化妝前, 化妝後

網上有好多遊戲玩, 今次係揀張相, 佢就會幫你化個靚妝, 等你睇下自己化妝前, 化妝後, 笑死我!  弟弟超靚女呀  ^8^

小慈都好有少女味喇!  不過佢自己睇完 「依~~~~~ 喂呀!!!」 表示不滿 :DDDD

我都唔錯架, 不過我梗係知自己化左妝咩樣啦!

我老公, 真係一絕呀!  男相英俊, 女相省鏡, 好正呀!  有鬚根既人妖 :P

猩紅熱

過完年就開始病, 我同弟弟輪流睇醫生, 都係感冒, 我就入左胃, 又胃痛又發燒, 弟弟就傷風咳鼻水, 今朝仲同我講條頸好痕, 出左一粒粒, 我仲以為佢生熱痱, 橫掂感冒藥食晒都要再睇醫生, 順便睇埋

小慈笑弟弟用被被圍住條頸唔俾自己抓痕, 個 look 似書入面既長頸族

唔睇醫生尤自可, 一睇, 醫生就話弟弟既疹唔簡單, 條脷都有疹, 一粒粒突晒出黎成粒士多啤梨咁, 斷定佢係「猩紅熱」, 會透過飛抹傳播所以下星期唔可返學 @.@ @.@  吓?!!  下星期測驗喎!  弟弟既即時反應係:「早知唔駛溫得咁辛苦啦!!」

弟弟要食 10 日抗生素, 1 日 4 次, 連埋我 D 藥真係七彩繽紛 @.@

猩紅熱是由甲類鏈球菌引致的細菌感染, 主要影響 10 歲以下的兒童 @.@

病徵
病發初期通常出現發燒和喉嚨痛, 偶爾會有頭痛、嘔吐和腹痛.  舌頭表面或會出現草莓般 (呈紅色和凹凸) 的外觀.  在發病首天或翌日, 身軀和頸部會出現砂紙般粗糙的紅疹.  其後紅疹會蔓延至四肢, 特別是腋窩、肘部和腹股溝. 紅疹多在一星期內消退, 繼而指尖、腳趾和腹股溝的皮膚會脫皮

傳播途徑
鏈球菌可存活於患者的口腔、咽喉和鼻子, 可透過飛沫或直接與受感染的呼吸道分泌物接觸而傳播, 潛伏期一般為1 － 3天 (有理由相信在學校感染!)

治理方法
抗生素能有效治療猩紅熱.  如出現猩紅熱的病徵, 應盡早求診, 並依照醫生的指示服用抗生素.  同時服用退燒藥物, 多休息和補充水分有助紓緩病徵

日日在家百無聊賴, 好在弟弟精神都好, 屋企咩玩具都俾佢玩過一次!  小慈家姐有幫佢攞功課, 測驗卷都攞番屋企做, 所以弟弟都忙忙地, 唔係純休息架, 不過就似放暑假咁開心 ^^

放左幾日病假之後, 弟弟既疹會換位, 一時頸, 一時背脊, 一時下腹, 仲去埋頭皮真係唔知點同佢搽藥膏 @.@

小慈終於考完呈分試, 第一件事梗係去睇醫生攞番張健康證明先去玩啦!  下星期回復正常, 小明都話好掛住學校, 好掛住 D 同學呀 :)

小病是福, 早日康復!

健康檢查

尋日跑得咁辛苦, 今日係陸運會後假期, 但健康院就最喜歡趁學校假期要你黎檢查, 我又唔醒目, 應該一早申請連同小明都一齊今日檢查, 唔駛我一月走一轉二月又走一轉 @.@

健康院人頭湧湧, 攪笑地全部都係小明既同班同學, 反而今日檢查既小慈一個同學都見唔到

共同嗜好, 有機打就等幾耐都得

今日檢查既流程

姑娘話每年高 5 cm 有增磅健康就正常!  小明屬於中細碼, 小慈就係細碼 @.@

兩個都要填問卷, 有成 88 題真係填到手都軟, 問埋你大約有多經常食煙、飲酒、吸毒、賭錢 (唔係問你有冇, 係有多經常), 仲有冇試圖自殺同計劃自殺, 喜歡自己做男仔/女仔 @.@  呢 D 題目真係好特別, 好好奇如果填有, 唔鍾意自己係男/女, 會點呢?  可能轉介睇心理醫生??  我最好奇係第 37-39 & 43 題, 小慈小明兩個既答案係一樣咁正面既 :D

小慈有少少近視啊!!!  排期驗眼要暑假先有位, 真係好誇張 @.@  即刻又約理大驗眼, 兩隻眼都有 75 度, 屬於輕微, 暫時不用配戴眼鏡, 不過要半年後再 check

難得放假, 健康檢查完梗係去玩啦!  近近地揀去宜家傢俬, 偶遇 Lego 展

狗年, 周圍都係狗狗

小慈小明學識左打麻雀特別興奮

屬狗的小慈今年 12 歲了, 捨不得她長大

小明帶左隻公仔出街, 係都要佢上鏡

有篇作文叫 My First Year 要小慈寫自己, 佢話佢第一次去宜家傢俬就成為左佢既 favorite place to go :)

兩個扮開餐

Bedtime story...... 我俾小明笑瓜我了 :DDDDDDDDD

咁鍾意宜家, 就係呢個部份

好難解釋, 但我同小慈小明都覺得呢隻野好似爸爸, 哈哈哈哈哈 :DDD

因為兩個尋日陸運會都攞左獎牌, 於是我俾佢地自選一份 $100 以內既禮物, D 公仔又平又靚質地又好, 仲好多都做緊大特價添, 簡直愛不釋手

左揀右揀, 終於揀左呢 D!  小慈隻 beagle $79.9, 小明兩隻大笨象最抵, 原價 $179.9, 而家 $39.9, 仲夠錢買多隻 $19.9 既雪橇犬, 至抵精明眼 ^^

可以自助收費仲好玩, 不過我要睇到好實, 佢地成日入左 double items

好玩好玩!  預祝大家狗年大吉 ^^

連環甩牙

差不多朝朝都食麵包做早餐, 小明近期最愛糧友既芝士棒包, 鍾意佢條條包都有粒粒車打芝士, 超級好味!

今朝食食下早餐, 弟弟入黎搵我, 話個包入面有粒芝士特別硬, 咬唔到, 吐出黎先知道原來係佢隻牙!!!!!  食食下包甩左隻牙!!?!!  笑死我!

好在冇吞左落肚, 係佢既上側門牙 (右邊) 黎架!  甩牙都甩到咁好笑, 弟弟真係好可愛~

事隔一日, 弟弟放學打電話俾我, 話今日上上下 Net 堂, 覺得個口好痕, 於是捽下, 點知一捽, 左邊既上側門牙都甩埋!!!!  有冇咁化學呀!  捽下就甩, 仲要連環兩日甩牙 @.@  好在完全冇血, 不過都嚇親班同學仔, 優待左弟弟有得上堂時間去廁所 ^^

對上一次甩牙, 已經係 2016 年暑假既事, 一年零 4 個月先甩多兩隻, 而家 total 甩左 8 隻牙, 同齡既小慈都係甩面呢 8 隻, 不過當年因為小慈口仔太細 D 牙又大隻唔夠位出, 先去牙醫度剝左 4 隻 BB 大牙俾位恆齒出世期望唔駛箍牙, 所以當年 8 歲半既小慈係冇左 12 隻牙架 >.<  不過當年明智既決定先造就小慈而家有美麗動人既笑容 ^^  一日未出齊 D 牙, 一日都未知要唔要箍, 弟弟就肯定唔駛箍, 因為佢個口夠大  :DDDDDD

Happy Nine

弟弟 9 歲生日喇!  下年就雙位數 10 歲架喇!  咁岩今次生日正日係星期六, 小明非常大期望, 一早已經講定星期六唔會上興趣班咁辛苦, 又話生日要玩足全日, 好想去大棠荔枝園, 又想去海洋公園生日唔駛錢等等...... 不過我睇過大棠荔枝園, 今年有得玩海陸空嘉年華, 有車仔有彈床有搖控飛機又有冰雕, 但唔知點解我覺得悶, 又遠, 去海洋公園弟弟一個唔駛錢但我地 3 個陪太子讀書又好溶.... 點算好呢?  好想同弟弟慶祝但好似好多地方都去過晒冇特別咁既?  終於, 我都係覺得天氣咁好唔好浪費, 一於去離島散下心!

一大早梗係唱住生日歌叫醒壽星仔啦!  小慈家姐第一個送禮, 用自己在學校辛苦賺到既 e-dollar 換左幾隻 Angry Bird 木夾仔送俾弟弟, 仲將自己好鍾意既 B duck 電話袋仔送埋出去, 太愛呢個弟弟啦!  小明都算識做, 錫到小慈家姐面都歪埋  ^8^

我就送左個 toilet slam dunk 同木 calendar, 插住小慈家姐張生日咭仔岩岩好 ^^

仲有一本每日靈修, 英文黎架, 都係時候要加強英文語感 ^^  November 25 Being Thankful, 好切合弟弟生日呢!

爸爸送出寶貴既 sim card, 弟弟終於可以打電話同 WhatsApp 了!

兩姐弟 WhatsApp 好好笑, 仲要一個坐梳化頭, 一個坐梳化尾

爺爺姑媽姑丈封利是, 小明用生日利是錢買左兩盒 Lego

極速砌完

出發喇~~~  我地最終決定去長洲!  上一次去係慶祝爸爸媽媽結婚 10 周年紀念, 不過個次係一落風球就去, 弟弟仲要發住燒, 踏單車又炒車玩得唔盡慶架 V_V   搵番張相, 7 歲既小慈同 4 歲半既小明當年幾 BB

邊度跌倒就要邊度起身, 我地今次就決定再去長洲, 要玩得有咁開心得咁開心!!

爸爸發現有架超快既城巴去中環碼頭, 停幾個站就到, 於是我地就去大老山隧道口截佢, 呢個路牌請找亮點 :D

巴士站設計有改良, 竟然有櫈坐呀!  小明先拔頭籌坐低, 點知爸爸直接坐上佢大脾再加多個小慈, 小明極力掙扎逃脫, 笑死我喇~~

半個鐘就到中環碼頭, 新飛號好型呀!

而家搭船去離島冇胡椒粉餐肉麵食了, 好令人懷念

今日天朦朦, 不過不太冷也不太熱, 好舒服

話咁快就到長洲!  你孕育左姍姍!

漫無目的既我地周圍行下、睇下、食下野

呢間長洲太平清醮紀念品專賣店好多野睇, 仲有刻名口風琴, 刻名吊飾匙扣, 小慈小明如獲至寶!  老闆仲教點樣吹口琴添, 小慈一點就明, 吹到兩隻老虎, 好叻叻呀!

必食長洲大魚旦

心情勁靚的小明

真係世界真細小小小, 黎到咁遠都撞到進殷哥哥 ^^

北帝廟外仲有呢個小小兒童遊樂場

非常識嘆的小明, 當爸爸係人肉梳化床, 仲要瞓到笑瞇瞇

小明好想好想去沙灘, 好啦, 食完午餐就出發啦!  呢個 set lunch 好抵食 $188 有 4 個餸又送湯又送菜

同一個地方都可以試唔同既野, 我好想去爬張保仔洞, 讀中學時爬過一次, 感覺好驚下, 咁多年冇試好想再回味, 趁未天黑, 爬完先去沙灘玩啦!

 差不多成個長洲行左一個圈先搵到阿張保仔, 寶藏真係收得好埋下

唔睇都唔知張保仔咁勁!

就係呢個入口喇!  爸爸先行探路, 大叫一聲: 「好大條蜈蚣呀!!!」下?  山長水遠入到黎冇得爬呀?  用樹枝趕走條蜈蚣點都要試下!  勇敢的弟弟跳入去了 @.@

有光呀!  搵到出口了!

兩姐弟安全爬番出黎, 過程真係驚險又刺激, 山洞入面石頭形狀千奇百怪, 一時要側身, 一時又彎身, 一定要準備強勁電洞以策安全

好好玩!  弟弟好想再爬多次 ^^

爬個山洞用晒 D 力, 係時候要 tea 一 tea

小慈想試刨冰好耐, 呢個士多啤梨同芒果軟綿綿, 好好食

嘩!  好靚!  引入左 韓國既 love lock

終於黎到沙灘喇~~~

我掛住走去影直昇機, 今日見晒迷你消防車同救護車, 而家連直昇機起飛都睇埋!  返黎時弟弟已經鞋襪濕晒, 呢位小朋友一見到水就忘形 @.@

包晒成個沙灘真係幾開心

好快就天黑, 本來打算去食海鮮晚餐, 點知壽星仔話晏晝已經食左唔想再食, 寧願去掃街喎!  旋風薯片食左 4 串, 真係好特別既生日飯 ^^

其實食到好飽, 點知弟弟同我講:「我覺得今日食少左 D 野!」
我:「食少左 D 咩呢?  大魚旦都食左幾串喇喎」
弟弟:「係生日蛋糕呀!  我今日生日未砌蛋糕呀!」
我:「臨時臨急, 去邊度搵個蛋糕呢?」
弟弟:「一陣我地返屋企早一個站落車, 去商場買咪得囉!」
我:「返到市區都 9:30 pm 啦, 商場關門了」
弟弟梗係唔知我一早已經裡應外合安排左個蛋糕放入雪櫃啦!  於是弟弟返到屋企好驚喜 :DDDDD

屎屎蛋糕, 襯晒你呀小明 B ^^

We love you so much!  Happy 9th Birthday my lovely boy ^8^

Happy Nine~  繼續做好孩子, 越來越多人錫你!

hApPy bIrThDay!!!