返左學一個半月, 第 1 次!! 第 1 次由起身飲奶, 換片, 換校服, 出門口 bye bye 我同爸爸去搭火車, 一直到學校門口 bye bye 工人姐姐都冇喊啊~~~ ^^
不過陳老師話小慈唔知係唔係食藥都仲有唔舒服, 係學校有扭計, 鍾意就喊下咁! 又訓得麻麻, 醒左又係大喊要抱佢入 office 怕佢嘈醒其他小朋友, 好在俾貼紙氹下佢都乖乖!!
只係維持左 1 日, 今朝小慈返學又扭計, 又黐身, 同我講: "媽媽 come here!" 又話一陣先返學, 一陣先食藥, 一陣先換片... 咩都一陣先咁駛出拖字訣, 我先唔會俾機會你呀, 衰妹!
放工返屋企見到小慈個額頭 "雲精" 位又紅又損!! 大驚失色問工人姐姐發生咩事?! 姐姐話小慈入廚房玩櫃門, 咁岩佢拉左個煮飯寶出黎裝完飯冇推番晒入去個爐頭入面, 小慈就撞左埋去, 因為個煮飯寶好熱就係咁樣燙損左, 已經用水同佢敷左, 頭先冇咁腫既!! @.@
我真係嬲呀!!! 出事又唔即刻打電話俾我同我講, 要我問起時仲講到咁輕描淡寫!! 雲精位, 差少少就落眼呀, 盲架大姐! 點可以俾小慈入廚房架, 仲要咁冇手尾?!! 我都未得閒鬧佢, 即刻叫秋秋落街買燙火膏, 我就 dick 左小慈入廁所再同佢沖水洗傷口, 小慈又好勇敢呀, 佢同我講頭先喊左少少而家唔痛
工人姐姐係好乖好聽我話, 但佢真係唔醒目, 唔識分事情既輕重, 怕麻煩我就好多野都唔會主動同我講! 上任半年都仲係驚驚青青, 唔計呢單意外, 上星期五原來佢俾小慈激, 嬲到打左佢手仔一下跟住呢左入廚房喊! 事緣係小慈食粥曳曳, 含住成個鐘都唔吞真係餵到人都癲!! 連小慈都識講:
"小慈曳曳食粥粥喊喊, 姐姐唔開心!"
之後都有乖番, 自己主動走去廚房同姐姐 say sorry, 又攬番姐姐咁..... 事發時我唔係屋企因為我要過海上 First Aid, 大住個肚都要續番個急救牌, 過左 3 年期唔補考番我要由頭讀過 30 小時, 秋秋都冇我咁好氣 :p
於是, 我今晚同工人姐姐好好地溝通溝通, 我一直視工人係我屋企既一份子, 我絕對尊重佢亦都教小慈尊重同埋錫工人姐姐既, 小慈曳一定要同我講, 我會諗方法去解決, 去教好小慈, 但你唔講我聽我一定唔會知你既困難, 我唔會覺得你冇用, 反而 d 野要由我去發現我會仲嬲! 冇人想發生意外既, 不過有事就一定要即刻講俾我知! 工人姐姐聽到喊晒啦....
凌晨 1:00 呀! 我將小慈學校既餐單翻譯左做英文俾工人姐姐參考翻譯到凌晨 1:00 呀!! 希望姐姐有 d 新意煮野俾小慈食, 唔好為左餐 dinner 整到小慈喊晒口, 成個鐘頭都未食完凍晒都冇益啦! 寧願小慈小食多餐又整多 d 花款希望佢開胃 d, 聽日開始唔再食粥!!
俾心機呀姐姐, 我仲有個初生 BB 要靠你架......
