今朝未夠 7:00 am, 秋秋靜悄悄返左黎喇!! 一家大細都仲瞓緊, 攪到佢好似做賊咁躡手躡腳呢入房 XD
好慘呀佢, 搭左 16 個鐘頭飛機, 1 分鐘都瞓唔到真係眼光光, 所以一爬上自己張床唔夠 5 秒就瞓著, 陰公~~ 不過佢都唔瞓得耐, 小慈一起身見到咁大個行李箱係廳已經知道爸爸返左黎! 佢呢個星期差不多隔日就問我一次 "點解爸爸去旅行去咁耐都未返?" 又成日都要我打電話俾爸爸, 佢要聽爸爸把聲, 太掛住太掛住!
知道爸爸係房瞓緊, 佢都生性, 忍左 2 個鐘跟埋工人姐姐去完街市返屋企, 感覺上已經俾爸爸瞓左好耐好耐, 先入房爬上床騎住爸爸.....
小慈: "爸爸, 我好掛住你呀, 你咁遲先返黎架, 我等左你好耐喇!! 你搭飛機有冇驚呀? 有冇行雷閃電呀? 你係咪好攰呀? 我陪你瞓一陣啦, 好唔好?"
跟住真係去攞枕頭, 攞床墊, 又去攞公仔咁陪爸爸瞓一陣, 瞓到聽到我同弟弟打完針返黎先出房門, 秋秋都已經完全醒晒
弟弟一見到爸爸, 竟然俾左一個超級燦爛既笑容佢仲伸手要抱! 出埋佢隻爪爪手, 近來學識想要一樣野, 佢對手就會伸直然後爪下爪下, 成支自動不求人咁, 笑瓜我! 真係史無前例架, 平時弟弟同爸爸冇咩兩句, 呢個星期都冇咩唔妥, 只係成日玩玩下係度叫 "呀爸, 呀爸"! 秋秋已經好開心, 估唔到弟弟咁細個都掛住佢! 一般黎講異性相吸既弟弟係唔會要爸爸抱, 所以今次都係弟弟第一次向爸爸伸手 ^^
今日小慈只要有機會就一定要爸爸抱, 全日都爸爸爸爸咁叫, 氹到秋秋攰到就黎死都要抱住佢
小慈情不自禁錫左爸爸一啖, 我影唔切....
一時又話自己攰, 一時又話自己眼瞓, 完全唔肯離開爸爸對大脾
前世情人兼不是浪得虛名, 女真係嗲好多!
沒有留言:
張貼留言