I will miss Grace 添  @.@

真係好奇怪!  Anyway, 小慈點都要返學架啦, 咁辛苦先適應左返學, 冇返一排又唔記得晒咪弊傢伙?!  唔理勒, 返左先算!

好在小慈都生性, 今朝同佢講 d 小朋友好番勒, 要返學勒, 佢都好開心, 仲同我講:

"爸爸媽媽返工, 小慈一個人揹書包返學!"

一入學校見到班主任陳老師, 小慈係飛奔埋去攬住陳老師條頸同佢講:

"我好掛住你呀, 陳老師!"

我係陳老師都即刻溶左... 霖晒~~~ 

衰妹有時係好識氹人開心架 :)

繼續停課

真係繼續停課, 仲提早左放暑假...  都估到架勒, 日日都 50-60 宗確診個案  @.@  好在屋企都仲有個弟弟, 小慈都叫做多個傾訴對象, 見佢玩咩都走去俾弟弟望下, 弟弟坐住學行車時又會飛車埋去睇小慈玩咩..... 勁攪笑, 兩個好似相依為命咁!

今日放工見天未黑又冇落雨, 返到屋企小慈又已經食完飯, 仲話自己食得好快要我請佢食朱古力, 我問小慈:

"媽媽獎你去公園好唔好?"  小慈梗係話好啦, 即刻換衫落街仲要帶埋單車去公園!

由屋企開始踏到落樓下兜晒 3 個公園都唔駛媽媽幫手推單車, 又話自己好大力單車就會郁, 仲話自己有食飯快高長大先踏到單車, 真係俾佢笑死!

終於決定去後面個個大公園玩, 小慈落車同我講:

"媽媽, 你扮獅子追我丫, 我地玩捉依因好好玩架!"

嘩~~  勁呀, 小慈!  點解佢會知咩叫捉依因既?  唔通係爸爸教佢既?

我就扮獅子去捉小慈啦~~  wow~~~  個衰妹尖叫大嗌到怕且 45 樓都聽到啦!!  開心到飛起!  我就要掩耳仔呢.....

Bed Time Story

小慈簡直係迷上左一本叫 "First Experiences" 既書, 呢本書入面有好多個故事, 例如 "Going to school" "Going to the doctor" "Going on a plane"..... 當初我買呢本書就係睇中佢其中一個故事 "The new baby", 為左俾小慈有心理準備多個弟弟而買

我係好捨得買書架, 因為書可以 keep 一世, 仲可以睇完又睇, 小慈近期就係愛上左 "Going to the Dentist", 可以一晚要我講 3 次, 仲前晚講完尋晚又講, 今晚都仲想聽個隻, 真係已經睇到曉背, 對個幅 "潔白牙齒 & 黃黑牙齒" 特別大反應, 會指住黃黑牙齒話

"我唔鍾意呢個污漕漕!" 通常我就打蛇隨棍上問埋佢, 咁點算好呀? 咁小慈就會答:

"要擦牙! 如果唔係 d 牙會爛晒架勒!"

小慈依然都係習慣開飯時就會睇佢自己既 BB TV, 個日咁岩又係睇 Bear Bear 熊睇牙醫, 小慈睇到好入神, 再加上我係旁邊做翻譯 (因為是說國語的), 攪到小慈睇到七情上面, 非常肉緊, 尤其係螢光幕出面 "蛀牙兵" 時, 小慈已經依嘩鬼叫咁話:

"Bear Bear 熊個口入面有 ant 呀!!"  (隻蛀牙兵畫到好似魔鬼咁仲羅住支叉, 小慈話佢係 ant -- 螞蟻 ^^ )

當晚一同佢講話要預備訓覺時, 小慈已經問我係唔係要擦牙洗面呀?  我梗係話要啦, 小慈都好合作, 仲擦左好耐. 擦完問我乾淨未呀?  仲有冇菜菜, 有冇肉肉?  有冇 ant 呀?

今晚仲攪笑, 一飲完奶即刻彈起身同我講:

"媽媽, 我未擦牙呀!"

Yeah! 成功勒!!  你知唔知小慈 2 個月之前仲係好憎擦牙架?!  佢未擦都可以同我講擦左, 又試過同我講唔駛擦咁多, 有次眼訓仲話佢好攰唔要擦牙咁添!  不過我一次都冇逼過佢, 只係慢慢提高要求, 由飲完奶奶要佢飲啖水嗽口, 到要求佢朝早起身要擦牙洗面, 之後再同佢講擦牙要擦 2 次, 因為歌仔都有得唱 "起床臨訓都應擦" 麻, 個時小慈仲答我:

"要擦 2 次咁多?!" 

真係好抵死!!  到而家佢主動同我講話自己未擦牙, 我真係好開心呀 ^^

停課

呢隻 H1N1 終於係香港爆發喇, 政府宣佈全港幼稚園 & 小學停課 2 星期!!

Oh No!!!  咁工人姐姐點樣一個睇 2 個呀?!  弟弟呢排認人成日都要人陪, 要人抱, 小慈又要求多多, 又要咁又要咁. 帶 2 個 b 去街市都麻煩啦, 咁點算呀??!!! 

反而工人姐姐就好 take it easy, 係咁話, "Ok mum, I will try first!"  

唉~~~ 真係唔得都要得, 邊有計姐......

今朝小慈 6:00 am 就醒左, 我要同佢解釋唔駛返學既原因

我: "小慈, 今日唔駛返學, 因為好多小朋友病左, 學校要關門呀"

小慈: "咁我地係唔係去搵 Miss May 呀?" (Miss May 係音樂興趣班既老師)

我: "唔係呀, 好多小朋友病左, 連 Miss May 都要係屋企休息呀"

小慈: "我好掛住 Miss May 呀"

我: "Miss May 都好掛住小慈, 不過要等小朋友好番晒先可以一齊上堂架"

小慈望一望出窗, "係喎!  出面真係冇小朋友返學喎!"

我: "係呀, 媽媽要返工喇, 小慈要乖, 聽姐姐話, ok?"

小慈: " 嗚~~ 我想同媽媽一齊呀!"

我: "媽媽要返工, 好快返黎同小慈一齊玩!"

小慈: "好啦, 咁我一陣同姐姐 go market 啦! 仲有去公園!"

暫時過到骨, 真係唔知之後點算?  我怕工人姐姐搽晒成支萬甘油都頂唔住  >.<

擔心左成日, 工人姐姐話 1 對 2 都 ok, 佢話因為小慈係屋企走黎走去, 有 d 人氣, 弟弟成日都望住佢, 反而冇咁痴身扭抱  

有 d 咁既事?!  真係意外驚喜!!  仲有成個幾星期要捱, 希望日日都聽到 good news 啦!

好在尋日解釋得好咋, 今日小慈睇新聞就識同我講:

"好多小朋友戴口罩唔舒服, 冇得返學喇, 學校關左門咯...."

理解力都唔錯喎, 叻叻!

好耐冇試過一個星期六咩野都唔駛做, 亦都冇得做!  所有 club house 關門, 所有興趣班延期, 出面又落大雨, 連公園都冇得去, 又唔去得商場因為人多有菌..... 真係百無聊賴既呢~~

唔駛趕住去上音樂班, 就同小慈一齊瞓晏晝覺, 係冇時間限制既壓力底下, 我竟然同佢由 12:30 pm 瞓到 3:30 pm!!  爽呀 :)

不過 H1N1, 你快 d 走啦, 呢度唔歡迎你呀! 

精叻

小慈係好識得把握機會扭抱!

個招呢, 係小朋友都識既行行下跑快 2 步走係你前面攔路, 然後張開雙手講:

"媽媽抱~~~~" 

正常都會抱既, 除非羅住好多野, 又或者攰到飛起啦

不過就算我肯抱起小慈, 我都會 "薄責" 佢幾句, 問佢做咩事要抱呀?  係咪懶豬呀?

今朝返學等緊 lift 時, 小慈又係要媽媽抱, 我又話佢係咪懶豬?  平時小慈為左達到目的係會承認自己懶既,  今日佢竟然話....

小慈: "媽媽抱, 高 d 呀!"

我: "仲有點樣先可以高 d 呀?"

小慈: "要食多 d 飯飯, 咁就可以快高長大架啦麻, 我唔要最矮!" 

你知就好啦!  小慈返左學之後, 生理時鐘跟足晒學校時間表, 就算唔駛返學個日, 都係 7:00 am 前就起身飲奶, 9:00 am 想食早點, 11:30 am 想食 lunch, 跟住12:00 noon 要訓晏覺, 夜晚 8:30 pm 就已經好攰, 會要求飲奶奶之後訓覺, 當然有時玩緊玩具興高采烈就會唔知時間, 但都唔會超過 9:30 pm 訓著, 我地會幫你維持呢種生活習慣, 早睡早起身體好麻!

今晚俾左份新玩具小慈玩, 係字母火車黎既, 一卡一卡火車可以互相鉤住一齊行, 小慈好開心, 帶住火車穿山洞, 又係咕臣碌落黎, 又同佢地圍個圈跟住排隊咁, 興高采烈玩左成晚, 通常收玩具之前我都會出 warning, 於是我同小慈講...

我: "小慈, 玩多 5 分鐘要飲奶奶, 跟住擦牙訓覺勒"

小慈: "唔係呀, 媽媽!  唔係 5 分鐘, 係 6 分鐘呀!"

咁快識得同我講數?!  仲要點解佢知 6 分鐘多過 5 分鐘既呢?  勁喎! 

當然我梗係冇望實個鐘 exactly 5 分鐘就收玩具, 只不過係姿態既一種, 俾心理準備小慈等佢知道之後要做咩, 小慈通常都好生性, 真係玩多一陣就自動收拾, 之後仲識指揮爸爸去開奶奶俾佢添!

精叻到不得了!

俾個交叉你

除左日唱夜唱兒歌之外, 間唔中, 小慈係會玩玩下講左一 d 係學校學既野出黎, 例如:

"N1 坐地墊"
"手仔放係膝頭哥, 唔好四圍摸"
"你好叻! 俾個叻叻你先!" (手指公印你面頰)
"今天是快樂的星期一, 星期一, 星期一. 今天是快樂的星期一, 快樂星期一"
"烏龜加油! 兔仔加油!"
"圍個圍個圈, 圍個圍個圈, 大家一齊圍個圍個圈"
"洗手, 洗手背, 洗手指, 洗手指尖, 仲有手指公"
"俾 d 掌聲恩慈丫"
"西瓜組請排隊"
"郭恩慈預備放學"

前幾日仲攪笑, 同小慈搭巴士個司機急停差 d 碌左小慈落地, 好在我扶得切冇受傷! 不過小慈就好唔滿意, 係咁話:

"司機叔叔唔岩呀, 唔小心呀, 差 d 碌左小慈落地, 曳曳呀! 俾個交叉你!"

意猶未盡繼續講: "再俾個手指尾你, 冇手指公勒今次! 曳曳羅!"

睇見佢認真個樣真係笑爆嘴 :)

今日又係, 小慈食 lunch 又係含住唔吞, 呢個問題已經困擾左我 2 年!  鬧又鬧過, 手板又打過, 唔理佢又試過, 鼓勵獎賞又有...  真係咩方法都用晒冇計勒

不過今日突然靈機一閃, 我同小慈講:

"我數 10 聲你要吞晒勒, 吞晒就俾個手指公, 俾個叻叻你.... 你睇, 手指公準備出黎勒.... 1... 2.... 3....."

攪笑呀! 小慈真係唔駛 10 聲吞左佢含左 10 分鐘既肉呀!!!!  YEAH!

之後老師打俾我, 問我點解小慈額頭同下巴都有受傷?  我答, 小慈下巴撞瘀左, 係著左一對新既鞋去公園太吮, 係滑梯度跣唔到落黎所以撞親, 至於額頭, 就係因為佢尋日係屋企扮小矮人, 用膝頭哥跪係度行, 行得唔好一 kick, 額頭就岩岩好撞到張櫈, 連老師聽到都忍唔住笑啦!

呢間學校既老師真係好錫, 好緊張小朋友, 真係小朋友邊度整花撞瘀都會留意到, 仲會打電話問個明白!  如果小慈係學校整親受傷, 佢地都會第一時間通知家長, 好似試過小慈係學校跌損左, 老師都會打黎問我好唔好同佢貼膠布?  又試過小慈係學校出風疹, 初時未知佢出疹, 老師以為佢俾蚊咬, 打黎問我可唔可以同小慈搽蚊膏?!?  雖然係好芝麻綠豆既事, 但睇得出佢地真係好關心學生, 好細心, 一班咁多個學生, 每個有咩唔妥, 有咩需要佢地都注意到, 好難得架!  小慈有咁錫佢既老師真係好幸福~

每次老師打黎, 我都會把握機會問下小慈係學校既情況, 今日又順口問下小慈, 老師竟然同我講佢今日話過佢黎, 話完佢一直到訓覺前小慈都唔開心...

事源係咁既, 話說課室入面有塊大地墊, 呢期主題係 "到沙灘去" (小慈岩岩去完旅行, 老師話佢識晒, 投入到不得了^^)   咁個地墊就整到成個沙灘咁既樣, 小朋友就係上面 '不' 泥沙, 會搵到貝殼, 海星, 連龍蝦都有, 聽到我都想玩

咁唔玩主題既時候, 地墊就會變身做圖書角, 小朋友就會係上面睇圖書, 平時小慈係好乖咁坐定定睇圖書既, 老師今日話佢將本圖書當車咁渣車, 冇將本書放係膝頭哥上面睇, 同佢講左 2 次都唔聽, 連埋其他小朋友都一齊用圖書玩渣車!!  於是老師就埋去收左小慈本圖書, 咁...  我都預計到小慈咩反應啦, 梗係大喊, 大叫 "唔好呀~~"  咁啦 >.<  老師話佢收左聲都好唔開心, 一直到訓覺時都係扁晒嘴, 要老師氹番佢先冇事

於是放工返屋企我就咋咋第問小慈今日返學有冇乖?  小慈梗係例牌咁答我 "乖~~"  跟住我再話, 老師今日打電話俾媽媽話小慈係學校有曳喎, 小慈即刻想喊咁大聲答我 "冇呀~~~"  於是我就由頭到尾講番一次出黎, 小慈就記得勒, 佢係唔記得左自己曳, 我講完佢先知, 佢咁話....

小慈: "係羅, 小慈今日渣車羅, 同盧偉希一齊渣車羅!"

我: "咁用圖書渣車岩唔岩呀?"

小慈: "唔岩"

我: "咁應該點呀? 圖書放係邊度架?"

小慈: "圖書放係膝頭哥睇, 下次唔敢勒, 媽媽"

好在, 小慈都勇於承認過錯, 仲識得舉報同黨 @.@  同黨叫盧偉希, 佢都係住我地屋苑, 工人姐姐同我講過話呢個盧偉希日日都要等埋小慈一齊搭火車放學, 再一齊去公園玩, 小慈唔走, 呢個盧偉希都會唔肯走

都知返學耐左開始適應晒就會有 d 頑皮野架勒, 不過小慈都係第 1 次俾老師話!  老師眼中既小慈係乖到不得了, 有問必答又好記性, 上堂好專心踴躍, 老師成日搵佢做示範 ^^

老師都有幫小慈辯護話佢開始識玩想像遊戲, 不過想像還想像, 想像要放係岩既時候, 岩既地方, 一 d 唔守規舉既行為都係要及時制止既呢!

又黎?!?

放左幾日假係屋企, 懶懶地尋日已經冇送小慈返學, 今朝仲懶到唔起身等秋秋攪掂小慈一齊出門口, 仲以為小慈見唔到我就會唔扭我, 點知臨出門口時......

小慈: "爸爸, 駛唔駛等埋媽媽呀?"

爸爸: "媽媽仲訓緊覺呀, 我地要安靜 d, 出門口勒"

小慈: "今日邊個同我返學呀?  係唔係爸爸渣車呀?"

爸爸: "係呀, 爸爸渣車呀, 姐姐送小慈返學"

小慈: "下? 又黎?!?"

爸爸: "........."

秋秋話, 當時真係唔識俾反應佢, 話小慈用詞真係用得太貼切!  仲好話我連出門口同個女返學都懶喎!  哼!  我梗係有我既理由架啦!

自從搬左個玩具櫃去門口, 又執過 d 玩具擺位之後, 小慈而家羅玩具玩好得心應手, 自己想羅咩就羅咩, 不過玩之前都係會問下我先, 好乖咁 ^^

近期更非常鍾意玩泥膠, 一起身已經要玩, 以前只係識將泥膠搓波波, 壓扁, 切碎, 而家已經識加入想像遊戲, 今朝就煮左餐飯俾我食, 叫我渣住個杯, 佢 "不" 俾我, 我問佢呢 d 咩黎架?

小慈: "呢 d 係好辣既奶奶豬肉通粉!"

我: "係唔係即係忌廉肉碎通粉呀?"

小慈: "唔係呀, 呢 d 係奶奶黎架!  呢 d 係豬肉, 呢 d 係通粉!  辣架喎!  食完要飲水, 知唔知道?"

我仲以為小慈講錯左想糾正佢, 點知原來佢真係堅持通粉要用奶奶黎煮, 仲要係辣既添!  真係唔可以睇少佢, 可能將來真係有呢味菜都未定 :DDDD

跟住, 小慈要我將泥膠搓成一個大波波, 佢就將 d 眼耳口鼻砌上個大泥膠上面, 你地睇下幾得意

影完相小慈先話佢漏左個鼻!!

小慈既對答

小慈 26 個月大時我岩岩有左, 唔可以好似以前咁抱住佢坐後座, 於是買左張 car seat 俾佢, 初時仲好擔心佢唔肯坐, 以為小慈習慣一定要我抱, 好在直到而家小慈都好 like 佢張寶座, 好自在咁!  之前只係會專心玩車上面既玩具, 而家大個可能又高左 d, 會留意窗外既風景, 有時會同我講...

"媽媽, 好多正方形呀!"  (原來係指斜坡上面既護土牆)

"Moon 呀~~~  The sky is getting dark 勒"

"可樂車呀~~佢地排隊呀"

"太陽伯伯出黎玩, 好曬呀!  好多塵呀!" (有太陽先會見到車廂入面既塵埃)

"爸爸俾隧道費呀?  呢度係咪停車場呀?"

"出面係唔係好大風呀?"

"點解圍住左既?  係唔係維修呀?" (指住馬路中間既修路處)

今日仲同我講.....

小慈: "媽媽, 你見唔見到好多樹樹呀?  D 樹樹呢, 係雀仔仔既屋企黎架!"

我: "咁 d 雀仔係屋企做咩呀?"

小慈: "係呢, 佢地呢, 係樹樹度訓覺羅!  我地要細細聲唔好嘈醒佢地呀!"

今朝我擦牙時, 小慈同我講: "媽媽, 屙屎屎!"

我: "快 d 去廁所先, 小慈, 忍住!"

小慈: "忍唔住呀, 屙左勒..."

我: "屙左拿?  咁唔緊要啦, 下次再早 d 同媽媽講啦"

小慈: "媽媽, 你冇嬲我呀?"

我: "嬲你咩呀?"

小慈: "我屙左屎屎落褲到, 冇屙去廁所, 你冇嬲我係唔係呀?"

我: "傻豬, 媽媽唔嬲你, 不過下次要早 d 同媽媽講, 咪可以屙屎屎落廁所羅!"

呢幾日小慈個肚仔係有 d 唔舒服, 早兩日老師仲打俾我話小慈係學校賴屎添!  明明個朝已經係屋企去左大便先返學, 點知去完仲可以再去?  仲要有 d 似肚瀉攪到要洗 pat pat

放學時問番小慈, 佢都話今日係 "妙姐" 同佢洗 pat pat, 問佢妙姐係唔係戴眼鏡架?  小慈仲識講妙姐戴眼鏡, 短頭髮, 玉姐長頭髮冇戴眼鏡!  小慈學校 d 姐姐超級錫小朋友, 有時 d 小朋友仲放肆到指定某位姐姐服侍佢, 同佢地去廁所!  咁都得  @.@

其實我好窩心, 小慈好介意我既感覺, 亦對我既教誨好入腦, 不枉我平時不厭其煩, 講完又講咁教佢, 真係好 work , 希望小慈 3 歲前建立好常規, 做個有規有舉有禮貌有家教既小朋友 ^^

德智體群美, 德育我放好重位置, 因為 3 歲定 80, 之後好難改變啦~

兩子之母的母親節

今日係母親節, 小慈送左好多禮物俾我, 其中包括 1 個相架, 小慈有幫手貼貼紙裝飾, 相架入面既相係上次去旅行老師影架, 好有心思!

1 張母親節咭

小慈有份填顏色

令我最開心既係, 一早小慈就同我講:

"母親節快樂~~ 媽媽, 我愛你!"

 又唱: "I love Mummy, Mummy loves me~~"

"我愛我的媽媽, 媽媽真偉大~~ 媽媽教我努力, 做個好乖乖~~

媽媽~~ 媽媽~~ 我要做個好乖乖~~ "

真係好驚喜呀!  點解小慈會知今日係母親節既呢?!  開心死我了 ^^

當然係學校教佢啦, d 手作仔都係學校安排既, 但唱歌真係今日先聽到佢唱架!  平時佢係學校學左咩歌都會好快唱到俾我聽, 呢首 I love Mummy 真係第 1 次!  仲要咁應節, very good!

多左呢隻豬, 今個母親節我已經榮升兩子之母, 感恩 ^^ 

只要兩個小寶貝健康快樂, 做個好乖乖, 就真係日日都係母親節!

今年有 3 個孫幫大母親嫲嫲慶祝, 一家 9 口約埋一齊去太子一間泰國菜館食自助餐, 嫲嫲最開心就係抱住小明, 果然家族入面邊個最細就最錫邊個

昊昊都好錫小明, 寧願飯都唔食咁撩佢玩, 小明你好幸福呀!

兩表姐弟今日好開心

一齊豬嘴

一齊玩咋死真係笑瓜我地班大人

一家人最緊要身體健康!

母親節快樂 :)

小慈N1旅行

小慈學校今日去假日農場旅行, 爸爸終於有得參加!!

真係冇估到呢間學校會有 2 次旅行, 上次 11 月旅行撞正爸爸既好朋友結婚, 佢要由朝到晚咁幫手做司機, 唔想錯失大好機會認識小慈學校既老師同學, 籮咁大個肚既我都要報名參加!

爸爸上一次好唔開心架, 因為我地盡量都唔想錯失小慈既第一次, 估唔到竟然有機會補償, 所以爸爸今日超開心 ^^

假日農場原來好好玩, 我地已經事先報名參加自製手摝拉麵, 稻草人製作 & 創意焗麵包, 爸爸而家整緊稻草人

3 樣都咁好玩!  小慈極喜歡佢自己整既麵包

場地又大又原始, 一大塊田又有牛又有羊又兔仔真係唔係浪得虛名呢

熱愛淋花的小慈

兔仔好肚餓呀

三色山羊好狼死, 都係唔好餵佢地喇

農場仲有自製好多千秋, 草馬, 小吊籃, 激波船, 阿拉飛氈.... 

磨粟米

全部都係用環保物料製造

呢個飛索好刺激

小慈呢張相好靚女啊~

阿拉飛氈快到有離心力, 但小慈個樣好淡定

小慈既兩個班主任: 陳老師 and 郭老師, 多謝你地平日咁照顧小慈呀 ^8^

我地真係好欣賞呢度又原始又環保

小慈由朝玩到天黑興奮到唔駛瞓晏覺, 終於上到旅遊車先頂唔順瞓左一陣, 返到屋企就精神晒!  極度掛住弟弟又攬又錫, 幾咁肉緊地攬住弟弟個頭, 做媽媽既真係好安慰呀 ^^

你睇小慈

弟弟今日 d 攣毛好攪笑, 呢張相成個八爪魚頭咁呀 

close up 睇真 d

傻笑的肥仔

仲想學人坐, 不過條腰唔夠力就自我摺埋 

全家都玩到又攰又餓, 即刻煮左今朝整個個手摝拉麵黎食

味道唔錯, 小慈食左好多

我真係越黎越鍾意呢間學校, 校園雖然細, 但老師全部都有愛心, 學校又成日舉辦好多活動令到小朋友投入開心咁返學, 真係好難得!

幼稚園既生活應該係快快樂樂咁渡過架麻, 童年應該係愉快無憂既~~

我要戴口罩呀~~

因為來勢洶洶既豬流感 (已經改名為甲型流感 H1N1, 但都係豬流感個名型 d ), 小慈返學要量體溫之餘仲要全日戴口罩

不過小慈由新年開始咳, 學校已經要求放口罩係書包以備不時之需, 再加上工人姐姐呢幾日病 係屋企戴口罩小慈已經好 "恨", 所以當老師要小慈戴左口罩先可以入課室, 而我又係書包裡面 "變" 左個口罩出黎既時候, 小慈係好驚喜既 @.@

萬萬都估唔到小慈鍾意得個口罩咁緊要!  一早起身牙都未擦已經話:

"我要戴口罩呀~~"

氹佢返到學校先戴, 點知到放學搭火車返到屋企都唔肯除!?! 

平時放學會俾少少零食如: 餅仔, 果仁, 軟糖咁, 俾小慈一路食一路行番返屋企咁架麻, 我咪同佢講,

"食果仁除口罩啦, 好唔好?"

小慈竟然同我講: "唔駛架, 媽媽!"

跟手就拉低個口罩去下巴, 露出個嘴自自在在咁食果仁, 食完又拉番個口罩上去戴住!!!

真係嘆為觀止~~~