弟弟 6 個月返健康院

今朝返學, 2 部高智能 lift 又一齊上, 一齊落..... 等左好耐都冇 lift, 小慈就話....

小慈: "媽媽, 不如我地行樓梯啦!"

自從有一次其中一部 lift 維修, 大家逼埋用同一部 lift, 而我地又住低層, 部 lift 黎到通常都已經爆棚.... 等左 2 次都係咁, 嬲嬲地我就帶左小慈去行樓梯, 印象中已經係幾耐之前既事, 估唔到小慈仲記得, 仲要識用 "不如" 呢個字眼, 冇刻意教佢都識, 梗係平時聽聽埋埋啦!  好叻呀, 小慈! 

之後同弟弟返健康院, 其實佢已經 6 個半月都黎緊 lu~~

安排得都算唔錯, 食飽奶奶先出發, 弟弟心情好好呢, 沿途左望望, 右望望, 度高磅重 & 姑娘做發展監察, 結果如下:

- 淨重: 8.17kg = 18 磅 (60線咋, 瘦左?)

- 身高: 71cm (90線, 又做男長人?)

- 頭圍: 44cm (65線)

- 分開佢雙腳坐得穩, 扶住隔肋底企得好

- 叫佢有反應, 俾玩具佢識雙手渣住

- 認得照顧佢既人, 會表現興奮, 亦開始對陌生人焦慮

- 會發出唔同聲音, 識吞糊仔

- 每日 4 餐奶 (220ml x 4) + 1 餐米糊 + 果汁/果蓉

姑娘話弟弟一切表現正常, 仲話佢食糊仔食得咁叻叫我地再俾多 d 佢, 份量應該要一隻大人碗咁多, 亦都要開始加餸, 先加一個星期蛋黃, 再一個星期瓜蓉, 跟住俾肉蓉, 呢 3 樣野試晒冇敏感 8 個月就開始煲粥仔, 到時亦都可以開始俾餅乾麵包佢 '妹' 下, 學習咀嚼

我投訴弟弟唔肯飲水, 姑娘就話呢樣野冇得逼, 佢便便冇問題就唔駛太擔心, 不過都要俾水既, 好反抗時就俾果汁, 刮果蓉俾佢食, 水果都有水份, 再唔係就烚紅蘿蔔 or 粟米, 將 d 烚左出味既水俾佢飲, 可能甜甜地佢會肯飲

基本上我都知弟弟冇咩大問題既, 跟足發展程序按部就班咁生長, very good 呀!