初三團拜

新年對於我地屋企黎講算係好清閒, 大年初一去姑婆屋企團拜, 初二休息, 今日初三秋秋既舊公司同事上黎團拜, 連埋我地 5 家人總共有 11 個大人 2 個 bb 4 個小朋友!!  屋企好耐冇試過招呼咁多人, 而大家上黎既目的只係得 1 個 -- 秋秋水餃!!

大年初三, 仲以為香港係一個全年無休既城市, 點知原來街市係冇水餃皮賣攞, 我同秋秋行晒沙田 5 個出名既街市, d 舖頭唔係冇開門就係冇貨, 話最快要到初七先會返水餃皮, 好失望呀!!  點算呀?  點招呼人呀?  盆菜都訂唔切, 打邊爐我屋企又唔夠爐, 真係企左係度 @.@  無辦法之中既辦法係樓下酒樓訂位先啦, 真係失禮!  好在大家都係志在聚舊, 唯有過左年再原班人馬上黎食餐飽!  小慈最鍾意人地上黎我地屋企, 佢同瑤瑤玩得好開心呀

估唔到屋企都可以質到咁多人

小朋友們玩到唔捨得走

花絮:

今朝朋友仔未到時, 小慈小明兩個自己玩, 屋頭追屋尾笑到卡卡聲, 我同秋秋樂得清閒攤左係梳化睇電視, 突然聽到小慈大喝一聲

"你諗都唔好諗呀!!"

咩事?  只見小慈擘大手腳加埋支花市買既火箭槍欄住廚房門口唔俾弟弟入, 而弟弟就決定硬闖, 於是小慈就對佢大叫: "你諗都唔好諗呀!!"

真係笑死我喇!  小慈呢個家姐角色係做得好好, 非常盡責咁管住弟弟, 簡直係我既翻版, 我點樣同弟弟講野, 教弟弟做咩玩咩, 小慈都學到十足十!!  佢係一個好幫手, 好管家, 不過, 我冇教過小慈講呢句 "你諗都唔好諗" 喎!  於是我問小慈:

我: "邊個教你講諗都唔好諗架?"

小慈: "呀 Ro 攞"

我: "邊個呀 Ro 呀?"

小慈: "Barbie 公主入面個個呀 Ro 呀!"

Oh My God!  小慈既卡通片癮似乎中毒已深, 呢套 Barbie 係 Connie 姨姨極力推介小慈睇, 話入面 d 歌好好聽, 內容好正面, 肥妹姐姐日睇夜睇云云..... 我一直好抗拒俾小慈學跳芭蕾舞呀, 玩 Barbie 公仔呀, 好怕 d 粉紅色既野, 更加怕小慈嬌滴滴有公主病!  我唔係一個好女仔既女仔, 太 lady 既野會嚇親我, 識我既朋友都知我從未買過一件粉紅色既野俾小慈, 女仔有 d 男仔性格好 d 既, 爽快 d 爽朗 d, 當然我唔會太極權, 小慈將來自己話鍾意我都會俾佢, 但我唔會強化亦都唔會鼓勵佢用 "粉紅色" 

講遠左, 返番黎先, 係, 於是我即刻開番呀 Ro 黎睇, 係 Barbie 系列之森林公主, 套片當年似乎係一個大製作, 有潘芳芳配音, 唔開由自可, 一開不得了, 小慈已經識唱晒入面既歌, 又真係幾好聽喎 ^^

故事話呢個 Barbie 因為沉船意外, 好細個就沖左去荒島仲失左憶但俾動物救左, 係隨身物品入面搵到一個爛左一半既名牌寫住 "Ro" 先知自己個名, 有一日, 一個愛冒險既王子去左呢個荒島探險, 差錯腳跌左落鱷魚湖, 長大左仲學識各種動物語言既 Ro 出現就係同鱷魚講 "你地諗都唔好諗, 一啖都唔可以咬王子呀!"

真係幾好睇喎, Barbie 心地善良又靚又溫柔, 唱歌又一流, 真係人見人愛, Connie 姨姨冇介紹錯!