廁所漏水, 已經困擾左我地好耐, 唔係幅牆剝落到一個頂唔順既地步, 我地真係唔想攪, 整廁所同整廚房好貴架麻! 機緣巧合之下朋友介紹左個師傅俾我地, 一睇就話係坐廁咸水喉生鏽硬化漏水, 要拆個坐廁出黎先睇到個漏水範圍, 如果裂到去外牆就要買第三保搭棚架拆牆黎維修咁就會大劑好多! 不過要 check 先知, 另外我地個廁所地台唔平, 渠口位更加凹陷去唔到水, 所以漏出黎既咸水就積住滲入晒地下 d 磚再滲埋出牆導致甩灰, 再加上浴缸邊 d 白英泥開始硬化龜裂, 有一條 3mm 既裂縫遲早又會再積水... 咁多問題都係要面對, 一不做二不休, 我地就黎個大裝修啦!
工程預計要一個星期, 星期五係 Day 1, 未開工前我已經同左師傅講屋企有個好細既 BB 會唔會有大影響要搬走佢呢? 師傅話只係有少少嘈, 落街行個圈就 ok, 仲話我地唔駛請假有咩電話聯絡, 雖然佢咁答但我唔放心, 秋秋都話佢請假係屋企監工, 男人對男人好 d, 於是 10:00 am, 一行 3 個男人殺上黎, 非常有效率地將我全屋既地板用膠墊舖好, 又用黑膠袋 cover 全屋傢俬, 咁大陣象都唔慌好野, 果然, 師傅話今日拆廁所, 拆浴缸, 拆牆磚, 拆地磚, 會沙塵滾滾同埋一直去到 6:00 pm 收工都會好嘈 @.@
下?!! 之前都唔係咁講既? 又話落街行個圈 ok?!? 秋秋都叫我放下晝假接走弟弟, 冇可能留係屋企, 佢而家已經落左樓下商場飲奶瞓覺, 做左 1 個半鐘街童架勒陰公! 咁仲有小慈呢? 於是打返學校同老師講小慈食完飯就走, 我冇理由接完弟弟去嫲嫲度又返轉頭接小慈放學, 梗係一車過啦, 秋秋要留守係屋企所以今日我要做司機! 我有 d 嬲個師傅攞, 明明問左你又話唔駛, 一早講我可以安排得好 d, 唔駛而家好似倒瀉籮蟹走難咁走, 哼!
12:30 pm 接小慈放學, 小慈好 high, 佢最開心就係我接佢放學架啦! 係學校門口等緊小慈出黎之際, 我裝到其他小朋友預備上床訓覺, 一張張細床仔並排, 一個小朋友瞓左邊, 一個小朋友瞓右邊咁, 個個自動自覺除風褸, 除鞋仔, 有辮除辮仲自己蓋被, 好得意呀! 近門口既小朋友見我裝裝下仲識叫我做 "恩慈媽咪"! 咁醒目既佢地?!! 冇幾耐就聽到 Bye Bye 郭恩慈之聲此起彼落, 小慈係學校都好受歡迎 ^^ 班主任郭老師拖小慈出黎同我講小慈好犀利, 話佢將小慈要早放學既原因講俾佢聽之後, 小慈用自己既理解講番俾其他小朋友聽, 佢係咁講既:
小慈: "我要走喇~~ 我屋企廁所壞左, 好多塵呀, 所以我要去嫲嫲屋企, 嫲嫲屋企冇塵好乾淨!"
同學仔: "你要唔要搭車架?"
小慈: "係 606 黎架!" (606 係嫲嫲既門號)
同學仔: "我係問你駛唔駛搭車喎?"
小慈: "啊~~ 都可以既...."
我一路聽, 郭老師同我都笑到碌地 :) 郭老師話小慈既理解能力真係好強, 表達又清楚, 佢係好短時間之內只係講左 1 次俾小慈聽佢就明晒, 好好呀! 平時郭老師都好鍾意同小慈傾計, 而小慈又好樂意將佢既野講俾人知, 所以老師對我地屋企都有好深切既了解.... 好在我地屋企冇咩唔見得光姐!
返到屋企, 小慈見到咁多黑色膠袋廁所又亂晒, 即刻同我講:
"真係喎, 廁所壞左喎! 入面冇晒野既? 黑蚊蚊 d 野好臭呀, 快 d 走喇媽媽~~"
於是, 抱住弟弟拖住小慈, 工人姐姐同我一人揹一個背囊, 再加多一個大膠袋裝住兩個 b 沖涼用既衫褲鞋襪, 毛巾洗頭水, 玩具, bb vcd... 一行 4 人逃亡去嫲嫲屋企! 小慈係車度瞓左 10 分鐘就唔肯再瞓, 監佢再係嫲嫲屋企瞓時就碌成半個幾鐘都瞓唔著, 我估佢心情太興奮! 反而弟弟食飽粥仔都肯瞓一陣! 兩姊弟有蝦餅食, 有 BB TV 睇開心晒
為食弟弟偷食冇抹嘴
嫲嫲屋企冇咩細藝, 睇電視都唔睇得咁多, 於是等弟弟瞓醒就出車去姑媽會所玩, 閒日既下晝真係好周圍冇咩人, 我都係第 1 次覺得會所又闊又大
面圓圓既弟弟係呢 d 圓形圖案入面, 特別可愛呀~
弟弟今日好開心爬得超快, 我教佢上樓梯玩滑梯同埋渣車, 佢好快學識仲玩到唔捨得走
小慈同昊昊就玩大型氣墊球, 兩個都玩得有板有眼
弟弟幫手做球證
足球機好好玩!
姑媽屋企呢個 balloon 真係犀利, 掛左幾個星期都冇漏氣, 勁!
借用埋昊昊個沖涼盤洗白白, 你睇弟弟仲有 d 肉地
6:00 pm 師傅們收工, 我地都可以返屋企了!
