近期既電視廣告, 小慈已經非常眼尖一睇就知係迪士尼, 我估佢唔識史迪仔, 只係認得座城堡, 其實今日工人姐姐放假, 我真係膽搏膽咁帶 2 隻豬出去玩, 弟弟咁細都預左攬住佢全日咩都唔駛做, 不過都想佢睇多 d 野刺激下佢, 怕遲 d 暑假去會中暑, 所以都係 7 月前去 1 次好勒!
出發喇~~~ 小慈真係開心到暈, 沿途不停咁讚爸爸
小慈, "爸爸你今日好叻呀! 爸爸渣車好快呀! 爸爸你今日冇撞車呀!"
佢其實係好開心爸爸渣車車佢去玩, 開心到近乎語無倫次.... 咩今日冇撞車, 我睬! 見到個衰妹興奮成咁, 真係咩都值既 ^^
去到都差不多 11:00 am, 本來想搭火車先, 點知送車尾, 於是改去城堡門口睇 High School Musical, 為左佢, 我事先租左呢套劇既所有碟黎睇, 於是今次終於知佢唱咩, 連帶小慈都好投入, 係咁叫
"Wild cat, let's go!" 笑死 ^^
我今日要湊住弟弟, 所以冇咩點玩, 不過弟弟都好自得其樂架, 食飽訓
訓飽食, 醒左咬下玩具
等小慈家姐玩完一轉木馬, 小飛象, 咖啡杯, 巴斯光年, 馳車天地.... 弟弟都有一齊玩小小世界, 睇水花巡遊, Golden Mickey, 木馬, 小飛象.....可以抱住佢玩既機動遊戲唔係好多架咋!
今日唔算多人, 所以都玩左好多野, 弟弟雖然仲係 BB, 但佢原來都好識玩, 咩都眼碌碌望到實, fing 手 fing 腳表現興奮, 有時仲唔知佢望到 d 咩大笑添, 好 enjoy 咁款~~
弟弟不停望住 D 水
成日抱住佢, 好 high~~
小慈就玩到唔捨得走, 今日好多遊戲都係爸爸單拖帶佢去排隊, 爸爸話佢完全知道自己想玩咩遊戲, 今日所有玩既野都係小慈公主自己要求去玩架, 勁呀~~
我地買左 annual pass 之後只係去左迪士尼 3 次, 小慈已經記得晒樂園有 d 咩玩, 識得叫我地買爆谷, 橙色同黑色個 d 雪條, 不過玩得太 high, 晏晝覺都唔駛瞓, 最後講左玩埋呢次就要返屋企, 佢都可以同我講話未天黑, 佢好掛住煙花要睇埋先走....
經已成精, 迪士尼精 @.@
沒有留言:
張貼留言