坪石公園弟弟識行喇!

今日約左朋友仔去坪石公園玩, 好似係新開既, 而呢隻大恐龍係坪石公園既標誌, 好多年冇見過呢款滑梯, 以前細個辣屁股都一定要玩

公園好大

默默看守弟弟既小慈

今日既創舉 ---  弟弟識行喇!!!!!!!!!  

小明 9 個月大時已經扶住野企得好穩陣, 又鍾意我地拖住佢行, 我地仲估佢會好快識行, 期望佢會好似小慈咁未夠 1 歲就行到!  點知等下一個月, 等下又一個月, 小明都係維持係扶住野先肯行既階段!  2009 聖誕 party 去搴搴屋企地方大冇野扶佢先歷史性地行左 3 步!!  當時就黎 1 歲 1 個月, 仲估佢行開有引, 點知往後既日子都係維持 3 步之內撲到既地方佢先會放手行, 超級細膽

奇蹟就係發生係呢個星期 -- 廁所裝修, 縮窄左弟弟既活動範圍又收埋好多玩具, 連網床都擺左入房, 弟弟日日百無聊賴睇電視, 等 d 師傅走晒還原間屋, 唔知弟弟係咪抑壓左好耐, 定係間屋突然闊落左, 弟弟肯行 5-6 步!!  收埋左張網床, 個廳事實上係真係大番好多, 工人姐姐話佢好少放弟弟落網床, 只係我地食晚飯時先放佢入去, 既然係咁, 就唔要網床俾多 d 空間 2 個 B 走動啦!

導火線就係今日去坪石公園, 小明眼見 d 哥哥係佢面前不停咁跑, 再加上公園地方大, 冇野扶, 佢又想玩, 於是就舉步自己行 ^^

14 個月零 6 日大, 郭恩明先生識行了!!  仲一鳴驚人連樓梯都識自己爬上去 ^^

係要玩 bubbles 先吸引到咁多小朋友

熱情既 Bernard 同小明一齊追車仔, 兩個 b 鬥爬真係笑死

後記:

由今朝上幼潛到而家, 小慈好幾次想瞓就要落車, 冇得瞓晏覺但冇發爛渣只因今日既節目實在太吸引!  去公園已經夠開心, 仲同佢講有咁多小朋友一齊玩唔 high 就奇, 玩到 5:00 pm 都唔捨得走, 面又紅頭又濕仲要氣喘喘, 都係下次再玩過!

兩隻 B 一出車就一齊瞓, 返到屋企都唔醒直瞓到 7:00 pm!  叫醒小慈起身食晚飯衰妹未瞓夠發脾四, 體力嚴重透支連後備電都用埋, 如果唔叫醒佢怕且可以瞓到聽朝架喇!