與琳琳暢遊迪士尼

上次短聚唔夠皮, 今日既然大家都得閒就一齊去迪士尼, 天氣溫暖陽光普照最適宜戶外活動!  第一件事衝去玩水, 好在小慈同琳琳都玩得好斯文冇濕身

小慈今日呢一身打扮係唔係好有少女 feel 呢 ?!

今朝一早起身已經話要食棉花糖既小慈終於俾佢恨到!  棉花糖姐姐唔知係心情好定係見到小慈個為食樣忍唔住, 竟然捲左咁大個棉花糖俾小慈, 我唔話夠喇姐姐佢都唔打算停手!  個棉花糖大過小慈個頭成倍, 太誇張, 根本食唔晒~~

小慈第 1 次去泰山樹屋, 今日人少少天氣又好真係好舒服

未睇過呢套卡通片, 所以小慈唔知泰山係邊個

不過小慈好同情泰山既遭遇, 不停譴責咬死泰山爸爸媽媽既衰豹唔岩, 要打 999 報警拉隻豹坐監喎

我地今日係探險世界逗留左好耐, 小慈仲睇埋獅子王慶典, 不停話 d 姨姨叔叔唱歌好犀利, 好高音好好聽

兩個妹妹都好有自己意見, 一個話玩咖啡杯, 另一個又唔想玩, 不過佢地都好錫對方願意遷就

小慈睇過 1 次米奇幻想曲俾佢 d 超勁音響效果嚇怕左之後, 每次入 Disney 佢都話唔要戴眼鏡唔肯再入去玩, 連經過個門口都拉我快 d 走!  但今日當琳琳表示想睇呢個 3D Mickey 時, 小慈竟然話 "我都好勇敢同琳琳姐姐一齊去睇啦!" 

入場, 我已經好醒咁抱住小慈坐我大脾, 明知會好大聲既位我都事先塞住小慈對耳仔, 但當 d 公仔突然飛埋黎小慈眼前, 小慈都係會嚇到大叫同即刻縮埋一舊 @.@  小慈怕成咁都肯陪琳琳入去, 佢真係好錫琳琳姐姐啊~~

去完迪士尼食埋壽司先返屋企, 小慈近來都愛上左食壽司, 最鍾意食橙色一粒粒脆卜卜既蟹子, 不過佢食量唔多, 通常叫一個蟹子手卷俾佢, 食晒都已經飽飽!

食完飯去停車場攞車, 呢個停車場我都係第 1 次黎, 唔係好熟路樓底又矮燈光又唔足, 搵左好耐都搵唔到個繳費處, 一個女人拖住個女, 係一個陰陰森森冇咩人既停車場度亂行你都咪話唔驚!  就係呢個時候, 小慈竟然拖我再實 d, 用另一隻手摸我手背, 當我好似狗仔咁一下一下咁摸, 好溫柔同我講:

小慈: "媽媽, 唔駛驚架!  我會保護你架!  唔駛驚唔駛驚, 有我係度, 我會陪住你!"

呢個傻妹, 耐唔耐就會講出一 d 好窩心既說話, 都唔知點解佢會識講, 又用岩場合喎~~  

小慈, 你真係好得人鍾意 ^8^