話咁快, 小慈升 K2 了!
暑假放得短, 所以冇情緒問題, 反而間唔中會問我幾時返學, 我好掛住潘藝文陳坤森! 我都有預告俾小慈聽佢會轉班房, 可能仲會唔同組, 小慈就話可能轉星星組, 我話應該唔會, N1 小慈係西瓜組, K1 係彩虹組, 可能 K2 係動物名好似弟弟係綿羊組咁, 叫小慈返學校睇下自己係咩組放學返黎話俾我知! 於是今朝一起身小慈就話自己好精神, 返學喇!
陳老師打電話俾我話俾左 d 新書工人姐姐請我查收聽日交番學校, 於是我就問下小慈今日返學情況, 陳老師話佢地今日對新班房好好奇, 適應自己咩組, 坐邊度都攪左一輪, 我即刻八卦問下小慈係咩組, 陳老師就幾有信心小慈識答, 不過都話定個答案俾我知係
"安德烈組 / 約翰組 / 雅各組 / 腓力組"
叫我同小慈核對下, 依? 組名都幾難記喎, 不過陳老師話佢地識, 因為之前講過好多聖經故事, 小慈知道安德烈係耶穌既朋友
陳老師仲話小朋友升 K2, 大個左食野既份量都俾多 d, 以前食半塊牛油方包而家係一塊, 小慈食得晒但佢食得慢, 午飯個時仲盅眼瞓!! 另外佢今日茶點碗綠豆沙食得好少, 問我小慈平時係唔係唔食糖水? 我話係呀, 甜既一定麻麻地, 就算俾唔甜既楊枝甘露佢都係食得少少, 陳老師唔係怪佢, 只係平時俾咩恩慈食佢都會食晒, 好少有剩所以一定係好唔鍾意食先係咁, 而家知道左下次就會俾少少佢一齊食下就算, 估唔到小慈唔食紅綠豆沙糖水呢方面都似我同秋秋!!
放工返屋企考小慈, 佢初時唔記得自己咩組, 我提佢係唔係有個 "安" 字呀? 小慈即刻答得出安德烈組, 仲有約翰, 腓力同埋雅各都係耶穌既好朋友, 真係識喎!! 小慈仲同我講今日有 3 個新同學, 3 個都係男孩子, 佢地岩岩 4 歲好細個, 佢就黎 4 歲半大佢地好多喎 :)
眼見小明對腳仔好似長左好多, 又係時候攞把尺出黎度下, 小明唔知點解一見我攞尺就走夾唔抖仲大叫 "救命呀~~~~" @.@
小明 1 歲 9 個月 小慈 4 歲 4 個月
身長 84cm (50線) 102cm
體重 11kg (40線) 14kg
頭圍 49cm (65線) 49.5cm
腰 18" 19.5"
大脾 10" 10.5"
小腿 7.5" 8"
腳板 15cm 17cm
真係叮噹碼頭, 除左身高, 睇怕弟弟好快就追過小慈呢!
沒有留言:
張貼留言