幼潛第 8 堂

弟弟今日瞓到 8:30 am 先起身好精神, 同佢著鞋出門口時仲興奮到大叫又 fing 手 fing 腳, 已經知道著鞋出門口 = 去街街呢個道理!  教識弟弟 "郭恩明.... 到" 今日大派用場, 張姨姨點名時, 弟弟舉晒 2 隻手之餘仲自己行出去攞 label, 極之醒目 :DDD

遊戲一 

-- 配對顏色請小朋友將小積木放入同色杯杯內, 現階段幼兒應對顏色未有概念, 但可以開始灌輸, 先教紅色, 再教黃色, 綠色會較容易掌握!  教完一種顏色, 就可以 2 粒紅色積木夾 1 粒黃色積木咁請小朋友俾個唔一樣既積木你 or 你攞一粒紅色請佢俾多粒紅色你, 如此類推!  弟弟冇耐性呀, 擺多兩擺就爬左去, 成日走去門口搵爸爸 @.@

遊戲二 

-- 搓麵粉團請小朋友搓麵粉團, 俾佢地試下唔同質感, 亦訓練小手肌 meet 開小粒麵粉團, 弟弟初時十分抗拒團麵粉, 手仔一掂到簡直面容扭曲!!  教佢拍扁團麵粉就開心 d, 摸左好耐先開始接受麵粉既質感, 最後都肯用手指仔 meet 開團粉, 真係難為你喇~~  :DDD  不過佢唔似得其他小朋友咁喊出黎爬櫈走已經算乖

遊戲三 

-- 筲箕路, 訓練小朋友提高小腿行以強壯肌肉, 亦刺激視覺發展空間感, 弟弟行得好認真呀!

星期日經常變身無飯家庭既我地, 上完堂就帶小慈小明出街食壽司, 係呀, 小明都有得食壽司架, 日本米佢最鍾意食, 其次就係食燉蛋, 佢可以一個 b 自己食晒 2 盅, 厲害呢!?  而小慈就最鍾意食蟹子, 三文魚子同埋鰻魚, 肯定食得多過平時既飯餐!

飯後就去冒險樂園行下, 點知今日小慈竟然同爸爸咁講:

小慈: "爸爸, 我地今日有冇錢呀?"

爸爸: "冇架"

小慈: "點解我地成日都冇錢既........"

爸爸聽到好心痛, 靜雞雞埋黎同我講: "買 d 代幣俾小慈玩啦, 4 歲都黎緊喇, 識野架勒, 小慈又唔係 d 唔聽話玩到賴死唔走既小朋友, 咁乖, 俾佢玩啦!"  

你咁講, 咪買羅, 不過我都要同小慈補充一句: "玩完 10 個代幣就走架喇!"

小慈 "知~~~~" 得我幾大聲呀!  

於是今日歷史性地用 10 個代幣玩左 4 個遊戲

1. 小慈最先決定玩麵包超人車 (4 個代幣, 搶錢!!!)

2. 再玩氣墊球 (4 個代幣, 原來係計時既, 握錢!!)

3. 保齡球 (3 個代幣, 小慈碌到個波去左第 2 條 link, hang 機退番 3 個代幣, 賺左!)

4. 扑傻瓜 (4 個代幣, 呢個小慈最岩玩) 

我地都十幾廿年冇俾錢玩過呢 d 遊戲, 以前拍拖就玩唔少, 原來 10 個代幣玩得好少, 今次都要靜雞雞醒多 2 個俾小慈先夠玩, 下次同佢講可以玩 20 個啦, 通貨澎漲真係冇計!  不過小慈真係好乖, 每玩一個遊戲都問我地仲有幾多個 coins 呀?  同佢講冇晒 coins 佢就 "啊~~" 一聲話唔緊要啦, 下次再黎玩過啦!  好生性 :)  

秋秋即刻向我擠眉弄眼, 示意話一早知個女乖架啦, 睇下睇下...... 咁意思 :DDDD