開心活力操

今日下晝要去小慈學校學跳 "開心活力操" 

連續三個星期一既放學時間都會有老師教家長跳呢隻活力操, 因為 11月8日係學校既聯校旅行, 6 間分校超過 1000 人會一齊跳, 好熱鬧啊~~  我只係得今日得閒學咋, 所以我帶埋相機一陣錄影老師點跳, 返屋企再苦練!! 

我早左好多到學校, 老師好好人見我大住個肚咁辛苦就俾我入 office 坐, 咁我就有機會同何校長傾計, 以下呢番說話係何校長講既...

校長:
"今年呢班 N1 小朋友好叻,  好快就全班都唔喊, 有規矩, 都有 d 小朋友本來唔喊又番喊, 不過都好快 ok, 係恩慈比較嗲要特別照顧, 好在呢班 N1 乖, 咁老師就有時間有能力特別照顧恩慈, 恩慈好嗲好黐人, 佢喊緊同佢講野, 佢會突然收聲聽下你講咩先, 又唔算爛喊喎, 不過要氹!  情緒問題係要等時間過, 要俾耐性"

我聽校長講野聽到面紅耳赤有 d 尷尬呀!!  咩事你個女要人特別照顧先?!  估唔到小慈 d 衰野連校長都知!!  唉~~ 不過聽到校長話老師好錫小慈我又好開心, 我梗係想多 d 人錫我個女啦!  好在暫時小慈都仲受氹, 叫做有方法對付佢, 求神繼續作工, 幫小慈適應融入學校生活!!

4:10pm 夠鐘跳舞, 老師帶左小慈出黎, 小慈見到我開心得好緊要好緊要!  佢好驚喜呀!! 

攬住我對腳黐到我實一實, 再抬頭望住我叫 "媽媽~~ 媽媽" 個樣超嗲, 周圍望下又攬番我媽左我幾次!!  見到佢個超級滿足樣都氹到我都好開心 ^^

呢隻舞叫開心世界, 幾乎每一個見到我既老師都同我講  "恩慈跳舞好叻呀!  好有音樂感!  好快學識跳得好叻!!" :DDD   果然真係喎!!  老師示範跳舞時小慈都有跟住跳, 真係跟到 8 成架 ^^ 

跳完舞就揹書包放學

你睇個衰妹幾開心~~

都知道平時工人姐姐接小慈放學時有俾零食餅仔佢一路食一路行番屋企, 姐姐話佢冇野食就唔肯行要抱先出此下策!  於是我今日都早有準備買左朱古力手指!  一早預告佢只可以食 5 條, 其實佢咳應該一條都唔食得, 點知個衰妹食完 5 條唔夠皮又知我個袋仲有就開始扭計 @.@  我唔俾手指佢就停左係條街度唔行!!  我行 2 步回頭同佢招手, 小慈對我擰擰頭示意唔肯行, 我唔理佢照行, 仲專登行去一個轉角位等佢睇我唔到 (我都算毒!?!)  我見 d 路人個個見到佢一個小妹妹企左係度就撩佢, 又話帶佢搵媽媽, 不過小慈平時就算心情好都唔睬陌生人架啦, 而家發緊脾氣仲望都唔望人地添呀! 

我等左一陣, 我都唔知點同呢個衰妹鬥硬頸, 好在小慈一發覺見唔到我就即刻追上黎!  我就即刻拉住佢話佢企係條街度唔行唔岩架, 唔見左媽媽好危險架!  媽媽話左 last 5 朱古力手指唔得扭計架麻, 咳咳唔食得咁多架麻.... 云云...... 小慈又話知又話 ok 咁..... 

唉~~  呢 d 事終於發生係我既身上!!  小慈 2 歲半咋!!!  今次兵行險仗我贏左!  如果我處理得唔好, 小慈分分鐘係個 d 係玩具反反城唔買玩具唔肯走訓地大喊要家長抱走個 d 小朋友!!!  @.@

不過我都好硬頸架, 凡事既開頭係好緊要, 我相信如果今次小慈企係條街度逼我就範而我屈服既話, 相信工人姐姐以後既日子好難過!!  好在好在~~