媽媽, 我喉嚨好痛呀!

尋晚小慈瞓得好差, 成晚都喊, 全家都唔知有冇瞓過 V__V   果然, 今朝 6:30 am 就喊醒, 即刻入房望下佢, 小慈摸住喉嚨同我講

小慈: "媽媽, 我喉嚨好痛呀~~ 嗚~~"

我: "咁點算呀?"

小慈: "我要睇醫生話俾醫生聽我喉嚨好痛呀!"

不過醫生未有咁早開門呢, 連掛號都未有姑娘聽電話, 於是同小慈玩下泥膠先, 近期日日都要玩過泥膠先安樂, 本來諗住今日陽光普照, 尋日已經約左昊昊去沙灘架, 點知小慈唔舒服, 連帶弟弟都要下一次先可以去沙灘玩沙了......

可能小慈實在太痛, 由 7:00 am 開始不停問我 "醫生開門未呀?"  陰公..... 我唯有教佢睇鐘, 見到支針郁郁郁郁咁, 郁到去個 3 字 (9:15 am)  我地就出門口睇醫生啦!

小慈好留心聽我講, 仲諗住佢會繼續玩泥膠間唔中先望下個鐘, 點知小慈要求企係個鐘前面, 望住個鐘郁到去個 3 字喎...... 真係鄧佢辛苦....

終於夠鐘出門口, 去到診所都未坐低....

小慈: "醫生, 喉嚨好痛呀!"

醫生: "咁醒目既你?  坐低俾我睇下"  小慈睇親醫生都合作到不得了

醫生: "喉嚨有少少紅, 冇白色點點所以冇發炎, 99.5 度有微燒, 都係初起感冒, 而家喉嚨痛遲下可能會變成咳, 睇下佢捱唔捱得過, 佢耳仔有好大舊耳屎, 想唔想我同佢鉗出黎?"

我: "下? 可以鉗既咩?"

醫生: "舊耳屎已經係個門口度, 一鉗就出, 不過我唔係個個都會鉗, 要個小朋友好乖好定先會幫佢, 因為一郁就會好危險, 你乖唔乖架?"

小慈: "乖~~"

於是小慈依偎係我心口度, 側側身咁俾醫生整完左耳整右耳, 真係郁都唔郁, 乖到不得了, 連醫生都讚不絕口!!

嚇親街坊呀!!  醫生鉗出黎既耳屎, 係有手指尾指甲咁長咁闊, 仲要係深黑色架!!!  景象真係好嚇人, 我其實係想影相既, 不過醫生實左太快手, 俾我睇完跟手就掉左..... 話晒都跟左小慈 3 年架麻 @.@

冇左咁大舊耳屎究竟有咩感覺呢?  嘩哈哈~~~ 小慈係咁樣回應既:

小慈: "咩野咁大聲呀?!  咩聲黎架?!  邊個講野呀?"

一路行番屋企, 小慈一直都係講呢幾句, 究竟佢平時聽野係唔係好模糊既呢?  唔通而家好似通左坑渠咁?!