弟弟明明 7:15 am 起左身, 飲完支奶無端端 9:30 am 就扭計想瞓, 放佢落床仔真係瞓著左! 為左想佢瞓耐 d 上堂有好表現, 我地真係由佢瞓到遲到上堂都在所不惜! 果然不負眾望, 弟弟今日上堂好開心咩都肯做, 只係因為遲左上堂冇唱歡迎歌, 一去到未 warm up 唔俾我坐低, 好在抱佢企一陣望下就 ok 番, 乖呀弟弟!
遊戲一 -- 扯髮圈 / 除襪仔
要小朋友左手除右腳襪仔, 右手除左腳襪仔, 交差雙手訓練手腳協調, 如果未識除襪就可以用髮圈橡筋 cool 住佢手腳, 佢唔鍾意有野縛住就一定會扯走咁就會好快學識, 之後先教佢攝 2 隻手指仔去襪頭學除襪. 弟弟 2 樣都 ok
遊戲二 -- 用小叉叉食物教小朋友用兒童膠叉叉蛋糕仔放入口訓練手眼協調及生活技能, 弟弟做得好好, 不過因為佢岩岩飲完奶食唔落就將所有叉到既蛋糕全數餵晒俾我食, 知道我未食早餐幾益媽媽我呀
遊戲三 -- 認識物件既用途
一個籃入面有毛巾 / 梳 / 杯 / 碗 / 碟 / 匙羹 / 叉 / 玩具食物 / 牙刷等, 再加一個公仔咁教小朋友幫公仔梳頭 / 餵佢飲水 / 用毛巾同佢抹面等, 教佢認識物件既用途有基本概念, 一般用番小朋友自己熟識既物件成功率會較高既, 例如用番佢自己個杯, 自己既碗碟會更易明白同埋專心, 唔會當成新玩具咁太好奇掛住玩, 弟弟就係掛住玩個個! 佢仲將自己籃入面既玩具派晒俾其他小朋友, 太開心周圍爬我都冇阻止佢, 一早就識電話就放係耳仔聽, 俾梳佢就會放上頭梳, 俾匙佢會擘大口, 我而家仲教緊佢 "飲杯" 添, 希望佢快 d 學識! 弟弟今堂表現 100 分!! 連張姨姨同 Gi Gi 姐姐都讚佢瞓醒確係唔同晒, 好乖呀!
星期日法例規定唔俾開工, 於是師傅們休息一天, 不過我地屋企依然七國咁亂, 成間屋白茫茫一片, 廳既一部份地方又俾師傅放工具嚴禁弟弟行近一步, 地下又污污漕漕咁連爬都唔想佢爬... 此地不宜久留唯有出街! 有邊度可以逗留一日又開心既呢? 梗係非迪士尼莫屬啦 :)
同弟弟上完幼潛就出發去迪士尼, 雖然今日係星期日不過樂園都唔算太多人, 天陰陰又唔係太凍好舒服! 去到睇完 High School Musical 小慈就要去泰山樹屋, 佢好掛住隻豹想聽佢叫, 弟弟就對隻小象好有興趣, 教識佢大笨象 "嗚~~~" 咁叫一去到就 "嗚" 俾我聽 ^^
自從小慈係迪士尼睇過獅子王慶典之後已經唔太抗拒睇獅子王 DVD, 之前因為個故事都幾深, 小慈分辨唔到邊個係辛巴, 邊個係辛巴個爸爸, 佢以為長大左既辛巴就係辛巴既爸爸木法沙攪到亂晒! 不過講解完都明白, 見到辛巴個好朋友娜娜都長大左, 小慈指住娜娜話:
小慈: "佢變左媽媽喇~~"
爸爸: "係大個左個樣似媽媽, 咁小慈大個左似邊個呀?"
小慈: "我梗係似媽媽啦!"
爸爸: "咁弟弟大個左似邊個呀?"
小慈: "弟弟咪似爸爸羅~~ 傻豬!"
小慈真係講得好好笑! 佢呢個主觀意願唔知會唔會實現呢? 有 d 朋友話小慈似我, 有 d 又話弟弟似我, 一時一樣未揭盅呢!
沒有留言:
張貼留言