笑容

有朋友話好鍾意見到我笑, 我既笑容燦爛到一個地步係連腰果眼都會出埋就想跟我一齊笑 :D  真係多謝呢位朋友賞面!   我係好鍾意笑亦都好容易笑, 不過笑得多既後遺症就係已經有魚尾紋了!

小慈今日同我講: "周海瑜有戴頭箍架!"

我: "戴頭箍有咩用架?"

小慈: "d 頭髮會咁樣 (邊說邊用手將額頭既頭髮掃向後) 唔會篤到眼睛囉!"

我見到佢個樣就忍唔住笑

小慈: "媽媽, 我做多一次, 你笑多一次丫!"

我: "做咩呀?"

小慈: "我 (又扮戴頭箍), 你笑啦!"  

於是我照做

小慈: "我好鍾意媽媽笑呀~~"

估唔到連小慈都係, 平時已經係架喇, 如果小慈見到我笑, 佢會好落力咁表演多次俾我睇, 只係未試過好似今次咁, 指示我要我笑多次!  好啦, 魚尾紋就魚尾紋啦!  難得乖女鍾意我笑!  (會微笑的媽媽 ^^)

小慈近來亦唔知點解好鍾意睇遊戲節目, 之前逐格鬥已經係咁, 而家到獎門人就更加瘋狂, 日日都問住今日係星期幾有冇獎門人?  佢爸爸仲錫到佢燶, 為左幫佢錄電視買左個高清解碼器返黎, 於是晚晚食飯都要開黎睇!  

今晚睇完獎門人, 小慈同我講佢都想學猜, 於是我就教佢玩 "口不對心我至勁, 我勁 d", 猜既時候, 手出既數目同口講既要唔一樣, 估唔到小慈一教就識 (可能睇得夠多), 仲猜贏我添!  

我地係猜得好慢個隻, 但估唔到猜得咁慢我都可以輸俾小慈, 果然後生可畏  :DD