同一件衫

我冇好刻意咁將小慈既衫留俾弟弟, 好多衫已經一早送晒俾人, 而家弟弟著既衫, 好多都係已經第 3 / 4 手咁回歸番黎, 竟然咁都有機會俾我影到同一件衫, 兩個 b 著住效果係完全唔同

小慈 4 個半月   

弟弟 6 個半月

小慈 5 個半月 

弟弟 5 個半月

小慈 9 個半月

弟弟 6 個半月

打打

我個頭好重呀....

小慈 1 歲

弟弟 6 個半月

小慈 1 歲

弟弟 5 個半月

小慈 6 個月

弟弟 7 個月

小慈 11 個月

弟弟 6 個月

小慈 16 個月

弟弟 7 個月

係唔係有種感覺弟弟半歲大就著晒小慈一歲既衫呢?  好在唔係掉轉生咋, 弟弟如果出世先, 佢咁大隻, D 衫俾小慈就會空浪浪唔岩著啦!

Music Toddlers 復課

教育署宣佈停課 2 星期後, 所有課外活動及興趣班都宣佈暫停, 如臨大敵!  之後政府再宣佈提早放暑假, 呢 d 收錢既興趣班當然唔會無限期停課影響做生意啦, 於是, 就打黎話會跟足衛生指引 -- 量體溫, 消毒洗手同埋戴住口罩咁復課喎!

小朋友既記憶力真係好厲害, 我只係同小慈講今日訓醒覺去搵 Miss May, 2 個星期冇上堂, 小慈完全係記得晒 Miss May 教佢唱既歌, 即刻唱 "Teddy Jump" 俾我聽, 又提我帶 shaker, 毛巾 & Teddy Bear 去上堂, 又話好掛住 Miss May, 要帶埋個新玩具去俾佢睇咁

今日就去番 Mega Box 上堂, 離遠見到已經話:

"我地去呢個盒度上堂!"  :)

仲有 3 堂跟住既音樂班就唔再係 Miss May 教了, 希望小慈都一樣咁鍾意!  呢個親子班我都學到好多野, 音樂理論對小朋友黎講係好抽象既野, Miss May 能夠透過兒歌 / 樂器 / 圖畫 / 動作.... 將呢 d 理論灌輸俾小朋友一 d 都唔容易, 由 basic course 到 advance course, 小慈已經學識左:

- d - d' 8 個音階

- strong/weak, loud/soft, high/low, fast/slow... listening skills

- musical notes: quarter note (ta), eighth note (ti ti), rest, staccato & legato

- tempo: allegro, andante, adagio

- body scale & diatonic scale

- body balance, left & right

仲有識唱好多歌仔, 真係好開心!

勁舞 Dancing Grace

今朝要同弟弟打針, 又想陪下小慈, 於是羅左一日假, 下晝見天陰陰涼涼地又冇落雨, 就決定帶小慈去迪士尼!  同小慈等緊接駁巴士去迪士尼之際, 陳老師打電話俾我通知停課安排, 學校要停課到 7 月尾, 可望 8 月初新學期復課, 陳老師知道小慈係我身邊好驚喜, 因為佢好掛住小慈, 於是俾個電話佢聽, 小慈第 1 次同老師傾電話, 仲講到頭頭是道, 連老師都讚佢講野叻左好多 :)  

迪士尼今個暑假用史迪仔做主角, 周圍都係佢 d 裝飾!  小慈今日好勇敢, 之前睇左 4 次 wild cat 今日終於肯跟姐姐哥哥出去跳舞, 雖然跟唔到拍子舞步又錯晒, 但佢肯自己行出去我已經好開心, 好大進步呀!

史迪仔反轉大街 show, 只係有 d 公仔同大家一齊跳下舞, 拋下波, 唔知點解小慈 high 得好緊要

笑唔停, 不斷跳舞

周圍都係史迪仔

無太陽但都好焗, 成頭濕晒

玩到天黑

弟弟 7 個月大了

今日弟弟 7 個月大勒, 真係唔經唔覺~~

帶弟弟去打針, 打埋呢支肺鍊第 3 針就可以 1 歲先再要打針了, so far 弟弟打針係好乖, 好少喊, 就算喊都係 "嘩~~" 一聲, 好快冇事

打針前同佢磅重仲有進步, 已經有 18.5 磅勒!!  我都覺得弟弟聚手左 ^^

7 個月既弟弟

- 飲 4 餐奶, 每餐 220ml

- 開始食粥仔, 粥仔料已經食過蛋黃, 冬瓜, 節瓜

- 鍾意食蒸既蘋果, 蒸既雪梨

- 學識左手交右手

- 學識掉野

- 可以長時間凝視面前 / 掛在半空既物件

- 俾野佢會伸手羅, 然後放入口食

- 學識用學行車行, 對準目標前進

- 學識鬧情緒, 唔鍾意會怪叫, 扭身扭勢

- 認人情況嚴重, 連爸爸抱都唔俾

白滑肥豬仔一隻 ^u^

攪笑 pose!  伸手去摘星嗎?

I Love You Young Man!

繼續停課

真係繼續停課, 仲提早左放暑假...  都估到架勒, 日日都 50-60 宗確診個案  @.@  好在屋企都仲有個弟弟, 小慈都叫做多個傾訴對象, 見佢玩咩都走去俾弟弟望下, 弟弟坐住學行車時又會飛車埋去睇小慈玩咩..... 勁攪笑, 兩個好似相依為命咁!

今日放工見天未黑又冇落雨, 返到屋企小慈又已經食完飯, 仲話自己食得好快要我請佢食朱古力, 我問小慈:

"媽媽獎你去公園好唔好?"  小慈梗係話好啦, 即刻換衫落街仲要帶埋單車去公園!

由屋企開始踏到落樓下兜晒 3 個公園都唔駛媽媽幫手推單車, 又話自己好大力單車就會郁, 仲話自己有食飯快高長大先踏到單車, 真係俾佢笑死!

終於決定去後面個個大公園玩, 小慈落車同我講:

"媽媽, 你扮獅子追我丫, 我地玩捉依因好好玩架!"

嘩~~  勁呀, 小慈!  點解佢會知咩叫捉依因既?  唔通係爸爸教佢既?

我就扮獅子去捉小慈啦~~  wow~~~  個衰妹尖叫大嗌到怕且 45 樓都聽到啦!!  開心到飛起!  我就要掩耳仔呢.....

Bed Time Story

小慈簡直係迷上左一本叫 "First Experiences" 既書, 呢本書入面有好多個故事, 例如 "Going to school" "Going to the doctor" "Going on a plane"..... 當初我買呢本書就係睇中佢其中一個故事 "The new baby", 為左俾小慈有心理準備多個弟弟而買

我係好捨得買書架, 因為書可以 keep 一世, 仲可以睇完又睇, 小慈近期就係愛上左 "Going to the Dentist", 可以一晚要我講 3 次, 仲前晚講完尋晚又講, 今晚都仲想聽個隻, 真係已經睇到曉背, 對個幅 "潔白牙齒 & 黃黑牙齒" 特別大反應, 會指住黃黑牙齒話

"我唔鍾意呢個污漕漕!" 通常我就打蛇隨棍上問埋佢, 咁點算好呀? 咁小慈就會答:

"要擦牙! 如果唔係 d 牙會爛晒架勒!"

小慈依然都係習慣開飯時就會睇佢自己既 BB TV, 個日咁岩又係睇 Bear Bear 熊睇牙醫, 小慈睇到好入神, 再加上我係旁邊做翻譯 (因為是說國語的), 攪到小慈睇到七情上面, 非常肉緊, 尤其係螢光幕出面 "蛀牙兵" 時, 小慈已經依嘩鬼叫咁話:

"Bear Bear 熊個口入面有 ant 呀!!"  (隻蛀牙兵畫到好似魔鬼咁仲羅住支叉, 小慈話佢係 ant -- 螞蟻 ^^ )

當晚一同佢講話要預備訓覺時, 小慈已經問我係唔係要擦牙洗面呀?  我梗係話要啦, 小慈都好合作, 仲擦左好耐. 擦完問我乾淨未呀?  仲有冇菜菜, 有冇肉肉?  有冇 ant 呀?

今晚仲攪笑, 一飲完奶即刻彈起身同我講:

"媽媽, 我未擦牙呀!"

Yeah! 成功勒!!  你知唔知小慈 2 個月之前仲係好憎擦牙架?!  佢未擦都可以同我講擦左, 又試過同我講唔駛擦咁多, 有次眼訓仲話佢好攰唔要擦牙咁添!  不過我一次都冇逼過佢, 只係慢慢提高要求, 由飲完奶奶要佢飲啖水嗽口, 到要求佢朝早起身要擦牙洗面, 之後再同佢講擦牙要擦 2 次, 因為歌仔都有得唱 "起床臨訓都應擦" 麻, 個時小慈仲答我:

"要擦 2 次咁多?!" 

真係好抵死!!  到而家佢主動同我講話自己未擦牙, 我真係好開心呀 ^^

5 億秒

今日係我同秋秋結婚 6 周年既大日子 ^^

6 年前既今日, 世衛先宣佈將香港從疫埠中除名! 而沙士既疫情亦都受到控制

6 年後既今日, 香港又再經歷大災難, 先黎個金融海潚個個失業減人工, 再加多個 H1N1, 小朋友們唔駛返學百無聊賴

早係幾個月前, 秋秋突然同我講今日係我地相識 5 億秒既日子 @.@

5 億秒..... 我都唔知佢點計 (你知我數學一直都捧蛋架麻)  秋解釋係由我地 1993年8月8日拍拖開始到今日 2009年6月22日結婚 6 周年 x 24 x 60 x 60 = 5 億秒

  

呢 5 億秒岩岩好疊住結婚周年, 又幾有意思喎  :)

秋一直都唔係一個浪漫既人, 但佢對特別日子又特別好記性, 好似舊年 08年 08月08日我地相識 15 年都係佢提我架 ^^

唔好理外在環境, 呢 6 年, 其實係 16 年, 我過得好開心 ^8^ 

我人生既所有階段都係同秋一齊渡過, 世界上冇人好似你咁明白我, 多謝你容忍我生完 2 個小寶貝後脾氣變得差左, 但我都仲係好似以前一樣咁愛你架!  6 年裡面幫你由 2 變 4, 梗係要付出 d 代價

今日好重要架, 因為冇結婚周年, 就冇呢 2 隻豬仔出世!!  影下相先!  一早大家都眼腫腫

放工同秋秋去 Conrad 食餐好既~~ 你睇幾多好野食  :P

超新鮮

已經飽飽地, 其他野我地食左少少咋, 但好味既焦糖雪糕就食左 4 個 cones 

真係好開心!!  感謝神俾我地既超過我地所求所想!  高舉主耶穌!  Amen!

夜晚返去, 明明聽到弟弟係度 "依依~~ 丫丫~~ 噢噢~~"  隔左一陣冇晒聲, 再裝下佢, 原來佢訓番, 仲要訓得好有型, 訓到舉晒手

影左 2 張相就轉 pose 變左呂奇.....

跟住仲冇眼睇添!!  俾我閃到咁都唔醒, 勁呀弟弟!! 

I Love My Family!!

父親節快樂^^

雖然今日係父親節, 我已經盡我所能咁俾秋秋訓到 10:30am 先叫醒佢起身幫手湊仔架勒 ^^

冇辦法啦, 10:30am 係一個 critical moment, 因為弟弟夠鐘飲奶, 小慈又開始肚餓想落街買野食順便去公園, 我一個人得一雙手, 攪得掂弟弟黎就滿足唔到小慈咁多願望, 一定要叫醒爸爸啦!
尋晚小慈已經好想去公園踏單車, 我要佢食完飯先准去, 佢都知自己食到太陽落山都未食完, 所以之後都冇要求, 點知今朝一起身已經話要去公園踏單車, 等左成朝爸爸終於起身, 於是我教佢講:

"父親節快樂~~"  跟住就拉爸爸去公園玩, 一玩就玩左成個鐘, 30 度呀今日!!  2 個返到黎面紅耳赤, 成身成頭濕晒~~ 真係辛苦晒爸爸

爸爸話今日去晒 3 個公園玩, 好盡慶!  攰到小慈死死下, 晏覺即刻訓左 2 個鐘!
因為停課既關係, 小慈學校都 send 左封 e-card 俾爸爸祝佢父親節快樂, 雖然唔係由小慈親手送, 但學校都好有心, 多謝老師

 

父親節快樂~~  爸爸, I Love You ^8^

相安無事

停課已經一個星期, 每朝早當我預備換衫返工, 小慈一定會問我:

"媽媽, 今日駛唔駛返學呀?"

從佢既眼神態度黎睇, 佢係真係好認真咁問我駛唔駛返學, 如果我話要, 我估佢係會即刻叫姐姐俾校服佢著個隻, 好可惜啦, 一日 49 宗 H1N1 確診個案, 有排都唔駛返學 @.@

通常我答完小慈今日唔駛返學之後, 小慈就會接口話:

"因為仲有好多小朋友病左羅, 學校關左門冇得返羅, 記唔記得呀?  我講左俾你聽架啦麻, 知唔知?" 

跟住就會去撩弟弟, 同弟弟講:

"爸爸媽媽返工唔駛喊架, 知唔知道呀? 好快就會返黎一齊玩架勒, 乖呀, 知唔知?" 

小慈有時真係好老積, 將我教佢既野完完全全咁照 copy 出黎同番我講

停課呢個星期估唔到係一 d 問題都冇, 工人姐姐 1 湊 2 完全冇問題, 仲話小慈 "behave well", 肯戴口罩去街市, 唔會隨便走開一定拖實姐姐 or 幫手推 bb 車, 係屋企又唔會扭計, 自己玩完一樣玩具放番好先再玩第 2 樣, 食野又自己黎, 訓覺又定時, 日日 12:30 pm 食完 lunch 就會係我張床度訓 2-3 個鐘, 生活好有規律, 學校訓練有素

反而弟弟就有扭計呀, 成日要抱, 我教工人姐姐去到邊度都放弟弟係門口俾佢望住, 姐姐話試過煮 lunch 時放弟弟坐搖椅係門口, 又試過同小慈沖涼時俾弟弟係門口坐學行車, 佢話弟弟會勁跳舞喎 ^^

姐姐仲有讚小慈好錫弟弟, 有時弟弟會霸住姐姐好長時間, 小慈從來都冇爭寵, 會等到姐姐可以放低弟弟先拉住姐姐同佢玩, 弟弟喊又會幫手氹, 弟弟反左身 / 流口水 / 食手指 / 掉左跌左玩具... 第一時間係會講俾姐姐聽, 即刻報寸 ^u^

相安無事就好啦, 姐姐真係好厲害, 1 對 2 係屋企之餘仲可以拖 2 個去街市買餸!!  我地放工返黎通常 2 個 b 已經沖晒涼食飽飽玩緊玩具, 佢仲已經差不多煮好飯, 等一陣就有得食, 真係唔知佢點做得到, 俾 d 掌聲佢呀!!!

媽媽既黃金歲月

今晚只係遲左些少返屋企, 係屋企樓下收到爸爸既電話, 問我係邊度?  佢話弟弟已經喊左 1 個鐘頭, 完全唔肯收聲, 請我即刻返屋企  @.@

咩事呀?  入屋見到工人姐姐抱住弟弟係房, 我估係想噯佢訓, 不過弟弟仲係不停咁喊, 仲喊到眼都腫晒, 真係我見猶憐, 即刻洗手抱佢, 就係呢個時候, 奇蹟就發生喇.....

我只係抱住弟弟咋, 喊左 1 個鐘頭既佢, 即刻收左聲  ^8^

爸爸睇到眼都凸埋!!!  "有冇攪錯呀?  死仔包!  死仔包!"  咁鬧佢, 仲想打佢  @$#%&^%*^&(#$%@

頭先佢地真係咩方法都試過, 包括用匙羹餵水 / 奶樽餵水 / 餵牙仔餅 / 俾牙膠 / 放大床 / 放 BB 床 / 俾被仔 / 唔俾被仔 / 放搖椅 / 放學行車 / 放網床 / 小慈唱歌 / 爸爸抱 / 姐姐抱 / 跳舞 / 飛高高..... 真係已經出盡百寶都攪佢唔掂!

弟弟平時其實好少喊, 就算喊都會知佢為咩事喊既, 所以唔係喊好耐就會收聲, 真係未試過喊成個鐘, 又唔係因為發燒唔舒服架喎!?  爸爸話真係喊到心都煩埋, 耳仔仲嗡嗡聲添...

弟弟仲學人發脾氣, 明明好鍾意食牙仔餅架麻, 今日竟然有意識地掉左條牙仔餅落地, 俾牙膠又係掉, 學人發脾四, 嬲到爸爸想打佢幾獲 !!!

估都估唔到弟弟係搵我!!!  我真係抱過手就即刻收聲, 攪到爸爸話佢好似講大話呃我返屋企咁,  我知佢冇呃我, 頭先係電話度都聽到弟弟喊, 後來仲俾我發現原來小慈影左相 :p

得出既結論係:  我地估平時我同爸爸成日出雙入對, 今日爸爸返屋企先, 弟弟見到一個, 但見唔到我, 於是就喊餐死羅~~

弟弟收左聲, 好快就累極而睡, 跟住小慈就把握機會捉住我要我陪佢傾計, 又要玩玩具, 仲要餵奶奶, 講故事, 圍係我身邊團團轉....

兩個寶貝都咁需要我, 冇左我一個鐘頭都好似世界末日, 久別重逢一樣!
 
BB 既幼年, 真係做媽媽既黃金歲月黎架, 叫佢地行真係唔敢企, 一唔睬佢就喊到豬頭咁, 而家連唔識講野既弟弟都用喊聲黎表達佢對媽媽既掛念

我會珍惜.....感恩 ^^

弟弟食腳趾

弟弟已經連續 3 晚都係半夜 3:00 am - 4:00 am 醒!!  仲係已經將張被踢左去床尾, 抱起佢時手腳凍冰冰咁, 都唔知其實佢醒左幾耐先瓜瓜嘈 @.@  心痛又攰死媽媽勒~~  明明開左冷氣可以一覺訓天光架麻, 為咩事突然間又退步半夜醒先得架?!  於是, 我醒起俾個睡袋佢, 咁就算佢踢左張被都唔會露脾丫麻!  就係咁樣紮左佢一晚, 太令人感動, 今朝 6:15 am 先醒, 感謝神呀!!!!

由弟弟 6 個半月發現自己有對腳開始, 我就估佢好快會食腳趾!  果然不出我所料!!  2 個星期後既呢一個早上, 係我抱住弟弟訓練佢坐之際, 佢無端端坐到衰衰咁係咁向前衝, 仲扶極都唔肯起身, 果然就真係 '妹' 緊隻腳趾公!!

你睇弟弟淨係食腳趾公架咋~~

肉緊得佢!!

人間極品!  你都試下啦!

Sorry! Sorry!

小慈近來好攪笑, 有時行路唔帶眼, 撞親我 / 踏到爸爸 / 踢到弟弟張搖椅 / 整跌左野.... 甚至踏到放左係地下既玩具, 小慈都會即時細細聲咁講:

"Sorry!  Sorry!"

好似你係街度唔覺意同人有踫撞, 下意識會即刻講 "Sorry!" 個種, 但小慈唔係講 1 次, 而係次次都會講 2 次 sorry! 

佢講既語氣音調好攪笑架, 如果可以錄起佢就正羅 ^^ 有禮貌既小孩子我好錫架!  小慈你要努力呀!  見你咁乖, 買份新玩具俾你係屋企玩唔駛咁百無聊賴

收銀機是也~~

不過小慈對買野賣野完全冇概念, 先後次序錯晒, 我去買野佢會俾番錢我個隻, 更加唔知咩野係錢, 教佢認 1 元 2 元未識, 佢只係鍾意嘟收銀機聽佢 d 聲

同佢玩夾仔, 營造出好多頭髮既效果

小慈踏單車

上次去沙巴, 酒店有提供免費單車服務, 於是係等緊出海個半粒鐘我地把握機會踏番轉, 可惜三輪車選擇唔多, 有一架高度岩, 不過小慈踏唔郁

於是要坐爸爸車尾

返黎之後既某一個星期日, 小慈要求去公園, 仲要求要帶埋三輪車去, 個次就厲害勒, 爸爸一返黎就話:

"小慈識踏三輪車勒~~ 完全唔駛幫手!"

點解會突然間咁大轉變呢?  之前同小慈去公園我地都有帶三輪車, 不過小慈踏 2 下就要我地推, 對腳個時都唔夠力 (定唔肯用力), 咁點會突然進步神速呢?

我地估就係受沙巴刺激!  上次小慈坐車尾, 爸爸話小慈嘀咕左好耐想自己同爸爸媽媽一樣咁踏單車, 奈何腳仔唔夠力!  返黎香港搵番架岩佢 size 既三輪車就踏到 ^^

時間岩岩好, 今日約埋一班朋友仔齊齊對抗 H1N1 做下戶外運動, 我地去巧巧屋企樓下既單車徑踏單車, 呢條單車徑舖得好靚, 環境優美仲見到海, 好正呀!  本來呢幾日都落狗屎咁, 估唔到天公造美就係我地踏單車呢段時間冇落雨, 感謝神! 

成條單車徑入去要踏 15 分鐘, 出黎又要踏 15 分鐘, 小慈成段路都唔駛我地幫手, 仲成日擰轉頭監視我地有冇靜雞雞推佢, 小朋友真係好得意, 能力到既時候, 唔駛你監咩都會做得到!

小慈既英姿 ^^

弟弟都有陪散步, 熱到佢成身痴立立

一字排開咁多架單車 & BB車, 何其壯觀

踏完單車就去巧巧新居玩, 仲見到 Jackco & Bernard , 冇見 2 個月大家都唔同左樣 ^^

開餐時巧巧媽媽俾左支牙仔餅 Bernard 食, 話 8 個半月既佢好為食, 大人食咩佢又要食, 於是用牙仔餅塞住佢個口

一包 2 條, 巧巧媽媽問我有冇俾牙仔餅小明食?  我話岩岩先 6 個半月開始食緊米糊加餸, 我未俾牙仔餅佢, 咁巧巧媽媽話俾佢試下啦, 見佢牙痕得咁緊要咩都放入口咬

不得了呀~~~  弟弟一食停唔到口, '妹' 到支牙仔餅溶晒真係俾佢食左落肚 @.@

為左食, 弟弟仲學識左將 d 野左手交右手添, 勁呀!!

小明與 Bernard (8個半月)

小明與 Jackco (4個半月)

認人既弟弟竟然肯俾搴搴爸爸抱, 好難得, 搴搴爸爸果然係 BB 殺手 !!