之前同朋友跟料理達人 Rachel 學煮泰菜, 就係因為自己同秋秋都好鍾意食泰國野而竟然有人會開班授徒!! 初時我係當自己觀光客身份去食餐飯架咋, 點知 Rachel 教得好好, 學完之後亦發覺好容易煮, 去一轉九龍城就可以買齊材料!
我今日放假, 陪完小明返學 11:45 am 即刻搭巴士出九龍城買野, 可惜一落車就滂沱大雨, 唔通連個天都唔鍾意我買送煮飯?! 終於我買齊所有野揹住一個背囊, 另加左右兩個環保購物袋先裝得晒, 行足九條街差不多行晒成個九龍城先搵到架巴士搭返屋企!! 落車已經 2:30 pm 成個人散晒~ 不過睇下我係昌泰買既戰利品
好, 開工!! 先整楊枝甘露因為甜品要雪凍先好食, 小慈有幫手 meet 西施柚, meet 兩下又偷食一啖, 係咁話好味好味, 屋企冇 B 仔高速攪拌器, 諗住我冇可能整到芒果蓉架喇, 點知原來可以用以前用黎打肉碎整糊仔俾小慈小明個個 Uncle P! 好野~~~ 真係得呀! 可惜我冇磅, 唔知 40g 既糖係幾多, 於是淡左 d, 不過都好靚仔
香茅胡椒炒肉蟹 -- 今日買到 2 隻大肉蟹要 $200 , 放左係廚房地下等死, 小慈小明耐不耐就入黎探佢地, 又摸又篤眼又 hello crab 又話佢地瞓左要細細聲咁, 真係笑死! 諗住佢地對左半日有感情, 點知爸爸一放工返黎, 小慈就大叫: "爸爸, d crab 等緊你劏左佢地呀!" 有高手係度唔駛 10 分鐘就劏好洗乾淨, 勁呀爸爸 ^8^
柚子海鮮沙律 -- 我有跟足 Rachel 灼熟魷魚同蝦之後即用凍水浸, d 魷魚真係好爽好爽, 沙律汁又好好味, 工人姐姐讚不絕口, 連唔食沙律既爸爸都食左好多! 小慈係我預備材料既時候已經偷食左好多蝦米花生椰絲, 蝦米簡直就係佢既至愛, 每隔 2 分鐘佢就入黎偷走一隻, 好在我買左兩包蝦米咋 XD
冬蔭公蝦湯 -- 我用蝦頭蝦殼煲湯既時候, 小慈已經話好香, 我冇放指天椒同埋俾少左一湯匙泰式酸辣膏, 小慈都係話好辣飲唔到, 可惜可惜! 顧此失彼, 爸爸就嫌唔夠辣囉! 哼, 全家得佢食辣, 我同工人姐姐覺得岩岩好, 我叫佢自己加兩匙辣椒油佢唔加之麻!
加料: 泰式香葉包 -- 上次係 Rachel 度食完真係覺得好好食, 昌泰原來有現成香葉包賣, 返屋企砌碎 D 材料就得, 因為份量都幾多, 再買多一包明襟葉就岩岩好! 呢味全家一致好評, 我冇 Rachel 個 d 靚靚小碟, 用左小慈隻飯碟頂檔 :P
你睇呢隻為食貓, 淨係食蟹都飽, 佢個碗飯係冇食到既!
小慈好鍾意芒果, 不過佢太飽已經食唔落話聽日再食過!
雖然我由 3:00 pm 煮到 8:00 pm, 從來未試過煮一餐飯用左咁耐時間!! 坐低時先 feel 到腳軟, 不過見到小慈同秋秋, 仲有工人姐姐都食到 lam lam 脷個樣真係好有滿足感!!
多謝你呀, Rachel, 以前我唔敢入泰國雜貨舖架, 而家肯定會成日蒲昌泰 :)
沒有留言:
張貼留言