小慈尋日開始有乞嚏鼻水, 鼻塞訓唔到仲借 d 依發脾氣, 半夜又喊咁真係全家陪佢辛苦
今朝見佢又冇咩野, 猶豫緊返唔返學時就不如打電話返學校問啦, 學校話小朋友冇發燒但有乞嚏既話要戴口罩防止傳染.... 下? 流鼻水點監佢戴口罩呀? 到我打完電話出去, 爸爸竟然已經幫小慈著好校服等緊我!!! Oh~~ 咁著左校服我又唔想俾小慈覺得可以即刻除番唔駛返學, 所以唯有局住返學勒!
尋晚訓得咁差小慈又 ok 喎, 出門口都好合作, 而家俾佢帶枕頭返學訓晏覺, 佢就當枕頭係護身符咁, 只要我地唔係佢視線範圍, 小慈就一定要攬住枕頭! 你想像下個樣幾怪異 -- 著住整齊校服, 揹住書包, 拎住功課袋, 但仲有手攬住個枕頭聞住咁出門口返學.....
點知老師 10:00am 打電話俾我問小慈係唔係病? 話佢乞嚏鼻水打唔停好辛苦, 又扭計成朝都喊! 我都唔肯定小慈係傷風定鼻敏感, 尋晚先開始起既, 於是陳老師話再觀察佢, 如果佢太辛苦食完 lunch 就接佢返屋企休息啦!
果然陳老師 12:00pm 打黎要接小慈返屋企, 話佢鼻水好嚴重, 人又攰又忟, 係學校不停喊, 又辛苦到訓唔到覺! 我咪唯有同陳老師解釋番今朝如果唔係爸爸幫佢換左校服就唔會返學咁羅! 陳老師又係聽到笑都好認同我既做法
小慈見到工人姐姐咁早黎接佢放學好開心, 晏晝醫生未開門唯有返屋企訓覺先~ 小慈就爽啦, 姐姐係由 1:40pm 抱住佢訓到 3:45pm 呀!!
小慈公主, 如果唔係愛惜你病病咁辛苦, 我地真係唔會咁樣縱容你架!
醫生話佢係傷風, 因為乞嚏敏感鼻水唔會流足全日, 醫生仲吩咐唔好開冷氣, 天氣涼左要開窗保持空氣流通, 聽日唔好返學要留係屋企休息啦!
沒有留言:
張貼留言