踏入 4 月, 小慈一班青梅竹馬由細玩到大既好朋友陸陸續續都 4 歲大, 今日就參加靚女巧巧既生日會, 可惜要等弟弟上完幼潛先趕去生日會, 人地都開左一半差不多散 band, 不過有心唔怕遲, 好在都趕得切去切蛋糕, 巧巧今日化身 Minnie
祝巧巧越大越靚, 身體健康, 永遠係眾人心中既寵兒~
今日係幼潛第 3 堂, 攞正牌可以影相所以大影特影 :D
入課室至少繞場一周, 精力旺盛, 證實 pat pat 有釘經常走黎走去唔肯坐既小明
呢個遊戲我都覺得好好玩, 等我得閒整套俾兩姐弟係屋企玩先!
歷時半年有多, 上足 24 堂既 Music Wonderland 今日終於畢業! 好唔捨得 Miss 曾, 好唔捨得 Mega Box 咁好既環境! 升班上 Joiner Music Course (JMC) 要 88 堂, 為期 2 年, 為免舟車勞頓磨滅意志, 我地唔再揀番 Mega Box, 反而係近屋企既音樂中心, 仲揀平日既時間上堂, 一來平 D, 二來星期六日就可以多 d 時間做其他野! 今日係最後一堂了, 小慈係聽音, 唱音, 節奏感及音樂既欣賞力方面都進步左好多 ^^
後會有期~~
上次去洗牙, 醫生晴天 pig pig 咁同我講小慈右邊門牙既後面有 d 想蛀牙既傾向, 要我好小心處理之後, 我已經再帶佢睇另一個老資格 d 既牙醫諮詢, 結論係乳齒好快會換恆齒, 唔係蛀得太嚴重唔適宜補牙, 加上補門牙最容易甩, 睇下可以捱幾耐唔好攪佢住, 介紹左一隻特強 fluoride 既牙膏每晚臨訓前點係門牙上面, 盡量幫下佢咁
好費解, 小慈好少食糖飲果汁汽水, 每次食完野都有飲水, 早晚有擦牙, 冇食手指, 冇食奶嘴, 冇含住奶訓覺.... 點解會蛀牙架?!!! 點知牙醫問左我一句: "小慈係唔係擘大口瞓覺?"
係呀, 擘大口瞓覺都會蛀牙???? 聽完真係想死! 牙醫話口水有保護牙齒既作用, 擘大口會口乾, 口乾就會有細菌, 有細菌就會蛀..... 咁即是死症? 我點控制小慈半夜瞓覺唔擘大口先得架? 佢又唔係鼻塞抖唔到氣要靠口抖氣個隻喎, 只係肌肉放鬆左唔合埋口瞓覺.....
唉~~ 捱左半年, 睇住小慈隻門牙越黎越薄, 最近仲有崩牙既跡象!! 即刻 book 牙醫幫佢 urgent consult 一下!! urgent 到今日學都唔返咁帶小慈睇牙醫, 牙醫真係話嚴重左, 見小慈咁乖應該坐得定, 二話不說就幫佢補牙!
補牙既過程都好複雜, 先要洗乾淨隻牙, 搽一層紫色既液體我估係消毒液, 用鑽鑽穿隻爛牙, 沖洗, 搽膠水, 補瓷粉, 用風筒吹乾.... 小慈好驚, 全程拖住我不過冇喊! 最驚係牙醫用黎吸口水個條膠管, 一吸小慈就合埋口, 緊張到咬住牙醫隻手指!! 但牙醫一叫佢就放口, 擘大個口成 10 分鐘小慈都算係咁, 現今科技倡明我真係睇唔出兩隻牙有咩唔同, 好厲害呀醫生! 不過始終係治標唔治本, 小慈隻補牙隨時都會甩, 一甩又要返黎補 @.@ 牙醫都話冇咩可以做架勒, 今日唔好食咖哩因為隻牙會上色咁話! 真係識講笑, 不過我笑唔出.....
弟弟已經罷奶 1 星期, 真係唔飲就唔飲, 有時朝早工人姐姐趁佢岩岩瞓醒矇矇地會質支奶俾佢, 不過佢都係飲 1-2 安就推開奶樽, 一醒左就悉穿我地既奸計, 我地都唔弱, 會將支飲剩既奶加 d 麥皮咁餵佢佢又食喎, 好離奇!!
唔飲奶就唯有餵多幾餐粥仔呀, 飯仔呀, 食下麵包咁, 餵幾多餐弟弟都肯食, 真係淨係唔肯飲奶! 不過呢幾日見佢心情都好左好多, 上顎兩隻大牙都爆左出黎喇! 而家總共見到 11 隻!!
弟弟 d 牙仔全部都好大隻, 只係剩番下顎隻大牙未爆出, 谷埋呢隻應該肯飲番奶奶喇掛? 呢幾日放假對住佢, 弟弟變左小慈 2 號, 超級痴媽 B, 我行去邊佢就跟我去邊! 我同小慈玩緊, 佢都會無端端黐埋黎係都要坐我大脾, 當左我大脾係佢既私家梳化, 坐坐下又無端端擰轉頭用手指指住我叫:
"媽媽~~"
係呀, 而家終於知道我係媽媽喇! 又成日都追打小慈, 只要小慈矮過佢 (例如 dup 低頭 or 瞓左係梳化時), 佢就好似好順手咁一手拍落小慈個頭度, 力度唔算好大, 不過都足以令到小慈大呼小叫!!! 咁我當然係即刻斥責弟弟既所作所為啦, 教佢摸小慈家姐, 錫番小慈先! 弟弟都會照做, 錫完小慈仲會走黎錫埋我, 好似知我勞氣咁, 真係嬲佢唔落 :DDDD
捕捉左好耐, 今晚終於俾我影到佢好 man 咁 say no 喇! 去片~~
小慈: "媽媽, 今日駛唔駛返學呀?"
我: "唔駛呀, 放復活節假丫麻"
小慈: "耶穌俾人釘十字架呀!"
小慈兩隻食指做出十字架模樣, 唱:
"主被人釘十架, 釘十架, 釘十架~~ 主被人釘十架, 是~~ 是~~ 是~~"
我: "係呀! 主耶穌被釘十字架受傷流血呀!" (非常驚喜, 冇諗過小慈會識!)
小慈: "主耶穌佢死左呀!"
我: "係呀, 釘十架流左好多血, 係死左呀!" (暗暗佩服, 連死左都知)
小慈: "不過唔駛驚, 主耶穌佢會復活架! 猶大好曳佢出賣耶穌呀!"
小慈又唱:
"主耶穌已復活, 主復活, 主復活~~ 主耶穌已復活, 是~~ 是~~ 是~~"
小慈, 你真係好叻呀!
上堂咁專心, 老師教咩你都記得, 福音已植根在你心裡, 媽媽好開心!
好多朋友都介紹馬鞍山公園又大又好玩, 今日係兒童節, 天陰陰界乎落雨與未落出之間, 涼涼地都幾舒服, 就同兩個寶貝行下公園, 搭馬鐵幾個站就到, 穿過商場就係公園, 係門口已經聞到花香仲見到蜜蜂採花蜜, 小慈小明好興奮!!
簡單又開心的一天!
幼兒潛能訓練課程第 2 期上星期已經開班, 但因為幼兒學校大裝修, 於是要移私去職業訓練中心上堂, 環境當然冇幼兒學校咁好啦, 不過導師都係張姨姨同埋 Gi Gi 姐姐, 上堂時間改為 12:30 pm, 我已經監弟弟瞓醒一覺先黎, 時間 perfect! 今次有一半新同學, 一半舊同學, 大家都好乖, 係得弟弟瞓醒覺精力充沛完全唔肯坐定定 @.@
遊戲 1 -- 唱午安歌
歌詞配合動作教小朋友點頭及手指指, 促進身體協調及平衡力, 過度興奮既弟弟誓不低頭, 一聽到首歌唱完就舉手大叫 "YEAH~~~~" 真係俾佢笑死 :DD
遊戲 2 -- 疊大杯疊細杯
請小朋友將一套 3-5 個既細杯杯套入大杯杯裡面, 發展大小概念
遊戲 3 -- 大肌肉遊戲
請小朋友雙手 or 單手羅住紙盒, 踏上一級大積木再落番黎, 將紙盒運去終點疊高
第二堂
遊戲 1 -- 扭樽蓋
先用玩具螺絲學習扭一下放手再扭一下, 再俾大膠樽佢地扭樽蓋, 成功後俾個再細 d 既樽如洗頭水試用裝佢地扭, 扭開樽蓋內藏小珠, 請小朋友放入樽內, 弟弟好有心機放珠仔
遊戲 2 -- 玩粟粉
冇錯, 係用屋企既鷹粟粉開水煮滾再放暖咁俾小朋友摸, 俾佢地嘗試接觸唔同既質感, 感受下滑嘟嘟, 黐笠笠既感覺, 冇時間整粟粉可以俾 d 煮左既意粉 / 通心粉都得, 有時出街又可以就地取材俾 d 冰佢地玩下, 感受下冷熱都係幾好既感官刺激! 初初玩都仲 ok, 不過一掂到 d 粟粉就即刻抹番落自己條褲, 攪到我要捉住佢 @.@
遊戲 3 -- 障礙賽
請小朋友嘗試慢慢跨越離地 1 吋既欄杆, 再經過不同質感既地墊如地毯 / 木板 / 軟膠
張姨姨話小朋友學識行 4 個月就會識提起腳跨過障礙物, 話口未完弟弟已經跨過左, 嚇親張姨姨呢! 估唔到弟弟係全班最遲一個識行, 而家竟然係最早既一個識得提腿 ^^
1 歲 4 個月既弟弟又有進步 ^^
- 每朝 7:30am 飲完支奶就會 "媽媽媽媽" 咁叫住推門入黎搵我, 準過鬧鐘!
- 分得開爸爸媽媽, 不過好有性格地, 我叫佢叫媽媽係唔睬我, 睇圖書見到貝兒就叫佢做呀媽 @.@
- 學識 Knock Knock 敲門
- 聽到我講 "走喇" 自己會去鞋架攞鞋仔示意我幫佢著, 跟住去拉大門個門柄
- 由廳去房 or 由房出廳, 弟弟都會好有交帶咁同我地講 Bye Bye 先會行
- 睇到我訓話小慈時會好緊張雙手抽住自己肚腩 d 衫, 神色凝重咁聽埋一份
- 見到小慈喊會用手摸小慈個頭表示安慰 (超乖)
- 自己喊係會擘大個口靜音 5-8 秒, 谷到塊面紅晒嘴唇變紫色咁先喊出聲 @.@
- 講 "No" 時係好重語氣同埋好用力咁 fing 頭, 爸爸話好 man 呀!
- 鍾意玩公仔, 跌左公仔落地會錫番佢地仲會攬住搖搖下咁噯佢地
- 想要一樣野會指住, 然後嘰哩咕嚕七情上面咁示意想要, 再拉人去幫佢
- 可以坐定定玩半個鐘以上玩具, 最鍾意玩 Pooh 茶煲 / Elmo 醫生玩具 / 木砌火車
- 認得 Winnie the Pooh 識講 "Pooh Pooh", Piglet 就叫做 "Pig"
- 認得及識講 back pack, Minnie, (ba)nana, Papa (Jelly)
- 識講 Up & Down, bath, 抱抱, 爬, 抹抹抹 (嘴), Oh No, 唉呀~~
- 一首歌聽完係會大叫 "Yeah~~~~"
- 玩完豬仔車 / 搖小馬 要落地時, 會伸隻手出黎好似老佛爺咁要人參扶 :DDDD
小慈: "弟弟好傻架, 咩野見到成日都笑~~"
無錯, 弟弟係真係成日都笑, 令到望住佢既人都會笑埋一份, 個個四萬咁口 ^^
千呼萬喚等到頸都長, 小明既靚靚 studio 相簿出世!!!
We Love You So Much, Young Man!!!
