某日經過商場見到有 Toy Story 2" Buddy figure 賣, 嘩~~ 好得意呀! 不過好貴, 於是只係買左 4 隻主角返屋企氹下小慈小明開心, 點知玩唔夠 2 個星期, Woodie 同三眼仔已經唔見左, Jessy 仲俾弟弟擰甩左個頭 @.@ 弟弟真係好過份呀!!! 就算係小慈 BB 時玩玩具都唔係咁, 而家所有野經弟弟手都一定溶溶爛爛甩皮甩骨, 越諗越唔憤氣, d figure 我都好鍾意架麻!! 之後終於俾我係反反城見到有得賣, 仲可以成 set 咁買, 係唔係好 cute 呢?
今朝準備換衫返工時, 我同老公係房睇緊新聞, 小慈敲門入黎.....
小慈: "爸爸, 媽媽早晨! 你睇緊咩呀? 新聞呀?"
新聞講緊 d 雞, 我掛住換衫都冇為意講緊咩
小慈: "點解 d 雞係籠入面既?"
我: "佢地準備俾人買番屋企煮黎食羅"
小慈: "唔得架! d 雞應該係森林入面散步架麻!"
我: "呢 d 雞係俾人食架, 你尋晚都食緊雞脾啦!"
小慈: "........ 唔係呀! 我地食個 d 雞係唔郁架!"
我: "........... "
小慈越講越激動: "即係好似獅子咁, 你唔會捉獅子放入籠然後煮黎食架麻!"
我: "係係係, 動物應該係森林入面住既....."
小慈呀小慈~~ 我地食個 d 雞俾我地整死左咪唔郁羅! ......
我都係唔好將呢個殘酷既事實真相講俾佢知喇 @.@ 劏雞殺鴨既情景更加唔可以俾佢睇到!! 平時帶佢去街市買魚買蟹買肉佢又冇野喎, 上次買完隻蟹返黎仲大大聲叫爸爸 "劏左佢", 為咩事今朝見到 d 雞係個籠度會咁大反應呢? 定係我指出左佢食既雞脾就係呢 d 雞令佢聯想度就接受唔到呢? 我都係唔好講咁多, 一陣攪到佢從此食齋就大件事!!
我其實絕對明白佢既感受, 細個既時候, 我老豆帶我去食蛇宴, 本來都冇咩野好似碗仔翅咁幾好味, 直至上到有一味菜係水魚湯, 湯咪湯囉, 整鬼佢原隻水魚切開上碟!! 我已經好鎮定咁問清楚 d 湯唔係用水魚煲架? 老豆好似存心想我出醜咁答我 '係!' 好! 就嘔俾你睇, 從此以後冇食過蛇宴 #%$%$^#$%*%&
又記得有一次, 湊大我同細佬移左民去美國既婆婆返黎香港探我地, 佢每隔一兩年就會返黎一次因為婆婆好錫我地, 我係佢第一個孫, 婆婆煮野好好食, 煲湯又超級好飲, 咁一場返到黎就一定一日三餐咁煮好多好野俾我地食, 有一日早放學返黎, 婆婆係廁所整緊野, 我細佬八卦走埋去睇, 原來婆婆係度劏緊田雞準備蒸, 個 d 田雞切左個頭都仲係度周圍跳 @.@ 我細佬望到嚇到當晚已經發惡夢, 從此唔再食田雞, 仲怕晒所有青蛙類動物! 我就冇親眼目睹, 我好怕見到血, 每次我媽 '達' 生魚, 洗豬肺, 劏蟮我都即刻擰歪面逃離現場 (之所以我唔好煮野食囉, 真係好 ugly 呀.......) 弊, 講講下咩回憶都返晒黎真係想嘔添.... @____@
弟弟無啦啦鼻塞成晚瞓得唔好, 跟住第二日就鼻水長流仲有微燒, 岩岩轉天氣小明就中招! 唉~~ 拿拿聲叫工人姐姐帶佢去睇醫生, 等我放工返黎先睇就太遲! 姐姐話弟弟睇醫生真係超乖, very friendly, 係人都打招呼, 又合作, 醫生叫擘大口就擘大口, 叫聽背脊佢就郁都唔郁非常合作, 所以睇醫生時間非常短, 幾分鐘攪掂之餘仲氹到醫生又俾 vitamin, 又俾餅仔, 又俾貼紙咁滿載而歸, 醫生都係話佢初起感冒, 係怕佢 d 咳長手尾, 所以食完呢支咳藥水如果唔好就要覆診轉藥!
小明食藥非常合作架, 見姐姐攞杯同針筒出黎就指住話 "medicine" 跟手就自己坐低等餵藥, 上次好憎食個支黑色既咳藥水, 一見我地攞起個支就大叫
"No Black~~~"
走都走唔切, 但今次竟然冇事唔抗拒喎! 18 個月個時都仲係要我地 3 個大人夾住佢餵藥, 而家 22 個月真係乖左好多, 叻仔!! 雖然小慈小明兩個睇醫生食藥都好合作好乖, 但我真係唔想你地睇醫生啦!
小慈家姐玩緊都無端端背水調歌頭俾我地聽! 雖然有 d 跳左要提水先記得, 但我都已經好驚喜好開心!! 班主任真係好有心機教佢地好多課外知識!
《水調歌頭》 〔宋〕蘇軾
明月幾時有 ? 把酒問清天。
不知天上宮闕，今夕是何年。
我欲乘風歸去，又恐瓊樓玉宇，高處不勝寒。
起舞弄清影，何似在人間 !
轉朱閣，低綺戶，照無眠。
不應有恨，何事長向別時圓 ?
人有悲歡離合，月有陰晴圓缺，此事古難全。
但願人長久，千里共嬋娟。
一直都想買個靚煲, 有說用 STAUB 煲一個鐘已經有老火湯既效果, 炆野易入味又林又多汁仲要夠快, 煤氣都慳唔少云云..... 我知, 我明! 個煲係靚, 但價錢仲靚呢! 我真係唔捨得.....估唔到真係會越賣越平! SOGO 賣緊 28cm round $1499, 真係史無前例咁平咁話, 於是我不惜拋夫棄子咁過海去搶購, 後知後覺, 今日都已經係 promote 既第 3 日, 可能好野都俾人搶晒, 抱住隨緣既心態, 買到就買, 買唔到就算啦! 果然 $1499 一早已經賣晒! $1 多一件要用正價先買到, 同 STAUB 唔係好熟既我當堂企左係度, 一場黎到又唔想空手而回, 咁點先? 朋友即刻叫我轉戰 26cm round $1280, 煲唔係太多料既湯如青紅蘿蔔都 ok, 細個 d 會易用 d, 炆野又好, 煲仔飯都唔錯, 好! 就買一個試下先啦, 見佢灰色都幾靚仔!
Da La~~~~~~~~~~ 我既第一個 STAUB ^^
正正正!! 不過咁食法會肥噃 :DDD
開煲: 用洗潔精洗乾淨抹乾後搽少少生油在煲邊及煲內, 第2日洗淨可用
TIPS: 可在煲內爆香食材, 將油倒入煲內先加熱 4-5 分鐘, 煎食物就唔會黐底! 煮食用中細火, 煲滾後轉最細火, 炆好食物焗 15 分鐘才開蓋亦唔會黐底
維持 11kg 好耐既弟弟, 22 個月大終於突破到有 26 磅!!! 小慈家姐都突破 3 字頭有 31 磅, 繼續維持 5 磅差距 ^^
弟弟又同小慈一樣極度鍾意唱歌, 由朝到黑依嘩鬼叫唔知佢唱咩, 隱約聽到佢係唱緊 row row row your boat, twinkle twinkle little star, ABC song, 擦牙歌同洗白白, 唔識歌詞就用 hmm, 都有音準, 加埋生鬼既表情再跳埋舞, 每次都成功吸引全家望住佢表演 :DDD
一直都好識表達自己既弟弟呢個月仲學識坐廁所, 成功地坐廁所開大又開細, 雖然有時指住廁所同我講 "屙屎屎" 時已經屙左落片片, 但佢知道自己屙左臭臭, 會覺得唔舒服識要求換片同埋絕對唔肯坐低!! Pat Pat 一掂到屎片就即刻彈起話: "屙屎屎!!" 有見及此, 我地近來已經定時帶佢去廁所, 睇下返學之前可唔可以戒到日片啦!
每晚都要自己不湯不飯, 最鍾意食菜遠, 椰菜花, 粟米, 自己食就大大啖擘到個口有咁大得咁大, 餵佢食粥食飯時個嘴就即時變櫻桃小嘴, 一匙飯餵 3 次都食唔晒真係唔知點解 @.@
講野繼續進步神速, 超級攪笑, 語氣學足晒小慈家姐添呀!!!
- 邊個黎架? 咩黎呀? 邊個架?
- 岩唔岩呀? 係咪呀?
- 衫衫污漕呀!
- 要倒倒倒咁樣呀 (意思想倒晒玩具箱 d 玩具出黎玩)
- 我都係
- 我掛住小慈家姐呀! 小慈家姐係邊度呀?
- 唔該借借!
- 著襪襪呀! 等埋我呀!
- 媽媽你過黎啦, 我拖你黎呢邊啦!
- 俾一個媽媽啦! 我俾小慈家姐呀! 交換丫~
同小慈講 "小慈唔好喊啦~~" 對住工人姐姐講: "Siu Chee crying"
- 睇緊 Toy Story 指住電視話 "Woody 同埋 Jessie 唔開心呀!"
- 冇 Pooh Pooh 既? 我搵下先!
- 獅子乖乖喇
- 我見到你呀! 我見到 moon 呀!
- 我想要巴斯光年, 同埋 Barbie, 同埋 Woody, 同埋三眼仔, 同埋 Bullseye
- 史迪仔攬住小慈 (指住幅相)
- 1 2 3 開始~~
- 弊喇! 好痛呀!
- 醫生俾 Thomas 弟弟呀
- 我鍾意麵麵呀! 好味道呀!
- I Love 菠蘿包
- 我要 xxx, 唔該~~- 救命呀! (以前做唔到既野搵人求救會叫 can not, 而家改左叫救命)
- 投降喇~~~ 唔好吱我啦!
- I want a bowl / I finish milk la / wait a minute
- 同小慈爭野玩, 我同佢講排隊, 到小慈喇, 弟弟答我: "到弟弟先呀!"
- 去麥當當買雪糕識同姐姐講: "唔該要雪糕, 俾錢錢, money money, money"
- 自己捧水杯飲水講 "弟弟揸住!"
- non stop 咁飲晒 2/3 包 Qoo, 氣都唔駛抖
- 每晚係床仔碌來碌去噯自己瞓之前會 good night 晒所有公仔, 叫晒所有名先罷休! 有次仲好笑, 碌碌下無端端講 "I sleep already la~~" 明明擘大眼都話自己瞓左, 真係俾佢笑死!
坐車去街時一定要求戴太陽眼鏡, 就算已經天黑都要戴, 咁點睇到野呀?? 哈~~ 佢就會好似老人家戴左老花鏡咁拉低少少副眼鏡係鼻樑咁黎睇野! 超爆笑 :DDD
今晚心血來潮俾弟弟坐 car seat, 佢又好開心即刻要我地幫佢戴 seat belt, 仲話自己好安全!
天黑先黎戴黑超呢佢兩姐弟真係.... 絕!
本來今日公眾假期有好多地方想去, 不過弟弟病左, 一個晏覺瞓 3 個鐘已經天黑, 冇計啦, 就近近地去宜家玩下就算! 呢度只係停車場範圍, 小慈已經話好舒服, 合晒眼咁享受, 弟弟又配合喎, 好攪笑!!
開心既係, 走既時候小慈同我地講佢今日玩得好開心, 佢好鍾意呢度下次想再黎過!
小慈真係一個易滿足既小朋友, 乖女!
中秋節, 最開心既莫過於小朋友, 但個人覺得而家既小朋友過節冇我地細個時咁開心, 至少佢地冇得 "縱火" 先啦, 冇得玩蠟燭真係差好遠! 飯後一人一粒珍寶珠, 多謝姑媽!
祝大家中秋節快樂, 人月兩團圓, 更加重要係注意飲食, 忍口唔食咁多月餅呀~~
小慈已經返左兒童詩班差不多半年, 今日教會舉辦兒童佈道會, 主題係 "變出彩虹", 有詩歌亦有精彩既魔術表演! 小慈唔知咩叫佈道會, 但知道有咁多表演睇, 又有媽媽陪佢一齊, 已經開心到飛起 ^^
教養孩童, 使他走當行的道, 就是到老他也不偏離 (箴言 22 章 6 節)
抽取一篇寫得好 '到肉' 既文章與大家分享: 教養孩童 -- 黃聿源
....如果環境做得到，人力做得到，我覺得我們應該盡早教導小孩子，教小孩子明白聖經的教導。其實很小的時候就可以了，幾個月就可以學的，一歲多你就可以教他的。其實許多時候我們以為他這麼小怎麼能呢？其實是可以的。許多時候小孩子很小，我們教他，不一定講整篇道給他聽，而是教導他正確面對人生或者對四圍環境、對神的認識等等。好像剛才說到父母教小孩子，很小的時候跟他一起吃飯，你對他說要感謝神給我們吃飯，那個印象、那個意識對他們非常要緊的。所以如果我們教會有這樣的環境可以做得到，小孩子很小的時候來到，小孩子都可以有聚會的，當然小孩子的聚會不像我們大人的聚會（比方有講道……等等），但許多時候那個聚會的氣氛、聚會的事實，那個對神的敬拜，其實對小孩子是很重要的。如果他們小的時候他們知道有神，要敬拜神，他對敬拜神、敬畏神的心就影響他整個做人的態度。....
...其實許多小孩子很小就懂得唱詩、讚美主。我有一個姪兒，兩歲就懂得背許多聖經，唱許多聖詩的。其實你這樣教他、教他，他許多就懂了。雖然他不是完全明白詩歌裏面說甚麼，但是詩歌的歌詞就進到他心中。很小的時候，他就懂得背一兩節聖經節，這一兩節聖經節又到他心中，所以這聖經節在他心中就成為他的記憶，心裏面神的說話有了地位。所以這是我們盡量想辦法可以教導他們的，有少許也好，給他從小有這印象，給他知道來禮拜堂做甚麼的，來敬拜神，來聽神的說話，來讚美主，小小的時候就可以教他。你知道嗎？兩、三歲小孩子也可以背聖經的，兩、三歲小孩子也可以唱聖詩的。你千萬不要看他很小，其實他懂的。他懂得講話，他即是懂的。小子怎樣講說話的？你教他，他就照你這樣講。你怎樣懂呢？人很難明白，人的腦很特別的，你這樣教他，他就懂了，他就懂講許多說話。同樣，他一開始講說話，你就將聖經、神的話語教他，將聖詩教他，他就懂了。他很自然就懂了，神的說話就入到他心中去。當他思想的時候，神的話語就出來了，就好像我們跟他講說話，我們的話入到他心中一樣，所以是這樣很直接的教他。當然你這樣教，不等於他信了主。但是你也要有這樣很仔細的帶他，給他們認識主。
全文
https://www.twcah.org/booklet/teachourchildren
感謝天父!!
