小明返 N1 適應班

小明 1 歲 9 個月就返學?!!  唔駛擔心, 原先呢 3 日係適應班俾家長陪返學既, 校長就話都請埋小明一齊返黎玩, 見下 d 同學仔同埋老師, 到 12 月佢滿 2 歲先正式返學, 所以, 冇錯!  全班最細係佢 ^^  

弟弟要返學小慈都好開心, 一早起身已經為弟弟介紹書包, 書包入面放片片, 體溫紙, 替換既衫, 毛巾用黎抹汗, 仲有功課袋裝通告, 活動冊, 圖書, 又吩咐弟弟要著波鞋返學, 佢下星期一 9 月 6 日先開學云云, 一輪嘴聽到小明一頭霧水 :DDD

搭 1 個站火車返學

小明好鍾意個書包揹住唔肯除, 不停講: "弟弟揹書包囉!"  好似好自豪咁 ^^

大家見佢人仔細細揹個書包大佢咁多都覺得好攪笑

早到左學校未開門, 係公園玩住先 

小明好想玩滑梯但點都唔肯除書包!

見到同學仔吳綺澄, 佢大弟弟 7 個月, 澄澄好斯文淡定, 叻女!

佢兩個都係綿羊組, 仲有熊貓組同長頸鹿組, d 名真係好攪笑, 全班 19 個同學, 7 個係女仔, 班主任係連老師

學校今年唔俾影相有 d 可惜, 小明今日表現都唔錯, 肯坐定定玩玩具, 收拾玩具去地墊點名本來肯自己坐, 點知原來佢係想走去攞連老師手上面隻公仔先行開, 攞唔到公仔即刻返轉頭要坐我大脾  @.@  不過都好醒目咁叫 "到!"  

聽 5 隻鴨仔既故事又好專心, 係咁手指指又多多野講!  屠老師話弟弟個樣好 BB, 有 d 小朋友高佢成個頭!  連玉姐都話弟弟明顯醒過當年小慈好多, 大膽過家姐, 又獨立外向,  好在咋!  男仔之家成隻樹熊咁我都唔知點算!?  Kwok Young Man, 你要 man d 呀, ok?

排隊洗手食茶點, 果然弟弟 "阿門~~~" 最大聲, 自己吉蛋糕, 自己捧杯飲水都做得好好!  

大肌肉時間先做熱身唱 

"熊人熊人快樂笑, 熊人熊人蹦蹦跳, 熊人熊人轉個圈, 邊個今日最攪笑"

跟住玩車車滑梯, 弟弟又係玩到唔捨得走, 要佢入番課室就喊, 唔肯坐手指指要出去再玩, 好在有禮物派就好快收聲

係佢最鍾意既 Mickey 呀!

又搭火車返屋企, 唔駛度啦, 有排都唔駛買車票

巡視業務中

弟弟今日都好開心, 不過間唔中就會問我: "姐姐呢?  I want 去公園丫"

放學順便影埋證件相同埋去醫生度做健康檢查, 開學要交俾學校, 估唔到醫生話弟弟包皮有 d 過長 ^0^  而家仲細, 睇定 D 先

N1 適應班 Day 2

今天天氣是陰天仲落大雨, 攪到一早心情麻麻, 抱住小明返學仲非常狼狽, 又開傘, 又收傘, 小明仲要同我搶傘!!  

去到學校門口點都唔肯俾番把傘我就大喊, 換完鞋入到課室要佢放低心愛既書包, 佢唔制又喊多次!  跟住今日圍大圈坐, 小朋友坐地墊家長坐後面, 小明唔肯自己坐又大喊 @.@   

陳老師埋黎了解小明發生咩事, 話佢平時唔喊好少扭計??   我話佢扭抱呀, 陳老師就話: 

"咁你抱下佢囉!"  

Hey~~~  我以為要小明學守規矩麻, 眼見個個小朋友都肯自己坐我點敢抱先?!  衰仔仲嫌我攬住坐大脾唔係抱佢仲投訴, 我都唔知小明今日發生咩事扭 3 次計!!!  #%$#^%&*($^&*%^

洗手準備食茶點, 排排下隊小明自己打尖入廁所洗手, 其他家長係門口我入唔到去, 衰仔細細粒就捐左入去, 於是我企係門口等, 攪笑地, 有嬸嬸係入面幫佢洗手, 小明洗完先發覺唔係我就大叫: 

"媽媽~~~"  真係俾人賣左都唔知發生咩事!

今日茶點食花生醬三文治, 小明好叻仔食晒, 仲自己捧杯飲水冇倒瀉, 有進步, 自己行出去放杯碟都做得有板有眼, very good!

連老師今日帶大家上音樂活動, 教小朋友唱左首歌, 用沙鎚同馬鈴伴奏, 小明反而習慣係幼潛都係咁樣圍圈坐, 玩完沙鎚自動自覺放番係老師個籃度, 果然訓練有素, 不過佢未習慣排隊就要加緊訓練

總括而言, 呢兩日既適應班小明都係開心, 雖然會扭計, 但用餅仔呀, 玩具呀, 洗手呀都可以分散到佢注意力安靜番, 郭老師都話恩明易氹, 冇小慈家姐咁硬頸!  果然由細睇到恩明大, 個個老師都好了解小明呢!  希望佢呢三個月係屋企自理能力再進步 d, 返到學校唔會落後其他小朋友太多啦!

12 月再見~~