幼潛第 7 堂

今日幼潛弟弟好乖, 乖左大半堂, 因為.... 佢瞓左

本來係屋企仲精精靈靈, 今朝成 8:00 am 先起身諗住 good timing, 點知一上車就瞓左, 仲要整極都整唔醒, 冇辦法啦, 都要照去, 唯有抱住佢入班房睇人地玩

遊戲一 -- 套圈圈

將一套 5-7 個既層層疊圈圈請小朋友套返入支軸度, 由初時係地下放, 到後來由張姨姨手握個軸請小朋友打橫套圈圈, 跟住玩障礙賽將所有圈圈放係個籃度, 請小朋友踎低羅一個圈再行左邊 or 行右邊咁去張姨姨度套圈圈, 呢一班既小朋友大部份都識行, 有 d 仲好醒添!

遊戲二 -- 梅花莊 & 踏唔同質感既地墊

將大積木每個相隔一寸放地下, 請小朋友小心踏過, 發展空間概念,  空地就放 d 唔同質地既地墊, 有硬, 有軟, 有毛毛, 有地毯等等.... 好玩啊!!  點解咁嘈弟弟都可以瞓到咁霖既呢?  小慈見到 d 小朋友行得咁開心佢都入黎玩埋一份

遊戲三 -- 彩虹傘

呢個好玩呀!!  好想弟弟快 d 起身!  咁岩小慈埋黎同我講野, 弟弟一聽到小慈把聲就醒左 (非常奇怪個班房咁嘈都唔醒, 小慈一講野就即刻彈起, 弟弟對小慈既聲音真係好敏感 )  弟弟瞓醒仲係呆呆地, 不過一見到塊彩虹傘就好興奮, 張姨姨仲將 d 波放係彩虹傘上面碌增加視覺刺激, 又將彩虹傘抽高將 d 波波放中間引小朋友入去, 弟弟仲二話不說 自己行左 5 -6 步入去!!  

岩岩瞓醒既弟弟 warm up 完就落堂, 非常依依不捨, 人地收埋 d 玩具佢就走去攞番出黎要再玩, 唱完 bye bye 歌都仲唔肯走, 見佢咁, 我就請張姨姨俾番 d 地墊佢踏, 小明踏到 d 吉腳既就即刻眉頭皺, 要佢再踏仲即刻縮腳添!  真係唔笨呀!  

弟弟勇於嘗試, 咁多塊地墊都踏晒, 已經大膽過當年小慈架勒!