畫班

暑假就快到, 每日都收到好多單張介紹不同既暑期活動, 真係花多眼亂, 只可惜 (其實應該慶幸) 小慈既暑假只有一個星期, 好多平日開既班根本報唔到, 唯有靠星期六日, 咁就唔駛等暑期班, 係屋企附近幫小慈報左畫班, 我有問過佢意見先架, 電視有小朋友跳芭蕾舞好靚, 我問佢想唔想學?  小慈答唔想!  想唔想跟舊年個教練叔叔游水?  小慈問到好清楚知道我唔會陪佢落水亦唔會係旁邊睇住佢就話唔想學!  最後係畫班, 我同佢講爸爸媽媽唔識畫畫, 所以要請出面既老師教佢畫, 衰妹夠膽死同我講佢識油顏色唔駛學畫畫喎, 我話都唔同, 要學先識架!  小慈就問會唔會同媽媽一齊架?  我話唔會, 媽媽係出面等你, 點知此話一出, 以後一聽到 "畫班" 呢兩個字就喊, 話唔想學, 真係無話可說.....

今日上第一堂畫班, 我專登買本新既畫簿同顏色筆俾小慈上堂用, 仲氹佢上完畫班就帶佢去冒險樂園玩, 小慈憂心忡忡咁同我講 

"畫班有冇媽媽架?  我想同媽媽一齊呀"

我唔想整喊佢, 於是我將呢個決定權交俾畫班既老師, 我話一陣問下老師俾唔俾啦, 老師唔俾我都冇辦法!  唔好話佢, 我都好緊張, 上興趣班都攪到好似賭錢買大細咁  

步步為營咁去到課室, 畫班老師係一個靚女叫 Miss Wong, 佢都好 nice, 小慈真係問佢可唔可以同媽媽一齊畫畫?  Miss Wong 話:

"媽媽可以係課室出面, 我地開住門上堂你可以見到媽媽"  

聽完 Miss Wong 既答案小慈一如所料即刻大喊, 仲喊到收唔到聲個隻!  Miss Wong 唯有請我坐係班房既另一邊, 遙望住小慈, 衰妹都仲係咁喊, 足足濕左兩大團紙巾!  15 分鐘呀~~  我淨係望住佢搖頭, 一句聲都冇出, 好在班上面有一對好攪笑既姐妹, 一個 6 歲, 一個 3 歲半, 佢地不停講野又唱歌, 仲話小慈做咩你喊咁耐?  跟住 Miss Wong 攞左好多幅畫出黎問小慈鍾意畫咩野?  初時小慈問咩都話唔鍾意, 後尾妹妹不停鼓勵小慈同佢一齊畫 Marie, 小慈先話畫 Keroro!  我仲以為佢會想畫 Hello Kitty 添, 上次買頂鴨嘴帽俾佢又係揀矇面超人, 連喜羊羊都唔要, 真係估都估唔到佢既 choice 男仔成咁!

你睇佢個樣可憐到, 喊濕左兩團紙巾 @.@

Miss 帶左妹妹出去廁所, 其實一班得 3 個小朋友好理想呀!  Miss Wong 都幾好心機, 先用鉛筆係畫簿度點出 Keroro 外型請小慈連線, 連好後就用黑色 Marker 鈎邊, 再用擦膠擦走鉛筆痕, 跟住就可以上色, 小慈初時未有心情連執筆都唔想, 要 Miss 捉住佢隻手教佢連線, 後尾見到隻 Keroro 開始成型就開始有心機, Miss 仲讚小慈隻手幾定添!  一堂 60 分鐘只係欠背景, 藍天白雲草地畫唔晒留番下一堂都算好快,  如果唔係小慈用左半堂黎喊應該做得晒既

落堂就笑喇, 攞住幅畫話要俾爸爸睇, 又要俾姐姐睇, 仲有弟弟

其實佢係開心既, 但真係扭我, 怕自己一個人面對陌生人, 慢熱, 適應能力弱, 成日想搵我做水泡, 我真係想佢獨立 d, 但我又唔想逼小慈, 更唔想因為興趣班而鬧佢, 亦唔想夾硬黎, 佢唔係唔想學新野, 只係想同我一齊, 一聽到媽媽唔係度就即喊 @.@  不過我話左佢架喇, 想同媽媽一齊可以, 要同媽媽講, 唔要再喊!  希望佢慢慢適應, 今堂我坐開左, 下堂再坐開 d, 睇下幾時我可以走出課室啦!

小慈開心既時候真係可愛得很!  同佢玩估野, 本來係我同弟弟玩先既, 將 d 小玩具收埋係手掌心再握拳, 請弟弟估我邊隻手有玩具, 小慈見我同弟弟玩得咁開心佢又要玩, 開始有創意同埋自己主意既佢, 走去攞隻大玩具蛋將 d 玩具收埋係蛋入面叫我估~

我: "係唔係食物黎架?"

小慈: "係呀!  係魚仔玩具黎架!" 

真係笑瓜我, 我都未估佢自己已經開估左 :)

我: "係唔係好甜架?"

小慈: "唔食得架, 佢唔係魚喇今次, 車車黎架!  條魚我收埋左係呢度啦!"

真係好好玩, 不戰而勝呀 ^^  

但係掉番轉, 我收埋俾 hints 佢估, 佢又次次都估中, 又傻唔晒, 只係唔識內藏, 咩都講晒出黎!  

小朋友真係好天真, 好可愛呀 ^8^