排隊

呢個星期小明唔知點解突然又變番黐媽 B, 以前我出門口返工都冇野仲好爽快咁 bye bye 媽媽架麻, 而家當我一叫 "小慈著鞋返學喇~~" 小明就會即刻喊住咁跑埋黎攬住我大脾話:

"I want 媽媽度呀!  媽媽抱呀!!"   

喊到好凄涼!  唔理佢照出門口, 去到 lift 口都仲聽到佢既喊聲....

開飯又係, 明明佢已經頭圍用膳完畢, 見我地開飯又要黐埋黎, 之前係我攬住佢坐大脾, 而家少爺仔要玩 '不' 湯, 為免我成身濕晒, 退位讓賢既小慈已經跟我地坐椅子送埋張 high chair 俾弟弟, 我只係坐開小小督促下小慈食飯姐, 弟弟即刻反應奇快咁話:

"I want 媽媽坐呢度, 媽媽坐呢邊呀!"

飯後, 原先坐梳化既小慈無端端話要坐我大脾, 於是我攬住佢左搖右搖咁唱歌仔, 弟弟見到又唔執輸要坐, 小慈好乖咁起身讓俾弟弟, 但見到弟弟玩左好耐都唔讓番俾佢就出聲喇...

小慈: "媽媽, 我想玩多一次呀!  坐你大脾好舒服好似你噯我瞓覺咁呀!"

我: "好啦, 弟弟玩完到小慈喇"

弟弟: "No 呀!  I want 到弟弟喇!  弟弟玩多一次呀!"

我: "到小慈喇, 弟弟玩左好耐喇, 要排隊丫麻"   

弟弟即大喊 @.@ 我唔理佢放佢落地由佢喊, 小慈咋咋林較好位坐我大脾, 我唱左 2 首歌弟弟都未收聲, 不過冇人睬佢, 突然間, 弟弟起身自己行去攞紙巾抹眼淚, 抹完又坐番係我隔離冇晒聲喎 

我: "安靜未呀?  弟弟頭先做咩喊呀?"

弟弟: "安靜.  弟弟唔排隊囉!"

真係叻仔!  終於都明白輪流玩要排隊呢個道理!

佢好凄涼咁要自己行去攞紙巾抹眼淚呢個動作, 真係諗起都想笑呀 :)