身高 91cm 體重 11kg (24.2磅) 著 80 碼既衫 (舊年到而家!?!) 95 碼既褲 腳仔 15cm
語言方面:
由 2 歲開始已經進步飛快! 返左學之後更加多元化, 生活經驗多左, 講野既內容都豐富左好多! 再加上工人姐姐好有心機咩都會教小慈, 所以小慈近來識多左好多生字, 最長既句子係 "Bird fly up in the sky!" 中文句子暫時最長個句係 "太陽伯伯出黎玩, 好曬呀!" 佢既童言童語真係好多, 幾乎日日都有, 有時仲好爆笑添~~
唱歌既拍子感, 音樂感都好好, 佢係學校學既歌好多時我都知佢唱咩, 跟到佢一齊唱甚至同佢一齊彈鋼琴係最開心既! 我希望培育小慈既音樂感, 於是排左好耐隊報 Tom Lee 既 Music Toddlers, 11 月中開始上堂, 我陪到小慈入院為止, 之後就由爸爸陪佢上堂啦! 基本上小慈既表達能力係唔錯既, 之前有段時間成日手指指丫丫聲咁要野, 經過我訓話要佢嘴仔講丫丫丫媽媽唔知你要咩之後, 而家再冇發生呢 d 情形喇
情緒方面:
小慈正值係傳聞中既 trouble two 高峰期!! 又要適應學校生活變得情緒波動, 易發脾氣, 時喊時笑, 極度需要安全感, 穩定既生活習慣, 好黐身, 鍾意人讚, 富想像力, 當左 Elmo, BB 公仔係親人, 去邊都帶住佢地, 咩都一齊做仲要攬住訓覺添! 好在小慈都講道理, 會知錯, 肯 say sorry, 知道大聲講野唔岩, 未有耐性, 要個樣就即刻要得個樣! 有時同佢講一陣先, 等媽媽 xxx 之後先 xxx, 好記性既小慈追到天腳底都會問你羅既! 唔好打算握佢
大小肌肉方面:
會快跑, 急停, 自行上落樓梯, 踏三輪車, 推車, 拍波, 拋波, 踢波, 碌波, 會用叉匙筷子, 可以自行進食, 用杯飲水, 著鞋著襪, 手眼協調 ok! 識扭蓋, 開門, 插鎖匙, 拉拉錬, 執筆可以寫 1 字, 打圈, 點點點, 填色塗鴉都得!
社交方面:
小慈都係屬於慢熱怕羞既小朋友, 佢唔會抗拒同人玩, 但一定要我 or 爸爸陪住拖住一齊去先得, 自己一個唔敢走遠! 開始表現獨立, 咩都會自己嘗試, 知道規矩, 亦識同人分享, 不過大多數時間都係各自各玩, 通常都係俾自己份玩具人地玩然後自己走左去, 易妒嫉, 唔鍾意我攬住依偎住爸爸, 可能咁樣係分薄左我對佢既愛, 經常要我注意佢, 有時會有對抗性行為, 佢大叫 No! 冇! 一陣先! 不過都肯接受勸導
之前因為佢食得慢吞得辛苦就整粥仔俾佢食, 點知小慈公主食到厭 @.@ 怕左呢個衰妹而家餐餐整客飯俾佢食
飯餸分開又用靚碟, 小慈識得自己食飯
自己飲湯
呢個就係佢至愛既 BB 喇, 每日放學返屋企鞋都未除就大叫 "BB~~~"
呢個 BB 俾佢玩到殘晒起晒毛粒, 於是錫到佢燶既嫲嫲幫 BB 度身, 車左 2 套可以替換既衫俾 BB, 呢套係夏天, 仲有一套冬天, 手工極之好呀!!
要越來越乖先得架!
沒有留言:
張貼留言