蚊咬

好慘呀!!  好慘呀!!

尋晚 1:30am 弟弟喊醒, 好淒涼, 佢好少半夜喊咁耐, 以往都係發夢先大叫一兩聲自己好快瞓番, 今晚聽佢喊左成 3 個字都唔想停, 於是我出去抱住佢, 氹佢一輪等佢冷靜左再俾佢係床仔瞓, 佢係瞓著左架喎, 點知半個鐘後又喊醒, 不停踢腳, 又抓右小腿, 原來佢俾蚊咬 @.@  蚊咬既部位仲摸到硬硬地, 搽左藥膏都要工人姐姐成晚輕掃弟弟條小腿佢先唔再起腳踢, 不過都係斷斷續續咁喊, 聞者心酸....

朝早起身見佢心情又唔錯, 於是我問佢做咩事尋晚喊喊呀?  瞓醒唔准喊架喎!  又係度鵝佢, 再望下佢被蚊咬既地方, 我足足係望左 1 分鐘先有反應... OH MY GOD!  弟弟隻腳腫晒!!  兩隻腳 size 唔一樣, 右腳粗碌左好多!!!!  等我仲話佢添, sorry 呀, 弟弟, 媽媽衰!  即刻飛奔去樓下睇醫生, 陰公呀, 弟弟對腳腫到鞋都著唔落 @.@

好在弟弟冇發燒, 醫生望左兩眼就問我俾唔俾弟弟食藥?  係敏感藥黎既, 可以止痕但有睡意, 要每日食 4 次, 仲有止痕藥膏早晚搽!  我問醫生食藥都唔係辦法, 屋企裝蚊香好唔好?  醫生話唔好裝蚊香蚊機, 對小朋友呼吸有影響, 得一個辦法, 就係買支電蚊拍同埋開冷氣瞓覺!  小明已經唔算嚴重個個, 有 d 俾蚊咬眼皮, 咬耳仔仲慘不忍睹

真係冇陰公, 睇完醫生即刻走一轉去商場買電蚊拍, 跟住返屋企報仇!!  我地反轉左弟弟間房, 將所有床舖被褥攞晒出黎, 咩洞都唔放過!  真係有隻蚊呢左係床尾櫃入面, 佢飛得超慢, 因為佢已經食到好飽, 俾秋秋一拍佢就成手都係血!!!!  冇用電蚊拍因為攞唔切, 不過手刃仇人仲痛快!

弟弟, 呢個仇我地幫你報左喇~~~

P.S. 呢件事上唯一令人感到安慰既係發現弟弟食藥合作左好多, 以前一見到支藥水係喊住走架, 而家真係大個仔, 為食既佢可能覺得支香蕉味既止敏感藥水甜甜地所以好肯食!  乖仔 :)