小慈 4 歲返健康院

話咁快就 4 歲, 今次係小慈最後一次返健康院檢查, 上到小學就有學童保健, 不過姑娘都千叮萬囑要我好好保存本健康手冊, 一至 keep 到小慈 18 歲!

先去度高磅重, 小慈好攪笑, 一聽到姑娘叫咪 "郭恩慈請到 8 號房" 就好緊張成個彈起, 盲頭烏蠅咁打個圈唔知行去邊度  

頭圍 49.5cm = 50 線 

身高 99.4cm = 40 線 (叫極小慈企直佢都係望住腳趾)

重 13kg =  28.6磅 = 25 線

果然身高體重都同學校度既非常有出入?!  不過就算佢著埋鞋磅都係輕飄飄架勒, 小慈自 1 歲起都已經變左細碼 B, 連女長人既虛名都冇埋, 一直徘徊係 30-50 線

跟住去 2 號房做視力普查, 本來都好地地, 醫生哥哥問佢咩都答得好爽快, 點知要佢戴太陽眼鏡分別 check 左右眼時就開始扭擰, 之前仲識讀 H, 讀讀下唔知佢唔記得定係見攰 or 突然失憶竟然啞左?!  醫生哥哥叫佢努力 d 仲眼紅紅喊埋出黎, 我真係想死!!  咁都可以喊真係想柄佢, 好在醫生哥哥見慣大場面識用小禮物氹下佢都收聲, 不過我唔係好明點解要用英文字母 check?  又 U 又 V 又 A 又 H, 一個唔覺意好易攪錯架喎, 咁細個小朋友 check 視力唔係用上下左右既 E 示意會好 d 咩?  小慈冷靜之後, 醫生哥哥請小慈睇圖畫, 佢用電筒檢查小慈斜視散光眼結構, 最後話冇問題

衛生署隨機抽籤抽中小慈做 "香港家長餵養幼兒及兒童營養調查", 所以見姑娘做發展監察之前就要填一份問卷, 都有 6 頁紙咁多, 考究到連小慈飲左幾多匙湯, 食左幾多片肉, 全日飲左幾多 ml 水都要填晒, 非常認真, 之後仲要跟進再填 48 小時既飲食習慣, 因為記錄平日, 所以會勞煩到學校老師 @.@

見姑娘時佢俾份問卷我睇, 如果所有答案係 "否" 就即刻走得, 份問卷係咁既:

1. 你對孩子的生長狀況例如過胖, 過瘦等, 感到疑慮

2. 你對孩子的飲食狀況例如營養不均, 偏食等, 感到疑慮

3. 你對孩子的聽覺例如對聲音的反應等, 感到疑慮

4. 你對孩子說話時發音不清, 感到疑慮

5. 你對孩子的發展狀況例如動作協調, 語言能力等, 感到疑慮

6. 你或老師對孩子的學習能力, 感到疑慮

7. 你或老師對孩子在家中或學校的行為表現, 感到疑慮

我對以上調查冇疑慮係唔係就要走?  姑娘話唔係, 循例姐, 再問我有冇野想問, 覺得個女有冇特別問題?  梗係有啦!  我覺得佢太黐身, 同埋好情緒化, 頭先檢眼都可以喊!  仲有含飯問題都好困擾!!  姑娘個樣好似聽慣聽熟咁, 定係香港小朋友十個有八個都有呢 d 問題呢?  姑娘解答話小慈冇自信心所以好怕離開父母, 叫我多 d 讚佢俾鼓勵佢, 含飯問題就叫我整個獎勵表, 幾多分鐘食完就有一個貼紙, 滿幾多個貼紙就有獎但唔好係物質, 最好係獎佢去邊度玩, 獎佢聽一個故事等!  姑娘講完我繼續望住佢, 心諗你係唔係耍我想我快 d 走?  你 d 答案駛唔駛流成咁呀?  可能我個樣出賣左我, 姑娘好似知我唔滿意, 即刻起身攞張 Department of Health 24-hour Central Health Education Hotline 俾我, 話入面有好多野聽叫我打去, 好!  但為咩事要我聽英文呢?  姑娘真係好抵死, 佢話咁岩中文單張派晒, 不過電話一樣, 打去 press 2 for Cantonese 就 ok 喎~

是但啦, 小慈真係有 d 咩事我都唔會等健康院排期架啦, 仲唔第一時間搵醫生問人咩?!  我自問都盡媽媽本份, 平時遇到咩問題都即刻請教高人, 不過有 d 野係真係唔急得 / 逼唔到小慈咁解!  Anyway, 小慈除左瘦左 d 黐身 d 之外, so far 都好 ok, 健康快樂係最先要既!  

小慈, 加油!!