今日帶左兩隻豬仔去我一個同事既屋企, 估唔到大家見到小明以為係小慈, 話佢實在太似女仔 :DDD 去 club house 踏場
有 BB 車賽道
人造草地
都係鍾意呢埋
兒童健身室
令到我兩個寶貝笑唔停既, 就係呢個彈床, 笑到卡卡聲, 好玩好玩!
仲有豐富既晚餐供應
開心!
2010年5月16日 星期日
參加林氏兄弟生日會
期待左幾個月, 今日就係林氏兄弟生日會既大日子, 點解咁興奮? 因為林氏兄弟生日會係 GYM 入面舉行, 小慈 6 個月大時都有做 baby gym, 地方大又顏色豐富真係上得好開心, 只係到後來我想俾弟弟參加既時候, 沙田分店已經執左笠, 弟弟同佢有緣無份! 到達會場, 柏弦柏橋張 banner 好靚!
祝柏弦柏橋生日快樂, 身體健康, 聰明伶俐, 高大威猛
好似返 playgroup 咁, 先圍圈介紹自己再做 warm up exercise, 當 d 導師哥哥知道小明個英文名係 Young Man 時, 笑意盈盈咁話自己係 "old man" :DDD 熱身其中一個遊戲係請小朋友出去推郁一張好大好厚既墊褥再推跌埋個哥哥, 一隻二隻搗蛋小鬼開心到飛起! 連小明都偷偷地出去推左個哥哥 2 次
排隊做空中飛人
跑上斜坡再翻騰 180 度穿過呼拉圈
閃避巨型障礙物運送豆袋, 小慈個樣驚得黎好認真呀!
同壽星仔柏弦排排坐
每玩一個遊戲之前都要坐定定聽導師哥哥講解, 發現小慈既英文都唔錯, 唔駛我翻譯都知 d 哥哥講咩識跟住做! 我覺得呢個吊繩索好玩, 不過小慈有 d 驚只肯玩 1 次
弟弟都有份玩, 呢個千秋弟弟玩第 2 轉先識笑
遊戲就唔多岩弟弟玩, 佢又未識聽指示
周圍走都好開心因呢度色彩豐富真係好靚!
波波池幾時都受歡迎
小慈淹沒了
呢個動作 6 個月大時做過架
搴搴好大力
玩完一輛身水身汗, 係時候切蛋糕
埋黎喇喂~
生日蛋糕一出全場 "嘩~~~~" 左一聲, 好靚呀!! 靚到似公仔蛋糕 display 個隻! 所有小朋友都等住吹蠟燭, 詢眾要求點左 2 次
小明 B 與壽星小 B 柏橋合照
Bernard 好有大佬 feel 呀
同 Jackco 一齊玩
柏弦媽媽仲預備左好多好精美既小食, 真係又靚又好味
跑左個幾鐘既小明, 一口氣就飲晒成包 Qoo
分享爆谷
食飽飽玩親子遊戲一 -- 扯大攬, 真係 N 年都冇玩過
爸爸隊對小朋友隊, 大家都估到邊隊贏啦!
親子遊戲二 -- 彩虹傘
彩虹傘一出, 估唔到柏弦同小明最快爬左入去仲爭汽球玩, 真係笑死我呀!
小朋友係傘內大人係出面拉, 笑聲不絕
親子遊戲三 -- 雪球大戰
大家不停用波互掟, 小慈意猶未盡係咁追殺爸爸
派禮物時間, 柏弦爸爸媽媽好有心思每個小朋友都有禮物帶番屋企
小明好鍾意呢兩盒禮物唔肯放手, 非常寶貝去到邊都拎住
玩到唔捨得走, 太開心了!
多謝晒!! 出年又 encore ^^
幼潛第 2 期第 8 堂
今日少爺仔瞓晏左, 所以去到已經完左第一個遊戲 @.@
遊戲一 -- 講故事
故事內容最好配合道具, 如果有大象出現, 就預備大象公仔, 有車就預備玩具車咁引起動機及提高趣味性, 17-19 個月既小朋友理解能力有限, 故事內容只需要圍繞 Hello, Bye Bye, 早晨, 謝謝, 同埋人物名稱已經足夠, 之後就可以加入自理能力及生活經驗, 如貓貓鍾意飲奶奶, 大象幫老鼠梳頭等等, 至於耐性方面, 比較建議家長同小朋友對坐, 好過要小朋友坐大脾, 一來你睇唔到佢表情反應, 二來小朋友正常會爭住揭書, 掛住揭就睇唔到書入面既內容!
遊戲二 -- 拆禮物
用大張既白紙好似藥材舖執藥咁包住一粒星星餅請小朋友拆開, 訓練空間概念 (左揭右揭), 解難既能力同埋 "延遲滿足", 通常小朋友都好心急, 明知紙入面有食物就會好想快 d 有得食, 會遞俾你叫你幫佢 or 會發脾氣大叫! 拆禮物既過程就係訓練小朋友有耐性, 屋企有乾淨盒仔, 拉錬袋都可以做到同一效果
遊戲三 -- 障礙賽
請小朋友行梅花莊, 低頭穿過大呼拉圈, 訓練小朋友空間感, 學習低頭強壯後頸肌肉, 小明未掌握到點頭鞠躬呢 d 動作, 佢寧願爬都誓不低頭過呼拉圈呀, 衰仔!
平時上完幼潛多數會即刻車佢地兩個返屋企瞓晏覺既, 但今日要參加生日會就帶兩隻豬仔返學校飲茶, 影左幾張相我覺得好靚! 小慈有街去就開心
影到大口仔出左大牙未出犬齒, 好好笑
見唔見到個 8 啖蚊爛呀? 仲未好番呀陰公!
2010年5月12日 星期三
大力水手
買左件大力水手夾衣俾弟弟, 真係快高長大呀佢, size 90 都係 just fit 咋! 唔知夾衣同其他衫一唔一樣計法呢? 小慈由 3 歲到而家都係著緊 size 90 既衫咋喎, 女真係抵養!
弟弟係唔係好嬌俏呢?
今晚攞番 d 收埋左好耐既玩具出黎, 呢個其實係一個 3 合 1 既射波組合, 有足球 / 保齡球同手球玩, 只可惜我地想教弟弟玩既時候, 佢完全當左呢個係帳蓬, 成個人呢左入去
仲要不知幾自在完全唔打算出黎, 攪到小慈想玩都冇得玩, 就算用波掟佢, 弟弟都當我地同佢玩仲識得用個 cover 黎防禦, 吹到 bear bear 聲呀 @.@
最後用佢至愛既兩個足球先可以引蛇出洞, 都唔明 d BB 點解咁鍾意穿山洞!
本來今晚好開心, 不過俾我見到弟弟面上面有 2 粒大蚊爛!!! 跟住左手隔肋底再多 6 粒!!!!! 層層疊疊, 每粒都成個 1 毫子咁大, 我真係肉都赤埋, 嬲到我死!!!! @%&$%^$@
工人姐姐話係瞓晏覺時咬, 應該係同一隻蚊所為, 有咩理由開住風扇都吹唔走隻衰蚊架!! 激到我即刻開蚊機, 又倒左半支花露水去小慈小明 d 床舖被褥上面!!
夏天都未正式黎 d 蚊已經咁猖獗, 可能要買蚊脹俾弟弟瞓覺至得!
訂閱：
文章 (Atom)