遠近慈明: 小慈4歲

顯示具有 小慈4歲 標籤的文章。顯示所有文章

2010年10月16日星期六

迪士尼黑色世界

重陽節公眾假期, 難得小慈唔駛返體操班連兒童詩班都放假, 咁得閒梗係要搵 d 野攪! 問小慈想去邊度玩, 小慈答: "如果好天我地去迪士尼啦! 落雨我地就留係屋企好唔好呀?" 一言為定 ^^

落左幾日雨但小慈一 d 都唔擔心, 因為佢有祈禱天父會俾佢星期六好天! 又真係喎, 今日天氣報告話間中天晴, 太陽伯伯 long time no see 呀!! 不過等呢兩隻豬仔瞓醒晏覺, 入到迪士尼已經 3:30pm! 好在有全年通行証唔係實同佢搏老命咁玩 @.@ 今日抵玩架, 黑色世界 11:00 pm 先關門, 唔叉足電我怕小慈小明捱唔到咁夜!

泊車行入迪士尼門口呢段路我覺得好遠好辛苦, 都唔明點解唔可以前 d 落左客先呢?

好在兩姊弟而家曉行曉走唔駛我抱

小慈嫌弟弟行得慢要拖佢行快 d!! 小明真係好悠閒架, 一塊葉都能夠引起佢既興趣, 行下停下又摸下咁

See? 影緊相弟弟都可以望到天空有飛機! 小慈個樣好無奈.....

終於行到去噴水池, 仲有條大直路

入到樂園岩岩好可以睇巡遊, 兩父女席地而坐好攪笑

小明見到咁大隻 Mickey 好興奮

攪笑既 Flamingo

Woody and Jessie 出場弟弟大叫到我耳膜穿咁滯 @.@

黑色世界主題係萬惡之后黑巫婆, 周圍都係佢 d 同黨

樂園好多妖怪出沒, 小慈小明表示怕怕驚驚, 我地留係幻想世界玩

影張 3 個都望鏡頭係好高難度既

玩慣玩熟既我地完全知道行程點安排, 人多既樂園最好排隊睇表演, 而家三父子食住爆谷等睇米奇金像獎! 今次我地坐到第一行, 小慈小明睇得特別投入開心, 除左鐘樓陀俠, 連小明都識晒金像獎入面既迪士尼朋友, 高飛出場小明尖叫令到高飛即刻同佢揮手, 更加估唔到既係小明鍾意主持人 Bi Bi, 同我講 "Bi Bi 唱歌好好聽呀~~~" 爸爸話佢有眼光鍾意靚女 ^^ 小明唔怕大聲唔怕黑唔怕大公仔, 迪士尼真係好岩佢架!

小慈好唔想睇夜光鬼魅巡遊因為好驚妖怪, 但我好想睇, 於是叫小慈呢埋係爸爸度唔想睇就合埋眼睛, 小慈果然呢到米妮出場教跳舞先開番眼睇, 有冇咁驚呢?! @.@

同舊年一樣, 南瓜王阿積率領一班妖怪出黎攪鬼! 我地專登係明日世界門口睇巡遊, 巡遊一完就跑去玩巴斯光年, 真係冇人排隊, 到我地玩完出黎條隊已經要排 30 分鐘了, yeah

小明今日做左明星!!! 佢去到邊度都聽到有人話:

"呢個靚仔好過癮呀!" "好得意呀!"

成班大人圍住同佢玩, 又用相機追住影佢相, 連 mean 左好多既迪士尼員工都主動俾貼紙佢!! 唔知係唔係弟弟件夾衣著得佢好睇所以 d 人咁瘋狂呢?

細細個就引埋晒 d 狂風浪蝶, 年齡由 16-36 歲不等, 男女通殺但 90% 係女性....

2010年10月15日星期五

小慈趣聞

我係屋企同老公傾偈講笑講左句普通話, 小慈聽到竟然搭訕:

"媽媽你做咩講普通話呀? 你係普通人黎既咩?"

************

同小慈玩猜包剪鎚, 幾次都係我出包佢又出包, 我出剪佢又出剪, 於是小慈話:

"媽媽, 我出剪你要出包先岩架麻, 你都唔識玩既!"

***********

小慈近來好鍾意坐車頭, 指住冷氣制問爸爸咩黎之後, 小慈話:

"紅色係熱 d 藍色係凍 d 呀? 我好鍾意凍架, 不過我唔會攪既 (指個制), 冷氣太凍會好易病架麻!"

**********

呢幾日天氣涼屋企開窗開風扇, 點知一開窗弟弟又俾蚊咬對腳又一達達, 小慈見到就話:

" D 蚊真係好鍾意咬弟弟喎! D 蚊都鍾意咬我架, 我咁香又得意梗係鍾意咬我啦! 天氣凍就冇蚊架喇, 係唔係呀媽媽?"

*********

著鞋準備返學, 小慈著完鞋之後個樣怪怪地話:

"隻鞋入面有 D 野硬硬地呀!"

於是我叫佢倒出黎睇下, 噹朗一聲跌左個一蚊出黎!! @.@ 小慈雙眼反白即刻大叫:

"弟弟!!!"

呢單野原來係弟弟做既!! 繼上次放車厘子入保嬰丹盒後今次又一新傑作 -- 塞錢入你鞋 XDDDD

********

小慈學校黎左兩個新同學, 係孖仔黎既, 一個叫鐵棟, 一個叫鐵樑, 我問小慈識唔識分佢地兩個呀? 小慈話:

"佢地兩個真係一模一樣樣架! 郭老師同陳老師都唔識分, 佢地自己都唔知自己叫咩名呀! 可能要叫佢地媽媽黎先得呀!"

*********

自從上次俾小慈試用較剪, 點知佢剪左一陣手指就起水泡! 之後我就好少俾佢玩~

開家長會, 郭老師話小慈用較剪冇信心, 於是我又俾番多 d 機會佢試, 通告呀, 回條呀, 一張半張紙都會叫佢幫手剪, 而家話自己好大個, 樣樣都要自己做既小慈, 我都提左佢要有大人陪住先可以攞較剪啦, 容咩易係屋企自己攞黎玩, 弟弟學佢咪大獲?!!

尋日放學小慈好緊張咁同我講:

"羅晉城好曳呀! 佢用較剪剪自己 d 頭髮, 又剪爛左 d 衫, 張老師好嬲咁鬧佢要坐埋一邊冇得上堂, 仲唔俾佢放學添呀!!! 較剪好危險架麻, 唔可以自己攞黎剪自己架麻, 係唔係呀, 媽媽?"

小慈既童言童語真係好可愛, 有時聽到真係笑爆嘴 :DDDD

出街食壽司就最開心

自拍中

近來弟弟都好鍾意坐 high chair, 可以坐定定 1 個鐘頭以上, 坐靚靚慢慢食, 好識嘆~

今晚食左 PUFF, 枝豆, 燉蛋 & 2 件三文魚子壽司, 對於已經飲左奶奶先出街既佢真係都算多! 個樣滋味到連手指都 lam 埋

開心~

2010年10月10日星期日

恆叔叔新居

老公有兩個好兄弟 Tony and 阿恆, Tony & Wing 遲我地半年結婚, 有個女心語細小明一個月, 而家又陀緊另一位千金出年 2 月出世; 恆 & Irene 就今年 6 月新婚, 而家先至得閒招呼我地上佢地新屋玩, 好兄弟如今都各有家庭, 今日 10 年 10 月 10 日十下十下難得一聚 ^^

小慈非常專心睇緊恆叔叔結婚影帶, 不停叫: "爸爸係入面呀!! 呢個係你黎架!!" 超攪笑

三個小朋友一齊玩, 小慈係大家姐, 佢做咩小明心語即刻跟住做

小明 natural high 簡直係賓至如歸, 係恆叔叔屋企跳梳化

又打關斗

仲用窗簾布玩 pee-ka-bo

興之所致走去咀心語妹妹, Tony 叔叔眼都凸埋!

落街玩, 小慈問我: "點解架車唔郁既? 係唔係要入錢架? 我地有冇錢呀?"

我望住佢唔出聲擰擰頭示意唔會入錢, 小慈又冇咩喎

呢架係兩座位私家跑車, 小明你逼唔入架喇~~

Tony 叔叔見有 3 個小朋友咁抵玩, 即刻入左 $10, 馬仔曉行喇~~

開心到小慈不停咁笑

小明就好緊張唔知發生咩事

咁活躍既小朋友希望唔好嚇親恆叔叔 & Irene 姨姨, 快 D 添番個啦!

10 年

今日心血來潮想記錄番自己係呢 10 個特別既日子做緊咩野, 真係唔睇番都唔記得!!

十年來, 我由一個單身女子變身人妻再成為人母, 由無家可歸到擁有一個一家四口既屋企, 我既所有係神賜俾我既, 不論環境順逆你永遠都係我身邊作我隨時既幫助, 天父我感謝你 ^8^

01 年 1 月 1 日 (星期一)

屋企已經唔再係我既屋企, 適逢秋家姐出嫁, 秋媽好心收留我寄宿, 今日留係呢個新屋企, 倒數, 對我黎講係一個新既開始~~

02 年 2 月 2 日 (星期六)

非常幸運終於買到一間屬於我同秋秋既屋企, 養左 5 年既龍貓仔仔唔知係唔係唔適應新居突然玩絕食, 今朝抱佢去做磨牙手術, 姑娘要我簽生死狀又要我返屋企等消息, 我好擔心打電話俾秋秋, 聽到佢 "喂" 一聲我已經喊到收唔到聲, 喊到對眼腫晒差 d 睇唔到路行返屋企........v_v 之後手術雖然成功, 不過一日間急轉直下, 仔仔終於離開左我地.....

03 年 3 月 3 日 (星期一)

公司突然要安排一個過百人與會既反對合併大會, 做到倒瀉籮蟹!! 放工煲啖靚既椰子雞湯氹下自己

04 年 4 月 4 日 (星期日)

今日係我同秋秋日本東京大阪 7 天 Honeymoon 團既 Day 3, 結婚已經 9 個月先有時間去渡蜜月, 落住雨去清水寺睇櫻花, so sweet ^^

05 年 5 月 5 日 (星期四)

今日渣車返工學繁忙時間 cut 線入隧道, 行下又停下, 俾少少油向前行兩步仲要防人插隊都真係幾高深既學問, lunch time 走左去捐血, 已經肥左既我都仲係捐得 350ml 咋 >.< 3 年冇捐過, 今日填埋捐骨髓

06 年 6 月 6 日 (星期二)

小慈一個半月大, 重 10 磅, 望住面圓圓既佢肉仔實的的, 五官好精緻眼仔碌碌成日望住你笑微微, 又識用手摸你塊面真係冰山都溶!!

07 年 7 月 7 日 (星期六)

香港回歸十年, 小慈都 1歲 2 個月大了, 今日心情超靚, 叫佢表演舉手點名, 點虫虫, where is your teeth 等聽指示做動作, 又肯分享俾人玩, 玩完又肯收拾放入玩具箱, 最後仲表演瑜珈引體上升放腳上頭, 笑到全家碌晒地 XD

08 年 8 月 8 日 (星期五)

今日係我同秋秋拍拖 15 年既大日子 ^^ 我識左秋秋 15 年, 結婚 5 周年, 小慈 2 歲 3 個月大, 腹大便便仲陀住弟弟 5 個月, 太值得紀念!! 去左 YAMM 食 buffet, 正呀!