中秋節好快就到, 某日經過商場已經有燈籠賣, 小慈雙眼發光已經好想買, 我就答佢同埋弟弟一齊揀, 幾日之後...
小慈: "星期五要返學, 星期六要返體操班同埋兒童詩班, 星期日我地係唔係帶埋弟弟一齊去買燈籠呀? 陳老師話買左一個返去都仲要自己整一個架!"
冇咩美術天份既我真係好怕做手工, 仲要設計, 小慈, 你都係俾 d 時間媽媽諗下啦, 不過燈籠就可以買左先!
估都估唔到小慈會揀巴斯光年!! 弟弟就唔識揀咩都冇所謂, 所以就由我決定買三眼仔襯番小慈
好在買左兩個新玩具, 今日落雨落足一日邊到都唔駛去
係屋企都好開心, 小慈同爸爸一齊玩吹波波, 簡直係經典玩具
弟弟都整對 beautiful eyes 出黎娛樂大家!!
之後, 正如小慈預告, 陳老師話要自己整一個燈籠! 開學岩岩一個星期就收到呢張通告 @.@
活動名稱: 親子花燈設計比賽參賽
作品要求: 必須親子合作, 具節日氣氛; 所用之物料, 尺寸, 形狀均不設限制, 可選傳統或新穎設計為創作主題, 作品需以輕巧為主, 方便掛起為佳
評審方法: 由校長, 主任及各老師於每班作品中選出 "傳統特色獎" 及 "最具創意設計獎" 各一名, 凡參加比賽之幼兒會獲發親子花燈設計比賽參與狀一張
小慈一放學已經攤張通告係枱面俾我睇, 追問我幾時先開始整? 真係俾佢嚇鬼死以為要即刻交, 好在都有一個星期時間預備!! 毫無設計及美術天份既我, 每次見到呢 d 親子 xx 通告都飽受驚嚇幾晚瞓唔著, 真係慘過返工 V__V 唔交又唔得, 唯有周圍問下有經驗既人, 又上網搵資料 brain storming 下! 諗左足足一日, 又行文具舖搵材料, 終於俾我諗通左, 感謝主!! Da La~~~~ 呢個就係我地既設計, 簡單得黎又有特色咁啦 :p
好有大紅燈籠高高掛既 feel, 我都唔知屬於新穎定傳統設計, 是但啦
熄燈睇先有效果, 靚好多架 (我認為)
內有乾坤!! 中間 d 貼紙係小慈貼, 小白兔在偷望, 小慈好有步驟咁貼左一圈雞仔, 佢話有雞蛋先, 跟住有雞仔, 後面有雞媽媽
小慈出奇地鍾意呢個燈籠, 仲幫佢改左個名叫 "南瓜燈籠"
志在參與!! 交完功課一身輕鬆!!
沒有留言:
張貼留言