10 年

今日心血來潮想記錄番自己係呢 10 個特別既日子做緊咩野, 真係唔睇番都唔記得!!

十年來, 我由一個單身女子變身人妻再成為人母, 由無家可歸到擁有一個一家四口既屋企, 我既所有係神賜俾我既, 不論環境順逆你永遠都係我身邊作我隨時既幫助, 天父我感謝你  ^8^

01 年 1 月 1 日 (星期一) 

屋企已經唔再係我既屋企, 適逢秋家姐出嫁, 秋媽好心收留我寄宿, 今日留係呢個新屋企, 倒數, 對我黎講係一個新既開始~~

02 年 2 月 2 日 (星期六)

非常幸運終於買到一間屬於我同秋秋既屋企, 養左 5 年既龍貓仔仔唔知係唔係唔適應新居突然玩絕食, 今朝抱佢去做磨牙手術, 姑娘要我簽生死狀又要我返屋企等消息, 我好擔心打電話俾秋秋, 聽到佢 "喂" 一聲我已經喊到收唔到聲, 喊到對眼腫晒差 d 睇唔到路行返屋企........v_v   之後手術雖然成功, 不過一日間急轉直下, 仔仔終於離開左我地.....

03 年 3 月 3 日 (星期一)

公司突然要安排一個過百人與會既反對合併大會, 做到倒瀉籮蟹!!  放工煲啖靚既椰子雞湯氹下自己

04 年 4 月 4 日 (星期日)

今日係我同秋秋日本東京大阪 7 天 Honeymoon 團既 Day 3, 結婚已經 9 個月先有時間去渡蜜月, 落住雨去清水寺睇櫻花, so sweet ^^

05 年 5 月 5 日 (星期四)

今日渣車返工學繁忙時間 cut 線入隧道, 行下又停下, 俾少少油向前行兩步仲要防人插隊都真係幾高深既學問, lunch time 走左去捐血, 已經肥左既我都仲係捐得 350ml 咋  >.<    3 年冇捐過, 今日填埋捐骨髓

06 年 6 月 6 日 (星期二)

小慈一個半月大, 重 10 磅, 望住面圓圓既佢肉仔實的的, 五官好精緻眼仔碌碌成日望住你笑微微, 又識用手摸你塊面真係冰山都溶!!  

07 年 7 月 7 日 (星期六)

香港回歸十年, 小慈都 1歲 2 個月大了, 今日心情超靚, 叫佢表演舉手點名, 點虫虫, where is your teeth 等聽指示做動作, 又肯分享俾人玩, 玩完又肯收拾放入玩具箱, 最後仲表演瑜珈引體上升放腳上頭, 笑到全家碌晒地 XD

08 年 8 月 8 日 (星期五)

今日係我同秋秋拍拖 15 年既大日子 ^^  我識左秋秋 15 年, 結婚 5 周年, 小慈 2 歲 3 個月大, 腹大便便仲陀住弟弟 5 個月, 太值得紀念!!  去左 YAMM 食 buffet, 正呀!

09 年 9 月 9 日 (星期三)

今朝帶小慈返學時俾佢一句: " 錫番你啦~~ 我好錫你架, 媽媽!  我好鍾意你架"  

氹到我全日都笑微微 ^^  3 歲 4 個月既小慈真係好識講野, 自從小明弟弟出世之後, 佢都好知道點樣取悅我同秋秋, 乖女!

10 年 10 月 10 日 (星期日)

雖然今日全日都天陰有雨, 但無阻我地一家一齊返教會!!  小慈係天台參加兒童祟拜, 秋秋係地下大堂參加主日祟拜, 我同弟弟係地庫嬰兒室玩玩具睇祟拜直播, 希望弟弟快 d 足 3 歲就可以同小慈一齊崇拜, 而我同秋秋又可以一齊, 一家四口同心敬拜讚美天父 :)

揹個心水背囊返教會, 幾型仔!

每一步與主同行 ^^