小明歲半返健康院

上星期先帶小慈返健康院驗眼, 今日就到弟弟 1 歲半返去做發展監察, 如果可以同一日就唔駛我走兩轉!  不過單拖帶弟弟出街真係辛苦好多, 衰仔一時要抱, 一時要行, 成間健康院周圍走, 不停係長櫈爬上爬落仲打橫行, 又摸人地 d BB, 大叫仲整醒左 2 個 @.@  面皮厚厚唔怕醜, 明明人地係對佢瞪眼, 佢走去 Hello~~  攪到人地嬲佢唔落, 冇佢咁好氣

入 8 號房度高磅重, 姑娘問係唔係郭恩明?  衰仔答姑娘 "到~~" 氹到姑娘好開心 :D

體重 10.6kg = 23 磅 (50線)

身長 83cm (75線) 

Oh No~~~ 攪咩鬼縮晒水?!?  入房見護士長, 我話弟弟好似縮左水, 之前仲係中大碼 B, 家陣好似得番 30 線?!  護士長第一句就問爸爸肥唔肥?  我話高高瘦瘦囉, 護士長就話媽媽都係成支竹咁, 個仔又點會大大隻隻好多肉呢?  遺傳架麻!  同埋而家都唔止 30線, 有 50 都好好, 有冇偏食先?  我話冇, 咩都要分一份俾佢, 近來仲一定要自己不飯不湯, 護士長話 very good!

跟住做測試, 護士長一放低 4 粒積木, 咩都唔駛講弟弟已經自動自覺將 4 粒積木疊高, 再問弟弟眼耳口鼻手腳頭頭係邊, 弟弟全部指岩晒, 只係有 d 指令要講英文如 feet, nose, ears

說話能力方面, 護士長一睇就知弟弟冇問題, 因為弟弟由入門口到而家嘴仔未停過講野 @.@  當然循例都要問我弟弟識講咩野超唔超過 10 個詞語?  我答點止 10 個, 最近連 blue, yellow, red 都識, 又識叫人, 指住物件表達需要都冇問題!  至於流口水問題, 護士長話佢掛住玩先唔識吞口水, 去到 2-3 歲出齊 20 隻牙仔就一定冇問題, 放心放心~~  所以一切正常, 4 歲先再需要返黎驗眼

大踏步神情確威武

你睇佢, 成排櫈俾佢踩晒仲駛坐

健健康康就好了 ^^