每朝早送小慈返學, 我都要幫佢係學校個鞋架度攞室內鞋, 換鞋後又要放番對出街鞋, 睇住佢用酒精搓手液洗手, 戴口罩, 再揹書包同埋功課袋, good bye kiss 我先走得! 有時仲要 kiss 完又 kiss, 攬完又攬咁, 好冤氣架麻~~
呢幾日, 小慈突然變得好獨立, 我一幫佢換完鞋, 小慈就同我講: "媽媽你走啦! 我會自己放好對鞋, 同埋吱手, 同埋放書包入課室架勒, 我好多同學仔都返左黎, 你快 d 返工啦, bye bye 媽媽~~"
竟然推我走! 咁我梗係走啦! 其實好多家長一送小朋友入門口已經走架喇, 有 d 就算入學校都係企係旁邊指揮個仔攞鞋換鞋, 只係有少部份好似我咁咩都幫個女做晒, 我一直都知呢 d 野小慈係識做, 不過佢嗲我, 我就俾佢嗲下, 在所不惜地 keep 住佢返學呢個好心情, 而家佢有咁既轉變真係既驚且喜!
今晚仲好笑, 我講完故事就熄燈準備拖住小慈隻手仔陪佢瞓, 小慈竟然又推我走喎! 小慈話:
"媽媽, 我自己瞓得架勒, 你快 d 沖涼擦牙同爸爸一齊瞓覺啦! 一陣間姐姐同埋弟弟都自己瞓架, 不過你唔好係出面走黎走去架喇喎, 你去廚房斟茶呢會嘈醒我架! 快 d 瞓啦! 早抖媽媽~~"
哈?!? 咩原來我地夜晚去廚房斟水會嘈醒你咩?! 我咁細聲你都聽到? 真係唔好意思呀 :p
另外, 進步神速既弟弟只係學識行路 4 日, 已經稱得上健步如飛喇!! 不論雙手有冇攞住野黎行, 弟弟既步姿已經好成熟, 好穩陣, 真係唔似係岩岩識行既 bb! 亦可能有小慈做對手學得特別快啦!
除左學行, 呢個星期弟弟真係俾左好多驚喜俾我地! 之前一直教佢既野, 呢幾日就一次過做晒俾我睇, 又識表達自己, 弟弟而家識:
飛吻
-- 弟弟式飛吻係 "唔....... 呀~~" 隻手先掩住嘴 "唔..." 咁聲, "唔..." 好耐先 "呀~~" 咁放開手飛個吻俾你
餵我地食野
-- 闊佬既弟弟食咩都會餵我地食, 係質埋你個口度一定要你吞, 我地食得最多既係羊奶片, 其次就係提子乾
跌親痛識摸受傷部位咋嬌
-- 行得穩陣既佢偶爾踏到地下既玩具而跌低, 一跌就必定望住我地發出 "唔~~ 嗚~~ 下~~" 咁既聲扮可憐搏同情, 好抵死架佢
示意要推車
-- 自己爬上豬仔車坐好, 然後前後搖整郁架車示意我地推佢
錫錫
-- 教左佢好耐點錫我都唔識, 俾塊面叫佢錫係會 lam 到我濕晒一面口水, 而家終於學識, 嘟長個嘴啜我一啖仲有聲添!! 弟弟除左錫我地, 有時佢玩公仔, 都會摸住公仔個頭錫佢地一啖架, 好 cute
郭恩明....到!
-- 呢個真係教左 2 個月, 而家先肯舉手俾我睇!
小明式舉手! :DDDD
沒有留言:
張貼留言