每日返屋企第一件事除左攬攬錫錫兩隻豬仔之外, 我會同小慈傾下偈問下佢係學校有冇開心野要分享?
小慈話今日 Miss Sandra 有黎教佢唱左好多首歌, 其中一首係: "Good morning to you" 佢唱到非常低音, 聽到我隻耳都有少少側側地, 但佢話係咁架喎, 仲話自己唱得好好聽添!
跟住又話出左去學校出面既馬路度睇車, 小慈今個月主題係交通工具, 之前有通告要家長同意小朋友離開學校, 以小組形式去學校旁邊既馬路統計經過車輛既流量及類型
我: "依? 今日終於出去做統計拿?" (之前因為日日落雨都冇機會出去)
小慈: "係呀! 郭老師仲教我地隻腳要踏下踏下咁唔好俾 d 蚊咬呀!"
我: "係? 咁有冇蚊咬你呀?"
小慈: "冇呀, 我有踏腳架, 我好聽話架!"
我: "哈~~ 你咁聽話呀? 咁你記唔記得有咩車經過呀?"
小慈: "唔知呀, 寫左落張工作紙交左俾老師喇..."
呢個時候, 弟弟拎左塊神奇畫板俾我, 示意我同佢玩, 小慈埋黎話要教我畫畫, 於是我問佢係唔係好似 Miss Wong 咁點點點然後連線呀? 小慈又真係好俾心機咁點俾我畫喎, 正想讚佢之際, 小慈眉頭深鎖咁問我:
"可唔可以同媽媽一齊學畫畫呀?"
我都未答佢已經眼紅紅流眼淚!! @.@ 救命呀~~~ 又黎?!! 我真係唔想答佢, 但佢越喊越犀利, 我咪唯有好言相勸羅, 請佢勇敢 d, 自己學下獨立云云...小慈竟然答我:
"我勇敢唔到呀~~~"
唉.... 拖拖拉拉咁到上床瞓覺都係唔開心, 睇見佢 d 眼淚真係扯火, 但我忍!!!! 我估佢一日未聽到我既最後答案都瞓唔著架勒, 於是我要佢自己講你喊咩野, 你想要咩野?
小慈: "我聽到你講呢 d 說話, 我好唔開心呀~~" 又喊
我: "你唔想聽到媽媽叫你勇敢 d, 獨立 d 呀?"
小慈: "係呀.... 嗚.....我想媽媽同我一齊呀.... 嗚"
我: "都話 Miss Wong 唔俾咯! 拿, 我俾你揀, 你想媽媽坐開 d 望住你畫畫, 定係想媽媽係課室出面等你?"
小慈考慮左好耐, 好耐..... 跟住好細聲, 好細聲咁講
小慈: "我想媽媽坐開 d..."
我: "好! 媽媽應承你! 你都應承媽媽唔再喊! 而家好夜喇, 你要瞓覺勒, ok?"
小慈: "ok"
天呀~~ 我都想喊! 我真係唔識教女喇! 好地地一個晚上都可以攪成咁! 我唔知再可以用咩言語, 用咩態度去應付小慈, 好氣餒..... 當然我好鼓勵小慈將佢自己內心既感受, 開心唔開心既野都講俾我聽, 所以我忍得好辛苦唔鬧佢, EQ 就係咁樣訓練番黎既 @.@
一句話費事煩唔學畫畫係好容易, 又唔係唔駛俾錢, 但真係唔可以咁架! 逃避都唔係我性格! 我估小慈都係好困擾先會觸景傷情
唉~~ 問題未解決! 天父呀, 求你俾我有從你而黎既愛心, 耐性, 智慧去教導小慈, 更加賜俾我有小孩子既心, 讓我更明白了解小慈既感受同埋需要, 亦求你俾小慈有信心, 有安全感, 知道天父你愛佢, 與佢常在! 奉主名求, 阿門~~
沒有留言:
張貼留言