指揮老師

陳老師下晝非常緊張咁打俾我問小慈個 "雲精" 咩事?  於是我由頭到尾講一次事發經過俾佢聽, 傷口已經結焦, 唔攪佢應該好快好番既, 唯一希望唔好留下烙印破相 @.@

陳老師話小慈好有主見會指揮老師, 特別係代課老師!  指人地幫佢羅書包, 又要貼紙, 又要攬住噯佢訓... 等, 陳老師會要求小慈訓醒都要坐係床度等, 但其他老師就會遷就小慈, 所以小慈係唔敢 "蝦" 陳老師, 要佢做咩小慈都會聽話

嘩~~ 衰妹精甩邊呀!!  係屋企佢都係蝦工人姐姐同埋爸爸架, 我一發惡佢就知死梗, 之前同秋秋有共識, 邊個教緊小慈另一個係唔會出聲!  費事幫口會變嘈交, 小慈亦會無所適從, 一個人鬧夠喇

陳老師仲話小慈專登扭計!  上星期見佢唔舒服會就下佢, 呢兩日好番就冇再就, 明明唔要枕頭係冇事既, 但佢專登扭計, 特別係食飯既時候係都要攬住枕頭, 比較情緒化, lunch 食食下會停左要人餵唔係好合作, 不過都有食晒, 茶點就會自己完成

不過小慈都有佢可愛既地方, 陳老師讚佢會聞歌起舞 :DDDD

黎緊學校 11月 8日有旅行, 教緊小朋友跳 "開心活力操", 佢話小慈已經識唱!  平時只要小慈聽到課室播緊呢隻音樂, 佢都會即刻停低做緊既活動聞歌起舞~~  全班得佢一個係咁, 小慈真係好鍾意唱歌跳舞 ^^