Yeah~~~ 小明 1 歲半喇 ^^
呢個月又講多左好多野, 識叫工人姐姐個名, 識叫叔叔, 伯伯, 婆婆, 姨姨, 姐姐, 爺爺, 嫲嫲, 哥哥 (教佢叫昊昊哥哥變左音做 "喔噢哥哥" 不過都令到昊昊笑到依起棚牙) 名副其實世界仔最叻亦都最肯叫人
18 個月大真我表現盡現, 開心興奮時會擘大個口尖叫狂奔, 想要一樣野時絕對係會瞓地跺腳煩音不斷, 甚至大喊特喊咁去爭取, 我就唔怕小朋友大聲喊, 簡直係訓練有素個隻! 弟弟一喊我地就個個肅靜迴避, 精甩邊既佢好快都明白呢個關鍵, 所以佢最多都係喊 1 分鐘就會自動自覺收聲, 行埋黎扯衫尾淚眼汪汪咁望住我, 一如以往, 小慈小明一安靜就係我出鵝功既時候, 於是 18 個月既弟弟已經學識講 Sorry, 要, 謝謝, OK, 知... 等低聲下氣既說話!! 之前仲係誓不低頭既佢亦都終於肯低頭, 學識點頭
最鍾意玩巴士, 每日都會右手渣九巴, 左手渣新巴咁玩, 男仔真係天生鍾意玩車, 最唔鍾意就係換片, 一見我地攞住條片就走定先, 大叫 NO~~~~, 通常我地都會好有耐性咁等佢返黎, 弟弟見寡不敵眾就會好無奈咁自己瞓低任我地魚肉
理解力與日俱增, 明白因果關係, 除左識講單字亦開始識運用名詞 + 動詞如 "媽媽乞嚏", "小慈 ZzzZZzzz", "媽媽 um", "抹手手", "熱熱呀.... 呼.....", "BB 跌跌", "車車...囉", "擺...波波", "不飯飯" "媽媽 big feet, 小慈 small", 指令動作如 Where is xxx? Point to yyy 通常都會做到, 近來就教緊佢認顏色
互動方面, 學識同我地玩 "弟弟暈左" -- 霹拍一聲自己瞓左係梳化唔郁, 等我地埋去搖佢大叫 "弟弟~~~ 弟弟~~~" (係, 我地係好鍾意玩埋 d 咁既野 :DDDD), 同佢唱 little bunny going hop hop hop, 弟弟竟然識 hmm 下一句, 小慈大叫: "我要屙殊殊~~" 弟弟係會即刻走去廁所門口幫手敲門睇下入面有冇人入唔入得去, 笑死我地, 關佢咩事?!
記錄弟弟一日既生活:
6:45am 森永大仔 240ml
8:45am 芝士麵包條 1 條
9:00am 去公園及去街市買送, 通常街市既姨姨叔叔都會請佢食餅 / 麵包 / 糖
10:15am 爛飯仔一碗 + 清水
11:30-1:30pm 午睡
2:00pm 爛飯仔一碗 + 湯
2:45pm 洗白白
4:00pm 接小慈家姐放學, 食蘋果, 餅仔
5:45pm 森永大仔 240ml
7:30pm 跟我地食晚飯, 最鍾意自己'不'飯'不'湯, 自己叉飯後果
9:15pm 森永大仔 240ml
9:30pm 睇圖書, 瞓覺
洗白白~~ 洗白白~~ 人人話我好寶寶~~
趁弟弟瞓覺, 我同秋秋再去多次玩具街買玩具, 好正呀! 兩條街全部都係玩具, 我地行左 2 個鐘頭都睇唔晒, 非常忍手咁買左 5 份玩具 only, 真係可以買到破產!! 獵犬小慈即刻發現我地大包小包買左野返屋企, 雙眼發光咁問 "係唔係禮物黎架?"
18 個月大都有禮物, 開心嗎?
沒有留言:
張貼留言