遠近慈明: 小慈 K1 上學期成績表

榮升 K1 既小慈今日派上學期成績表, 我同秋秋一齊去, 兩個班主任都好重視咁坐定定一齊見我地, 真係俾晒面呀! 感覺上, 我同班主任已經好熟好熟, 平時小慈係學校有 d 咩事都已經成日打電話話我知, 而小慈又會每日向我匯報係學校學左 d 咩發生左 d 咩事, 甚至係學校既整日流程佢都識得同我講番, 再加上我呢個每事問既呀媽有 d 咩問題都會係返學時把握機會問老師, 所以真係已經對學校瞭如指掌! 好似早兩日小慈同我講好鍾意係學校食 "bunday cake", 我聽唔明, 係唔係 pancake 呀? 係唔係 birthday cake 呀? 小慈又話唔係, 於是我就問番陳老師, 迷底終於解開, 其實係香蕉班戟 :DDD 唔知小慈攪錯左 d 咩聽到變左咁?! 我一直都好欣賞呢個廚師賢姐, 佢真係好勁, 趁小朋友瞓晏覺時可以即席整香蕉班戟俾佢地食!! 除左日日唔同既粥粉麵飯, 賢者仲識整碗仔翅, 壽司, 蒸蛋糕, 糖水等等, Day 1 interview 時校長已經同我講佢地學校既伙食唔錯架, 真係冇講大話呢! 希望小慈可以食肥 D

飲食龍虎磅

-- 小慈今年係食呢方面都有進步, 以往食得少, 食得慢既佢, 而家偶爾都會食第 1 同埋添食, 原來老師整左個 "飲食龍虎磅" 係一個統計表黎既, 每日既早餐, 水果, 午餐, 茶點, 食得最快個 12 位小朋友就可以出去點自己個樣上去, 唔怪得小慈近來成日都話自己食第 1, 佢係指自己係呢個龍虎榜度排第 1, 其餘飯餐時間都見佢榜上有名, 雖不至於係一二三名, 一班 24人, 小慈貼到個名上去即係已經快過一半人以上, 我簡直係老懷安慰! 老師都話小慈係突然有動力去做呢件事, 有時仲會鼓勵其他小朋友食快 d 添 ^^ "淨番 4 個位咋! 淨番 3 個位咋! 快 d 啦...." 笑死

語言發展

-- 老師話小慈學習方面完全冇問題, 係一個好聰明好留心既小朋友, 好多野都係教一次就識, 表達又清楚, 每次老師都好期待小慈既新聞分享, 次次佢都講得好多, 好生鬼! 好似上次我剪左篇溜冰籌款報導, 小慈連 "要小心對鞋因為有刀" 都講埋, 佢正正就係知無不言, 言無不盡既小朋友, 佢亦係全班唯一一個識用完整句子講野既小朋友, 舉例如老師問點解鍾意老虎? 其他小朋友答 "得意" "肥" 等單一既形容詞, 小慈係會答你: "我最鍾意新年既老虎, 因為就黎新年" 老師話識講完整句子唔容易, 雖然佢識用既詞彙並未係太多, 但識運用 "因為 xxx 所以 xxx" 呢 d 抽象既概念代表佢真係好明白理解你問佢咩野, 語言發展非常成熟

音樂天份

-- 小慈既學習方式係好特別既, 郭老師話上星期宗教老師教左首歌叫 "Jesus is my friend", 佢抱住另一個小朋友坐係小慈隔離, 成首歌小慈都冇跟住唱, 淨係望住, 之後分組, 同組有個女同學口 up up 唱番首歌出黎, 小慈就話人地走音兼唱錯歌詞唔係咁唱, 於是就由頭到尾唱 1 次俾個女同學聽, 真係岩晒喎! 老師目瞪口呆, 明明頭先佢一句都冇唱, 點解會識晒架? 於是問小慈媽媽有冇係屋企教過你唱呢首歌? 小慈話冇, 話媽媽淨係教佢唱我是主的羊, 不過媽媽教個首同梁老師個首唔一樣, 老師非常欣賞小慈既音樂天份, 叫我唔好徒左佢!

手眼協調

-- 老師話小慈好鍾意做圖工, 每次都好俾心機做好耐, 非常有耐性, 老師一對 4 咁教小朋友一筆一劃畫老虎, 佢地都係第 1 次唔起稿叫小朋友跟住畫, 初時對佢地冇信心俾鉛筆佢地畫, 見佢地冇問題先用顏色筆, 真係叻叻架佢地! 空間概念邏輯思維都唔錯, 老虎 d 鬚呀, 虎紋全部都有板有眼, 唔怪得小慈近來畫公仔識畫咁多款唔同既眼睛同埋表情啦!

D 桔仔都冇出界

感性

-- 老師話小慈係一個好感性既小朋友, 會識得講 "我好掛住你", "小心 d 呀", "係唔係唔開心呀?" " 你剪左頭髮好靚呀!" "你係唔係好攰呀?"...既說話, 好識關心人, 好細心, 令到老師好心甜, 好感動! 恩慈好聽話, 另一方面佢又好介意人地既說話, 好似小朋友戲言一句 "我唔同你玩!" or 排隊有時太逼撞到前面個小朋友人地投訴, 小慈係會好介意, 甚至會喊, 會同老師哭訴佢唔係有心, 要個小朋友講原諒佢 or 同番佢玩先冇事, 每一次都要即時處理, 如果唔係小慈可能成朝都唔開心, 個情緒會困擾佢好耐, 不過好在處理完佢係真係放得低, 當呢件事冇發生過, 小慈依然都係一個好敏感既小朋友, 而家仲加埋感性添, 果然真係好女仔呀!

慢熱觀察型

-- 小慈係呢一類型既小朋友, 你唔好期望佢一開始上堂就會積極投入活動, 帶動課堂氣氛, 但唔代表佢唔留心喎, 你問佢佢都會答, 只係唔係滔滔不絕, 通常去到課堂中段小慈既反應表情就會多番好多

老師評語 -- 恩慈性情良善, 聰敏好學, 對師長親切有禮, 情意及群性發展方面, 恩慈在學習和進行活動時, 能集中注意力, 專心一致, 表現投入, 如專注老師的專題課堂中, 能積極主動作出回應, 她能體驗群體的樂趣, 願意與不同的同伴分享玩具, 在唱遊活動中, 恩慈能跟著歌詞和音樂的節奏, 做出簡單的律動外, 亦喜愛參與假想性遊戲, 可見恩慈整體學習上具穩定的進步

另外, 學校採用 Project Approach 專題研究教學法, 讓幼兒主導學習