傻妹

工人姐姐今朝同我講, 小慈尋晚 9:30 pm 上床碌到 11:00 pm 都唔瞓覺, 要叫佢去完廁所先肯瞓 @.@  點解呀?!  點會唔肯訓覺架?!  即刻問清楚小慈發生咩事?!

小慈: "我要叫姐姐帶我去廁所 wee wee 呀!  佢成日都冇叫醒我去廁所呀!"

我: "下?  姐姐晚晚 12:00 am 都有叫你去廁所架!"

小慈: "都冇!  我都唔記得!"

我: "傻妹!  梗係有啦!  姐姐唔叫你去廁所, 你賴濕左張床好耐啦!"

小慈: "......."  無言, 不過睇得出佢個樣半信半疑

我: "媽媽每晚都見到姐姐抱住你, 擺你係佢個膊頭度, 然後帶你去廁所, 可能你太眼瞓唔記得左咋!"

小慈: "媽媽你見到我架?!" 雙眼發光, 我估佢而家先信

我: "梗係見到啦!  傻妹, 小朋友一定要早睡早起, 瞓多 d 先夠精神返學, 你唔駛擔心架, 姐姐每晚都記得叫你去廁所, 好似佢朝早會叫你起身返學咁囉!"

小慈: "知道喇, 媽媽!  我今晚會快 d 合埋眼, 唔會碌黎碌去架喇!"

我呢個女真係要好小心咁教, 我可能之前講得唔清楚, 我有叫過佢如果瞓瞓下覺得好急, 就要細細聲叫姐姐帶佢去廁所, 唔好咁大聲因為會嘈醒弟弟, 仲話如果姐姐聽唔到就掉個枕頭落去叫醒佢添! 

小慈好聽我話, 我叫親佢做既野佢一定會做俾我, 我估佢今次死頂住唔瞓覺, 就係自己瞓到半夢半醒冇記憶, 以為自己冇做到我既要求, 所以就要親力親為!!  

我真係要好小心對小慈, 半夜起身屙尿咁小事都令佢有心理壓力諗埋左一邊, 好在工人姐姐有話我知等我可以即刻同小慈做心理輔導咋!

 

放工經過商場發現到呢包我細個好鍾意食既棉花糖, 唔知點解好開心, 於是買番屋企氹下我個乖囡

小慈 "嘩~~~" 左一聲就即刻要求開黎食, 食到停唔到口仲攞左 d 棉花糖黎玩 

小慈話中秋節就黎到, 送隻白兔仔俾我 ^^