小慈填詞

呢個星期同小慈講過話返學唔要枕頭, 枕頭係陳老師度, 工人姐姐要 go market 所以小慈返學 bye bye 姐姐唔要喊.... 小慈呢個星期返學真係唔喊!!  係學校換完鞋仔仲會推工人姐姐走趕佢去街市, 開始適應學校生活喇~~ 感謝主!!!

陳老師打電話俾我話想訓練小慈坐廁所!  佢帶左小慈去廁所幾日, 發覺佢肯坐, 有時屙到一兩滴, 又會主動要求去廁所, 會摸住自己下面, 但去到廁所冇尿就估佢係太急已經屙左落片片!  不如同小慈係學校戒片, 只係訓覺時著番, 由得佢賴尿, 帶多幾套衫返學校替換

陳老師, 你真係好好啊~~~~  其實我地係屋企有訓練佢去廁所架, 不過小慈蝦工人姐姐唔肯去!  而家由學校開始好丫, 返學有群眾壓力, 等老師 train 下佢屋企又監下佢睇下得唔得先

陳老師仲話發覺小慈返學開心左, 冇喊仲笑容滿臉!  好鍾意見到佢笑, 佢笑容好靚, 仲話佢識晒全校咁多個老師, 個個都識叫名仲大大聲講 "早晨~~~"  Yeah!  呢個就係我唔喊既小慈喇!  佢唔喊個時真係好可愛架 ^^

而家講野仲笑死人 -- 小慈去廁所完  /  小慈唔開到  /  小慈唔執到   /  開燈左喇  / 大揹書包 

仲學我大肚好易攰唔想郁時, 佢學晒我講野:

"小慈唔幫手, 小慈攰攰啊~"

"媽媽開丫, 小慈唔識點樣開呀!"  由佢把聲讀出黎真係笑瓜我  :)

今晚仲俾左個驚喜我, 話說我同緊佢玩幫 BB 沖涼, 教識佢洗衫要用番梘, 小慈羅住 BB 擺上 Bingo 隻耳仔度, 唱:

La La La La 曾芷蔚, 曾芷蔚, 曾芷蔚 (mrdrmmm 瑪莉有隻小綿羊 melody)

又唱我個全名, 跟住呢句先嚇親我, 佢唱:

La La 恩慈飲奶奶, 飲奶奶, 飲奶奶.....

點解小慈識填詞?!!  仲岩音岩拍子呀!!!!