小慈升 K2, 今日舉行埋結業禮就放暑假! 本來今年冇打算參加結業禮, 點知小慈有獎攞仲要上台表演跳舞, 小慈更加開聲問我地可唔可以黎睇佢? 我地梗係即刻排除萬難一齊請假出席啦!
一直都好擔心小慈上台會怯場喊, 表演當日老師又話要預早帶小朋友去綵排先, 家長一個鐘頭之後先入場, 我幾驚小慈拖實我唔俾我走要我陪佢一齊綵排呀, 哈! 老師事前既心理輔導做得超級好, 一早教定小朋友綵排完爸爸媽媽先會入場, 要專心跳舞唔好同台下面既爸爸媽媽揮手, 跳完舞就會送禮物俾佢地! 於是, 當我地到達禮堂交小慈俾老師之後, 小慈真係頭也不回咁入去綵排, YEAH!
幼稚園老師真係好辛苦, 幼兒園老師更辛苦!! 先攪完大型結業禮, 第二日一早又要開家長會, 暑假只可以放兩個星期, 真係可以講話年終無休 >.<
今日係郭老師見我, 佢好奇怪恩慈冇跟住黎既? 我話佢想架, 不過佢而家上緊體操班分身不下, 郭老師好驚訝小慈肯自己上堂? 我話佢而家好大進步, 多得老師幫手開解小慈有鼓勵佢勇敢, 我又狠下心腸由佢喊左 1 堂就冇事, 不過我覺得最關鍵係佢鍾意呢個興趣班, 跑跑跳跳小朋友實開心, JMC 我同佢一齊上實冇問題, 兒童詩班返去唱歌又係佢既強項! 我同郭老師陳老師真係無所不談, 加上小慈又會返學校講佢係屋企既生活, 返屋企又講學校既生活, 所以大家透明度好高, 冇秘密架 :p
郭老師都好同意小慈有音樂天份, 話佢拍子感音樂感都好好! 尋日結業禮恩慈跳舞真係跳得好靚, 之前聽我講過話恩慈唔肯上台令佢同陳老師好擔心, 即刻用白板畫晒圖又寫晒成個結業禮既流程俾佢地知, 仲俾埋早幾年既結業禮 DVD 佢地成班 K1 小朋友睇講解晒成個程序, 郭老師教左咁多年書, 今年係第一年成班 K1 總共 24 人全部都有上台表演, 冇人喊, 冇人要俾家長接走, 真係令佢好感動!!
成班都係叻仔叻女, 特別係恩慈!! 郭老師私底下同恩慈講叫佢一定要上台, 因為小慈跳得最好, 好多小朋友都係睇住恩慈黎跳, 如果恩慈唔上台佢地就唔識跳舞 ^^ 嘩~~ 郭老師你咁大頂高帽呀!?! 郭老師話係真架! 睇番 video 恩慈係拍子最好舞步最靚個一個, 拍子感係好難教, 好抽象既一樣野, 佢初初教小朋友做動作, 後尾係要佢地記唱到邊句歌詞就記住做咩動作, 如聽到 M 字你要搖手, 聽到 E 就舉手, 跟住音樂跳小朋友就掌握到, 但未用音樂呢個方法時, 小慈已經識跳, 腦海入面已經有音樂所以佢有冇音樂都跳到, 呢 d 就係佢既潛能, 天份, 真係唔好徙左佢要好好栽培!
今次張成績表真係寫得小慈好好, 好到我可以用無懈可擊黎到形容 :) 郭老師話小慈係一個好小心既小朋友, 有一份工作紙係請小朋友認數目字之後再塗上相對既數量, 小慈認到個 7 字, 已經數左一次 7 先油顏色, 但佢顏到去 5 時佢會再數一次, 油完晒佢又再數多一次 7 睇下有冇錯, 全班得佢一個咁認真真係好叻, 咁細個識覆卷好難 train, 個個小朋友測驗都係衰唔小心, 所以恩慈能夠有咁既表現係要讚, 要佢 keep 住, 一個 7 數 3 次我係怕佢做得太慢, 郭老師又話佢地大把時間, 恩慈又唔介意慢慢做佢係冇問題既!
郭老師又讚小慈係一個有探索精神既小朋友, 有一次學校做專題研習要出去公園睇樹葉, 出發前已經同小朋友講晒規矩 -- 排隊要手放後面, 要拖住隔離個小朋友一齊行唔要推撞, 唔可以手多多等等.... 小慈全部都有記住, 好留心聽老師既指示, 即使佢好想摸樹葉都會問准老師可唔可以摸佢先出手, 非常乖, 非常循規蹈矩又認真學習, 投入活動又有探索精神唔會抗拒新事物, 唔怕曬唔怕出汗唔怕污漕, 泥都會想攞黎聞下, 真係 very good!! 郭老師係非常重視品德既培養, 所以有獎勵簿既出現, 希望透過獎勵簿鼓勵小朋友有禮貌, 珍惜物品, 自己的事自己做及培養良好生活習慣, 平時要佢地守規矩, 人地幫佢做野一定要講唔該等等, 郭老師話品德好重要, K1 做唔好上到 K2 K3 就好難教
嘩~~~ 簡直同我不謀而合, 我認為學海無涯, 知識學問學到 90 歲都仲可以, 但性格, 價值觀, 態度, 為我獨專自私自利定係有同理心體諒體貼別人等定左型就好難改變, 所謂 3 歲定 80, 聽到郭老師咁講我真係好開心 ^^
總括而言, 郭老師俾既評語係:
恩慈活潑可愛, 親切友善, 喜歡參與群體活動, 例如 : 共同製作圖工及舞蹈活動, 表現合群及能夠發揮守望相助的精神, 在日常課堂中, 恩慈參與性很強, 願意主動發表意見, 與同伴合作處理問題或共同設計物件, 表現十分投入, 整體來說, 恩慈學習及處事態度均表現積極, 亦深得師長的欣賞!
小慈, 你做得好好呀! 我地好欣賞你呀! 加油! 努力做個好孩子 ^^
