講道理

今朝都仲係喊住返學, 受我氹出到門口, 不過跟住工人姐姐都係 all the way 咁喊住返學 @.@  姐姐話通常返到學校老師見到佢喊到咁凄涼都會抱佢入班房, 好在小慈都肯跟老師, 我幾驚佢攬住姐姐對腳唔放呀....

陳老師放學有打電話俾我, 都留意到小慈呢兩日返學情緒唔係咁穩定, 一諗起媽媽就喊, 仲要係大喊個隻!!   陳老師仲話小慈好得意, 一定要用道理同佢講野, 唔可以用玩具氹, 唔可以用食物氹, 一定要用道理!  例如:  "係唔係要姐姐呀?  係唔係要枕頭呀?  係就收聲食完野 / 洗完手 / xxx 之後先俾你..." 一定要咁講, 同佢講條件先得!  覺得小慈好懂事好識性, 好少小朋友係咁架, 真係好得意!!

估唔到陳老師會用 "得意" 黎形容小慈!  我地一直都係用呢個方式同小慈相處, 如: "安靜先媽媽抱 / 細細聲講媽媽抱 / 飲完奶奶先俾 vitamin C /  食粥粥先睇 Dora..... "  而小慈又非常好記性, 你應承左佢咩咩之後先咩咩, 佢追到天腳底都一定會問你要既!  呢個係互信既關係, 而家連老師都發現到, 好厲害呀!

陳老師話小慈返學係開心架, 有 d 活動如講故事 / 吸印仔 / 唱歌 / 排隊洗手 / 熱身時間... 都睇到小慈好 enjoy, 好投入參與!  只係食飯通常都唔想食, 自己 '不' 兩下就停手, 但老師餵佢就食晒!  訓覺又叻左, 一俾枕頭佢就自己碌兩下訓著, 已經唔駛老師拍佢仲穩定地訓到個幾鐘, 不過醒左可能未醒晒就會坐係床仔喊, 但已經好大進步

我知小慈 enjoy 學校生活架, 佢都有同我講學校既野, 如: 黐埋坐 / 交差腳 / 鞋仔放呢邊 / 手放係背脊排隊 / 企係線後面, 腳仔對齊.... 等....  有時夜晚同佢講故事, 小慈會要 d 公仔一字排開坐好, 小慈會指住自己個鼻話:

"望住小慈, 望住!  望住老師, 望住!  喂喂喂~~ 望住呀!" 

陳老師都聽到笑左出黎 :D  佢地係學校入娃娃角講故事係要小朋友除鞋坐好留心聽既, 我乘機都問陳老師小慈有兩隻歌仔成日唱 (嘟嘟嘟嘟火車開同埋咩呼呼 xxx 好長既我唔識學) 我完全唔知佢唱緊咩....   本來都唔係咩大件事, 只係小慈有時 '屈' 我要我唱, 仲話我識 @.@   陳老師一聽到就話印歌詞紙俾我喇~~   老師你真係太好喇~~   我好慘架, 成日都俾小慈考起! 

之前跟左佢返 3 日學, 學識唱 "騰騰震" 同埋學識 "祈禱", 係屋企有時同佢玩小慈不知幾開心!  陳老師都同意家長多 d 了解參與小朋友既學校生活, 所以佢先花咁多時間同我傾電話 

多謝你呀, 老師~~