今日廁所要界磚同埋安裝浴缸, 又係嘈足全日兼且沙塵滾滾, 都係走罷啦~~
昊昊有咳 & 鼻水謝絕探訪, 於是我地一早就去嫲嫲屋企打攪, 嫲嫲煮左好好味既瘦肉瑤柱豬骨粥, 小慈小明兩個非常俾面咁食左好多, 嫲嫲好開心! 食飽全家一齊瞓, 個情境係幾好笑既 -- 嫲嫲爺爺瞓床, 小慈瞓梳化, 弟弟舖左地墊瞓地下, 我同工人姐姐就坐係張椅子趴係枱面休息.....
舟車勞頓真係好辛苦! 等小慈小姐瞓醒就趕去 Mega Box 上 Music Wonderland, 車出車入真係唔係我強項, 不宜做司機呀我, 不過為左對寶貝仔女, 冇計啦! 呢張相係偷影架, Music Wonderland Miss Tsang 好嚴, 要最後一堂先俾影相架 :p
上完堂又返去嫲嫲屋企同爸爸匯合, 終於可以交番架車俾秋秋, 平時指佢去呢度去個度都冇聽佢話渣車好辛苦, 老公你真係好勁呀!! 我已經攰到想 c.......
廁所漏水, 已經困擾左我地好耐, 唔係幅牆剝落到一個頂唔順既地步, 我地真係唔想攪, 整廁所同整廚房好貴架麻! 機緣巧合之下朋友介紹左個師傅俾我地, 一睇就話係坐廁咸水喉生鏽硬化漏水, 要拆個坐廁出黎先睇到個漏水範圍, 如果裂到去外牆就要買第三保搭棚架拆牆黎維修咁就會大劑好多! 不過要 check 先知, 另外我地個廁所地台唔平, 渠口位更加凹陷去唔到水, 所以漏出黎既咸水就積住滲入晒地下 d 磚再滲埋出牆導致甩灰, 再加上浴缸邊 d 白英泥開始硬化龜裂, 有一條 3mm 既裂縫遲早又會再積水... 咁多問題都係要面對, 一不做二不休, 我地就黎個大裝修啦!
工程預計要一個星期, 星期五係 Day 1, 未開工前我已經同左師傅講屋企有個好細既 BB 會唔會有大影響要搬走佢呢? 師傅話只係有少少嘈, 落街行個圈就 ok, 仲話我地唔駛請假有咩電話聯絡, 雖然佢咁答但我唔放心, 秋秋都話佢請假係屋企監工, 男人對男人好 d, 於是 10:00 am, 一行 3 個男人殺上黎, 非常有效率地將我全屋既地板用膠墊舖好, 又用黑膠袋 cover 全屋傢俬, 咁大陣象都唔慌好野, 果然, 師傅話今日拆廁所, 拆浴缸, 拆牆磚, 拆地磚, 會沙塵滾滾同埋一直去到 6:00 pm 收工都會好嘈 @.@
下?!! 之前都唔係咁講既? 又話落街行個圈 ok?!? 秋秋都叫我放下晝假接走弟弟, 冇可能留係屋企, 佢而家已經落左樓下商場飲奶瞓覺, 做左 1 個半鐘街童架勒陰公! 咁仲有小慈呢? 於是打返學校同老師講小慈食完飯就走, 我冇理由接完弟弟去嫲嫲度又返轉頭接小慈放學, 梗係一車過啦, 秋秋要留守係屋企所以今日我要做司機! 我有 d 嬲個師傅攞, 明明問左你又話唔駛, 一早講我可以安排得好 d, 唔駛而家好似倒瀉籮蟹走難咁走, 哼!
12:30 pm 接小慈放學, 小慈好 high, 佢最開心就係我接佢放學架啦! 係學校門口等緊小慈出黎之際, 我裝到其他小朋友預備上床訓覺, 一張張細床仔並排, 一個小朋友瞓左邊, 一個小朋友瞓右邊咁, 個個自動自覺除風褸, 除鞋仔, 有辮除辮仲自己蓋被, 好得意呀! 近門口既小朋友見我裝裝下仲識叫我做 "恩慈媽咪"! 咁醒目既佢地?!! 冇幾耐就聽到 Bye Bye 郭恩慈之聲此起彼落, 小慈係學校都好受歡迎 ^^ 班主任郭老師拖小慈出黎同我講小慈好犀利, 話佢將小慈要早放學既原因講俾佢聽之後, 小慈用自己既理解講番俾其他小朋友聽, 佢係咁講既:
小慈: "我要走喇~~ 我屋企廁所壞左, 好多塵呀, 所以我要去嫲嫲屋企, 嫲嫲屋企冇塵好乾淨!"
同學仔: "你要唔要搭車架?"
小慈: "係 606 黎架!" (606 係嫲嫲既門號)
同學仔: "我係問你駛唔駛搭車喎?"
小慈: "啊~~ 都可以既...."
我一路聽, 郭老師同我都笑到碌地 :) 郭老師話小慈既理解能力真係好強, 表達又清楚, 佢係好短時間之內只係講左 1 次俾小慈聽佢就明晒, 好好呀! 平時郭老師都好鍾意同小慈傾計, 而小慈又好樂意將佢既野講俾人知, 所以老師對我地屋企都有好深切既了解.... 好在我地屋企冇咩唔見得光姐!
返到屋企, 小慈見到咁多黑色膠袋廁所又亂晒, 即刻同我講:
"真係喎, 廁所壞左喎! 入面冇晒野既? 黑蚊蚊 d 野好臭呀, 快 d 走喇媽媽~~"
於是, 抱住弟弟拖住小慈, 工人姐姐同我一人揹一個背囊, 再加多一個大膠袋裝住兩個 b 沖涼用既衫褲鞋襪, 毛巾洗頭水, 玩具, bb vcd... 一行 4 人逃亡去嫲嫲屋企! 小慈係車度瞓左 10 分鐘就唔肯再瞓, 監佢再係嫲嫲屋企瞓時就碌成半個幾鐘都瞓唔著, 我估佢心情太興奮! 反而弟弟食飽粥仔都肯瞓一陣! 兩姊弟有蝦餅食, 有 BB TV 睇開心晒
6:00 pm 師傅們收工, 我地都可以返屋企了!
爸爸出差返黎仲係有時差, 今堂都係由工人姐姐幫手! 弟弟瞓到 8:00 am 先起身狀態大勇, 完全冇喊過又冇扭計, 只係成日爬出地墊攪課室 d 野, 下下要我捉佢返黎! 吸收上次既經驗, 今次我叫姐姐呢埋唔好俾弟弟見到佢, 雖然弟弟隱約地知道姐姐應該出現係窗口附近, 手指指咁指住窗口幾次, 不過搵唔到又冇咩野
遊戲 1 -- 疊高 1 吋半至 2 吋既積木
弟弟識疊, 疊到 3-4 粒, 只係唔識放手同埋有時唔小心掃跌番, 未掌握到力度, 但佢係有意識疊高既, 練習多幾次應該 ok
遊戲 2 -- 配對相同物件
舉例將 2 個波 + 1 個公仔放係佢面前, 如果弟弟攞住個波 (通常男仔都會揀波) 咁就叫佢配番個一樣既俾你, 教佢講 "係喎, 一樣係波波黎架喎~~" 不過呢個係有難度既, 只係開始灌輸抽象既概念俾佢, 促進認知能力既發展而已
遊戲 3 -- 撕紙
俾 d 厚身少少既雜誌紙先撕開個角再俾弟弟撕爛埋佢, 促進手部功能既運用, 平時係屋企撕慣紙巾既弟弟完全冇難度, 只係個衰仔成日襯你唔為意就抽水食左張紙 @.@ 好在而家大個 d 都識分 d 野好食定唔好食, 趙左 2 下知道張紙唔好味都識皺晒眉頭咁吐番張紙出黎!! 正傻仔! 佢開始識分我先冇咁擔心佢會亂食野, 佢以前真係狗屎垃圾都放入口!
第 5 堂喇, 弟弟都開始習慣幼潛既模式, 雖然之前幾堂都係喊, 但佢喊住都學到野, 好似今堂咁, 張姨姨點名叫 "郭恩明" 佢又識望住人, 我幫佢舉手佢又好合作, 人地俾貼紙佢又識貼係心口唔扯走; 本來爬左去攪野, 聽到 "我們坐得好靚, 小朋友坐得好靚" 又識爬番埋黎我度坐我大脾; 用濕紙巾抹手就知道有餅食; 聽到 "小朋友拜拜" 就識做拜拜手, 嘴仔又講 bye bye, 醒醒目目咁真係好得人鍾意, 希望佢頂住唔扭眼瞓堂堂都咁醒就好啦!
我係一個幾好玩既媽媽, 通常陪小明小慈玩我會好多 "聲氣", 繪影繪聲咁吸引佢兩個注意! 近來教緊弟弟學動物既叫聲, 貓貓呀, 狗狗呀, 雀仔呀, 大笨象呀, 獅子老虎等, 咁多種動物之中弟弟只係肯學獅子叫, 一講獅子弟弟就會 "wow~~~" 一聲咁學獅子咆哮
今晚同弟弟玩車仔, 我將架車向前推時 "vee~~~" 左一聲, 弟弟可能覺得好有趣, 即刻接住架車再 "vee~~" 番俾我, 咁就學識左!! 爸爸即刻打蛇隨棍上咁教弟弟叫 "爸爸~~", 點知個衰仔唔睬佢繼續 vee~~ :DDDD
今朝未夠 7:00 am, 秋秋靜悄悄返左黎喇!! 一家大細都仲瞓緊, 攪到佢好似做賊咁躡手躡腳呢入房 XD
好慘呀佢, 搭左 16 個鐘頭飛機, 1 分鐘都瞓唔到真係眼光光, 所以一爬上自己張床唔夠 5 秒就瞓著, 陰公~~ 不過佢都唔瞓得耐, 小慈一起身見到咁大個行李箱係廳已經知道爸爸返左黎! 佢呢個星期差不多隔日就問我一次 "點解爸爸去旅行去咁耐都未返?" 又成日都要我打電話俾爸爸, 佢要聽爸爸把聲, 太掛住太掛住!
知道爸爸係房瞓緊, 佢都生性, 忍左 2 個鐘跟埋工人姐姐去完街市返屋企, 感覺上已經俾爸爸瞓左好耐好耐, 先入房爬上床騎住爸爸.....
小慈: "爸爸, 我好掛住你呀, 你咁遲先返黎架, 我等左你好耐喇!! 你搭飛機有冇驚呀? 有冇行雷閃電呀? 你係咪好攰呀? 我陪你瞓一陣啦, 好唔好?"
跟住真係去攞枕頭, 攞床墊, 又去攞公仔咁陪爸爸瞓一陣, 瞓到聽到我同弟弟打完針返黎先出房門, 秋秋都已經完全醒晒
弟弟一見到爸爸, 竟然俾左一個超級燦爛既笑容佢仲伸手要抱! 出埋佢隻爪爪手, 近來學識想要一樣野, 佢對手就會伸直然後爪下爪下, 成支自動不求人咁, 笑瓜我! 真係史無前例架, 平時弟弟同爸爸冇咩兩句, 呢個星期都冇咩唔妥, 只係成日玩玩下係度叫 "呀爸, 呀爸"! 秋秋已經好開心, 估唔到弟弟咁細個都掛住佢! 一般黎講異性相吸既弟弟係唔會要爸爸抱, 所以今次都係弟弟第一次向爸爸伸手 ^^
今日小慈只要有機會就一定要爸爸抱, 全日都爸爸爸爸咁叫, 氹到秋秋攰到就黎死都要抱住佢
不經不覺, 小慈已經返學讀書 1 年有多, 今日老師派手冊, 原來有度高磅重! "體重體高記錄表" 每個月都會填寫一次, 由 2008 年 9 月入讀 N1 時重 10 KG 高 91 CM, 到而家 K1 上學期尾有 13 KG 重 97.5 CM 高好有進步架喇, 小慈整個 2009 年都企硬係 12.5 KG 完全冇重過!! 今次終於見到佢有突破, 真係好開心!
仲有一樣野令我開心就係老師填寫既 "在學校生活表現", 2009 年 12 月份, 小慈終於全部都有良好表現, 總共有 18 個 tick!! All Pass~~~ 成功喇 ^^
1. 願意嘗試各種食物
2. 能自己進食及保持清潔
3. 能自己入睡及不會騷擾別人
4. 在飯前及便後有洗手習慣
5. 遇到困難時, 懂得尋求協助或解決方法
6. 能合理表達情緒
7. 對人有禮貌
8. 與別人融洽相處
9. 樂意幫助別人
10. 能接納老師的勸勉
11. 有應對能力
12. 能專注於學習活動
13. 能遵守日常規則
14. 能獨自進行學習活動
15. 愛惜玩具及公物
16. 用完的東西會放回原位
17. 自我照顧能力 (穿衣 / 穿鞋 / 穿襪 / 梳頭 / 摺被)
18. 能保持衣履及儀容整潔
小慈一直最差既就係 1 & 6, 佢其實咩都肯食, 不過食得慢一直都係佢既死穴, 又會食到中眼訓要老師餵佢 @.@ 不過近期偶爾聽到佢返黎話自己食早餐食第 1, 老師又話佢有舉手添食, 我都知佢努力改進緊
至於 6, 點解佢唔能夠合理表達情緒呢? 咪就係每次我送佢返學一到 bye bye 媽媽就喊, 小慈好怪架, 岩岩開學唔喊, 放完長假要返學都唔喊, 係你估佢唔到時就無情情喊到死去活來!! 9 月冇事, 10 月初既時候逢星期一返學開始喊, 如果星期一冇喊就星期二喊番, 整整下星期三四五日日都喊!!!
我極度費解, 明明一早起身返學冇野好開心, 仲識同我講返學唔駛喊, 有好多老師錫佢云云... 跟住返到學校換完鞋仔都仲冇事, 係一準備入課室同我 bye bye 就黎料..... 每次我都唔理佢即刻轉身走架啦, 硬頸既小慈咩都唔理就喊俾你睇!! 佢又唔係喊好耐喎, 通常我走左佢喊一陣就收聲, 跟住全日都好開心好投入學校生活, 就係唔明點解一同我分手就喊??!??
已經冇同佢轉校直升上去, 仲要 2 個班主任跟埋一齊升班都攪成咁, 你話我唔沮喪就奇啦! 成個 10 月 11 月都係咁, 一個星期總有 1-2 日係喊既! 我同班主任商量左好耐要好明確咁同小慈講
"唔係返學唔喊, 係 bye bye 媽媽唔喊"
問你死未!? 我個女就係咁! 攪左好耐, 情況持續到 12 月, 老師用大貼紙貼係 whiteboard 引佢, 3日唔喊先俾個大貼紙佢帶返屋企, 個貼紙足足貼左 2 個星期先得呀!
之後我接手, 同佢講唔喊個日放學就送禮物俾佢, 其實都係羅番屋企收埋左既玩具俾佢玩, 叫做氹下佢, 可惜呢招有破綻, 聰明既小慈真係日日都問我攞禮物! 不過我都識變陣, 我既禮物已經變成一粒糖, 一個擁抱, 一個 kiss, 一句讚美, 甚至同佢一齊玩玩具都叫做係禮物! 我唔鍾意佢學識左講
"你有冇禮物送俾我呀?"
唔單止同我講, 有時我 d 朋友上黎探我佢都係咁問人攞禮物先衰麻! 我咪唯有薄責佢兩句唔可以貪心, 唔係所有人都要俾禮物你架.... 之後, 放左咁耐聖誕假再返學又冇事喎, 仲已經 meet 甩左問我攞禮物既習慣添! 又變番好乖好生性, 所以老師俾 18 個 tick 佢!!
小慈, 加油呀! Bye Bye 媽媽係唔會令到我消失架! 媽媽放工就會返屋企見你啦~
逢星期一, 小慈都必定有功課要做, 仲至少有 2 樣功課添!
"故事幼塗樂" 係練習連線同埋油顏色, 小慈最樂意亦都可以自己完成, 令我有壓力既就係 "新聞分享", 真係唔係次次都遇到好新聞 or 岩小慈既新聞可以剪返去同老師同學分享架麻! 所以我而家差不多日日都要睇報紙, 一見到有岩既新聞就即刻剪起佢以備不時之需! 老師都成日係我面前讚小慈, 話新聞分享佢真係講到內容, 表達清晰, 好勇敢講得好大聲 ^^ 算佢啦!
今日仲好笑, 當小慈照常係書枱油顏色做功課, 我就係度幫佢執書包之際, 我好自然哼歌唱左句:
"試問我也不是你~~"
專心油緊顏色既小慈竟然接口: "沒絕對勝利~~"
係呢一刻, 完全 out of my expectation, 我真係好錯愕!! 跟住就爆笑 :)
小慈呀小慈, 你真係我個女黎架! 我開心得好緊要! 第一, 我完全估唔到佢識唱呢首歌!! 第二, 我估唔到小慈會同我合唱, 仲要接得咁好完全冇甩 beat, 岩晒 key, 咬字仲要好正添! 真係笑死我呀! 第三, 我地只係間唔中睇電視絕對唔係電視精, 放工返屋企只係睇畢打同埋新聞, 我冇教亦都唔打算教小慈唱時代曲, 係都大 D 先啦, 但估唔到聽聽下潛移默化小慈就學識左! 所以更加提醒我要留意自己既行為舉止, 小朋友模仿左你都不自知架!
小慈, 媽媽覺得你音樂方面真係有 d 天份, 我絕對相信小慈係可以同我二部合唱既, yeah 諗起就開心~~
睡前故事時間, 今晚攞番本我一早買左既兒童聖經同小慈讀下, 呢本兒童聖經全名叫 "幼兒聖經故事之天父愛我", 故事好簡單, 話牧羊人有 100 隻羊仔, 有一晚唔見左 1 隻, 於是牧羊人放低 99 隻羊, 行左好耐, 去左好多地方都要搵番佢走失左既羊仔, 途中遇見唔見左 $1 既婆婆, 離家出走既敗家仔, 國王請飲, 將屋建在沙地既叔叔...... 等, 將好多聖經故事串連埋一齊, 只係想表達一個意思 -- 天父愛我!!
小慈未明白內裡既深層意義, 不過對於牧羊人千辛萬苦, 不怕困難咁搵番佢失去左既 1 隻羊仔表現得好開心, 我仲教埋小慈唱我最鍾意既一首詩歌 -- 我是主的羊
"主領我, 到青草地安歇在溪水旁黃昏時主與我一路同行牧場上, 主的羊都得飽足, 心快暢我是主的羊青草地, 溪水旁, 黃昏時, 有主與我同行黑暗夜, 路崎嶇, 每一步, 跟隨主行"
係我既美妙歌聲底下, 唱唱下小慈就瞓著左.... 天父比我更愛你呀! 小慈 Good Night
zzzZZZZzzzZZZZzzzzZZZZZzzzzzz
上次短聚唔夠皮, 今日既然大家都得閒就一齊去迪士尼, 天氣溫暖陽光普照最適宜戶外活動! 第一件事衝去玩水, 好在小慈同琳琳都玩得好斯文冇濕身
去完迪士尼食埋壽司先返屋企, 小慈近來都愛上左食壽司, 最鍾意食橙色一粒粒脆卜卜既蟹子, 不過佢食量唔多, 通常叫一個蟹子手卷俾佢, 食晒都已經飽飽!
食完飯去停車場攞車, 呢個停車場我都係第 1 次黎, 唔係好熟路樓底又矮燈光又唔足, 搵左好耐都搵唔到個繳費處, 一個女人拖住個女, 係一個陰陰森森冇咩人既停車場度亂行你都咪話唔驚! 就係呢個時候, 小慈竟然拖我再實 d, 用另一隻手摸我手背, 當我好似狗仔咁一下一下咁摸, 好溫柔同我講:
小慈: "媽媽, 唔駛驚架! 我會保護你架! 唔駛驚唔駛驚, 有我係度, 我會陪住你!"
呢個傻妹, 耐唔耐就會講出一 d 好窩心既說話, 都唔知點解佢會識講, 又用岩場合喎~~
小慈, 你真係好得人鍾意 ^8^
爸爸出差, 今堂由工人姐姐幫手, 一如以往, 弟弟都係處於眼瞓階段, 想玩但好眼瞓所以炆爭非常! 見到工人姐姐仲衰, 完全喊到收唔到聲, 係咁指住度門眼尾望住窗口係都要出去....
遊戲 1 -- 唱 "手指歌" & "五官歌"
用毛毛擦擦弟弟手指仔配合歌詞唱手指歌, 弟弟都好有興趣, 俾個毛毛擦擦過手背時仲笑添! 可惜唱五官歌就唔制勒, 平時我地唱呢首歌等弟弟換片乖乖地架麻, 唔知係咪佢聽到以為我地監佢換片, 所以喊得好大聲 @.@
遊戲 2 -- 手指畫
為配合手指歌於是我地玩埋手指印畫, 已經喊緊既弟弟俾我監佢著圍裙穿手袖更加喊到收唔到聲, 完全唔肯埋枱坐低, 更加唔肯伸隻手指出黎點顏色.... 真係徙氣 @.@ 反而小慈玩到好開心, 印左 5 -6 隻顏色後頂唔住自己太污漕先收手
遊戲 3 -- 穿隧道
又到大肌肉時間, 今次要小朋友爬! 爬高, 爬低, 爬斜路, 爬樓梯, 爬隧道..... 個個 BB 都好似有自我保護機制咁, 爬完斜路要落樓梯, 全部都會自動自覺擰轉身用腳落先, 唔會一頭盅落去, 好醒! 弟弟都仲喊緊, 點知我推佢入條隧道佢係喊住咁爬, 爬到出黎竟然笑晒, 跟住就 non-stop 咁爬左好多次隧道! 連帶心情都轉好, 所有爬既野全部都玩晒先落堂, 哈!
今日難得地約左琳琳一齊 tea, 我真係好耐冇同過我既契女出街! 不經不覺, 琳琳已經 7 歲, 伶牙俐齒反應又快, 出奇不意地係個手袋仔度攞部 MP3 機出黎同我講:
"我好鍾意聽電燈膽架, 岩岩先聽完紅綠燈!"
Oh my God~~ 琳琳, 冇見你一排成熟左咁多既? 我仲以為自己眼花睇錯你已經 17 歲添! 原來而家 d 小朋友既品味已經與大人無異?!? 我好似琳琳咁大個時, 我仲係唱緊小忌廉 / 藍精靈十分勁咋...... @.@ 琳琳, 一直以來契媽都知你係一個非常聰明而又有個性既小朋友, 不過童年好快過架咋, 唔好急住要扮大人呀, 傻妹!
小慈已經唔係好記得琳琳姐姐, 初見面時仲有 d 怕三保要我拖住, 不過好快已經俾琳琳既熱情溶化左, 兩個妹妹一齊食麥樂雞薯條玩點醬笑到收唔到聲, 琳琳仲將條薯條混醬 (甜酸醬 + 茄汁) 咁食, 同我講佢條薯條流鼻血, 真係笑到我碌地, 古靈精怪 XDDDD
開心!
由弟弟 8 個月大坐得穩陣開始, 小慈已經好鍾意同弟弟玩, 又會好似我咁好肉緊攬住弟弟黎錫, 又摸佢個頭又 meet 佢面珠, 有時肉緊得滯都會推跌弟弟 or 整到佢喊, 不過我就好 take it easy, 唔係流晒血起晒高樓個隻我都好少干涉佢地, 只係會提小慈細細力斯文 d 就 ok
其實應該要保持呢種心態, 大人既干預有時會窒礙兄弟姊妹發展感情, 試諗下, 如果你不論做 d 咩, 下下俾人話住, 仲一定係你錯, 你都冇引再做落去, 多一事不如少一事, 呢埋一二邊好過, 唔做唔錯, 好正常既心態, 仲會覺得爸爸媽媽偏心! 我細個就經常係咁, 同細佬玩次次俾人鬧個個都係我 V___V 所以我細個同細佬既關係超差, 冇咩兩句....
而家既我身為媽媽係唔會再俾呢 d 野發生係我既小朋友身上!! 我既宗旨 -- 積極不干預 ^^
1 歲開始, 弟弟已經表現出佢既性格, 小慈去邊佢就去邊, 小慈玩咩佢又要玩, 一見小慈對手渣住咩佢都會想羅, 咩都唔執輸, 仲好似覺得自己無所不能, 同小慈看齊! 小慈都唔係善男信女, 好多時候為左唔俾弟弟搶佢玩緊既玩具就會擰轉身 or 將件玩具放上頭頂唔俾弟弟羅, 雖不至於會出手推弟弟, 但拉扯間有時都會整跌弟弟, 個衰仔又好好戲, 有時跌親其實係唔痛, 但佢係因為不甘心搶唔到玩具所以大喊!!
係呢個 moment, 對事唔對人既我係會 NO 弟弟, 訓話佢搶小慈家姐玩具唔岩, BB 都要學排隊架麻... 云云... 跟住我由得弟弟喊架! 不過小慈真係錫弟弟, 有時佢見弟弟喊得咁淒涼, 佢都玩得唔安樂, 佢會咁講
"弟弟唔好喊, 你好想玩係唔係? 好啦, 俾一個你啦, 唔好喊喇, 乖, 小慈家姐錫番, 冇事喇, 冇事喇~~ 我好愛你架~~" 起勢咁摸佢個頭又啜佢一啖! 我聽到真係好安慰, 但有時反而有 d 擔心如果小慈太錫弟弟, 將來唔知會唔會俾弟弟蝦番佢轉頭? 不過, 到時先算啦, 睇住弟弟黎教
一直以來我地都最鍾意餵弟弟食野, 弟弟又為食喎, 俾咩佢都食, 就算喊到就黎斷氣, 一俾野佢食就即刻收聲, 佢食野個樣又好得意, 好似唔駛點趙就吞左架喇, 跟手又問你再羅! 近來仲學識望住想要既野, 會伸直手臂兩隻手仔爪下爪下咁郁, 好好笑, 連小慈都好樂意餵弟弟食野, 不過小慈餵就要金睛火眼睇住, 有時太大舊有時太細粒小慈未識衡量
今晚有一個情景令我好感動, 就係我俾羊奶片弟弟食, 小慈又想食, 小慈竟然 "呀~~~" 咁擘大個口示意弟弟餵佢, 弟弟又真係餵小慈食, 跟住小慈就話 "弟弟輪到你喇", 咁又到小慈餵弟弟食羊奶片, 兩個係度互餵真係好 sweet 好 warm, 開心到我飛起! 最衰羅唔切相機!
小慈, 小明, 你地要相親相愛呀~~ 係呢個世界上, 家姐只有一個弟弟, 弟弟只有一個家姐, 你地係一輩子既朋友黎架 ^^
自從小慈上次學校聖誕慶祝會表演過 cat walk 之後, 似乎刺激左佢潛在既表現慾! 最近我地經常玩一個叫 "出場" 既遊戲, 首先小慈係會呢埋係大門既走廊位...
我: "有請 K1 郭恩慈出場~~~" (大力鼓掌)
小慈就會一路揮手一路行出黎, 笑晒咁
我: "恩慈, 你今日會為大家表演咩野呀?"
小慈已經表演過唱歌, 打鼓, 拋高枕頭再接番, 跳繩, 吱弟弟... 等等
今晚既表演更令人喜出望外, 小慈話:
"我今晚表演飲奶奶~~"
冇欺場架, 1 分鐘飲晒 1 支 8 安奶 :DDDDD
心情大好既弟弟亦駛出佢既絕招 "電眼" 回饋小慈家姐! 此招一出真係所向無敵, 見過佢電眼既人無不發出會心微笑!!
弟弟對眼咁大, 咪一半真係殺死人, 不過影相係感覺唔到只係以為佢合埋對眼
都唔明點解老公每次轉新工都可以出差! 佢就視為苦差, 千萬個唔願意去, 反而我就羨慕非常, 可以去咁多唔同地方見識, 雖然都係返工, 但心情點都係輕鬆 d , 又可以行開下, 散下心, 食好野, 幾好呀!
今次秋秋要去美國, 雖然要去 11日真係好耐, 但我好開心因為佢終於簽到美國 visa, 仲係 10 年貨仔個隻! 衰左 2 次, 今次終於簽到, Yeah~~ 好開心~~
尋晚幫佢執行李執到 1:30 am, 雖然好眼訓, 但我執到好 high, 原因係有個靚媽介紹左我用 d 好野 -- 非常實用既高清儲物袋, 四四方方, 放咩入去都一目了然, 雙拉鍊設計手工好好, 又冇臭膠味, 仲要超實用又唔貴, 真係要錫你一啖呀, 多多!!
小慈見我地咁忙碌, 屋企又多左個行李箱都知有 d 異常, 於是我就同佢講
我: "小慈呀, 爸爸要去旅行, 佢要去搭飛機好耐好耐之後先返黎架"
小慈: "係呀? 咁媽媽駛唔駛去旅行架?"
我: "媽媽唔駛"
小慈: "爸爸, 你要小心 d 坐飛機呀! 係飛機上面急呢, 你要去廁所架, 唔好整污漕張櫈喎~~"
我同老公已經爆笑, 不過小慈好認真繼續吩咐爸爸....
小慈: "飛機個度呢, 會有行雷閃電架, 不過唔駛驚, 媽媽有攬住我, 你都唔駛驚架!" @.@
非常驚人既記憶力!! 小慈之所以咁講, 因為我地上次同佢去沙巴架飛機就係因為遇到大雷雨降落唔到, 估唔到隔左咁耐小慈仲記得, 提起飛機就聯想到, 好犀利呀!
小慈 10 個月大時爸爸第 1 次離開佢, 以為佢仲係 BB 咩都唔識, 點知 3 日後就黎料, 係又喊, 唔係又喊, 食野又喊, 玩玩下一秒前仲笑, 下一秒又大喊, 完全唔知佢咩事, 嬲到我彈起!!! 又唔係病, 又唔係出牙, 又唔係受傷, 喊咩先得架?! 唯一既可能性就係掛住爸爸! 初初我都唔信, 但小慈真係扭足咁多日.... 終於帶埋佢去機場接爸爸機, 一見到爸爸落機即刻笑到見牙唔見眼, 之後就不藥而癒冇再無端端扭計, 變番正常 BB 一個, 唔到你唔信!!
唔知到而家, 3 歲 8 個月既小慈 & 1 歲 1 個月既弟弟又會唔會掛住個老豆呢? 今次仲去 11 日.... 真係拭目以待.....
今朝 7:30am
小慈: "媽媽, 今日駛唔駛返學呀?"
我: "小慈放假唔駛返學, 不過媽媽要返工!"
小慈: "點解你要返工既? 返工做咩野呀?"
我: "返工賺錢買玩具呀, 買奶奶呀, 買尿片, 買餅餅俾小慈同埋弟弟羅"
小慈: "我都想返工呀!"
我: "你咁細個唔可以返工架, 媽媽返工賺錢, 小慈返學讀書, 弟弟大個 d 都會好似小慈家姐咁返學讀書, 你要俾心機讀書, 學多 d 字遲 d 講故事俾媽媽聽知唔知?"
小慈: "嗯~~ 媽媽你要小心渣車唔好撞車呀!"
放工返屋企
小慈: "爸爸, 媽媽你地返黎拿? 返工係唔係好辛苦好攰呀? 我幫你揼骨丫~~"
小慈: "媽媽你坐低啦, 係唔係呢個位呀? 係唔係好舒服呀?"
小慈: "爸爸返工都好辛苦, 爸爸都要揼骨架! 揼完後面揼前面先..."
爸爸: "前面唔駛揼架"
小慈: "揼左好 d 既.... 咁, 不如我同你鍊骨丫, 要鍊膊頭架喎!"
小慈: "我都好辛苦呀, 到你地幫我鍊喇~~"
我: "下? 你都唔駛返工, 點解你會好辛苦既?"
小慈: "係呀, 梗係辛苦啦, 我幫你地揼骨好辛苦架麻~~"
真係唔該晒你呀, 小慈 XDDDDD
多謝美麗姨姨邀請, 今日係佢屋企開新年大派對! 呢間屋真係好舒服, 尤其誘人既就係呢張按摩椅!! 估唔到小慈小明都要試下, 3 仔爺層層疊真係攪笑呀 :DD
多謝美麗姨姨既熱情招待, 我地今晚真係玩得好開心 ^^ Happy New Year!
今日幼潛黎到第 3 堂終於可以影相!! 因為呢度地方夠大活動空間夠多, 小慈同埋爸爸都可以入課室一齊玩 :) 唔知係弟弟瞓到 8:00 am 先起身精神夠, 定係見到小慈同埋爸爸係晒度一齊玩好開心, 弟弟今日表現好好, 只係扭左少少計, 有野食有野飲就即刻笑番!! 肯自己玩, 肯參與遊戲, 終於表現正常, 媽媽好開心啊!!
熱身時間 -- 弟弟見到張姨姨攞玩具箱出黎已經興奮大叫, 自己扭落地爬去攞玩具玩, 又唔駛我抱, 又唔駛我陪都知佢心情大好!!
遊戲 3 -- 障礙賽 -- 訓練大肌肉, 弟弟都行得唔錯! 話咁快就落堂, 下堂都要咁乖呀, 弟弟!
