毛巾仔

每朝返學之前都會幫小慈檢查書包, 其實佢個巨型書包裡面都只係放風褸同埋替換既衣服, 以防佢地倒瀉果汁 or 尿床時有得換衫, 老師出通告提醒我地天氣熱就要額外放多一條毛巾係書包入面, 俾小朋友做完大肌肉運動後抹汗, 於是我就照做啦, 放完就話俾小慈聽媽媽將條毛巾放左係邊個位, 點知小慈竟然話 "我唔鍾意呀!"  

咩唔鍾意呀?  老師話要放毛巾麻!  小慈都係話唔鍾意仲跺腳, 真係唔知佢攪咩?  唔理佢就出門口返學, 呢幾日朝朝返學都係咁, 一時又話要口罩, 一時又話要食餅, 要呢樣要個樣多多要求都出唔到門口!

俾我話左一句之後, 小慈返到學校冇里神氣, 幫佢換完鞋仔仲一支箭走去陳老師度, 書包又未攞功課袋又唔要都唔知佢做咩!  當我尾隨小慈入班房既時候, 我隱隱約約聽到陳老師答小慈: "今日冇大肌肉呀, 尋日咪玩左攞?!" 

小慈即刻轉身好肉緊咁同我講: "陳老師都話今日冇大肌肉呀!"

我真係碌大對眼!!  衰妹竟然走去問陳老師?!?  陳老師話冇就想我即刻攞走條毛巾係咪咁既意思?!!  真係俾佢激死竟然走去告狀好話我監佢!!  @.@

陳老師唔明我地既對話, 於是我解釋:

我: "我放左條毛巾係書包提佢做完大肌肉時要黎抹汗, 佢話佢唔鍾意!" 

醒目既陳老師即刻答: "岩呀, 媽媽幫你預備係岩架!  要放毛巾係書包架, 你唔記得上次你做完大肌肉冇毛巾抹汗都唔開心咩?"

小慈個樣有 d 如夢初醒, 我估佢而家記得喇 (哼!)

我: "條毛巾唔係要你今日抹呀, 媽媽放定係度等你有需要先用呀, 知唔知呀?"

唉~~  呢個女好難教呀!!  小慈竟然會識 "抽稱" 我, 會用自己既方法去證明媽媽既說話岩定唔岩!  

我真係要規規矩矩, 唔可以行差踏錯.....