有進步

今朝小慈出門口有扭計要枕頭, 好在我同左陳老師夾口供點樣應付佢!!  我等佢冷靜左先同佢講枕頭係陳老師度, 係被被度記唔記得?  訓覺先要枕頭, 返學唔要喇!  果然有效喎, 小慈明晒 ^^

5:00pm 陳老師都有打電話俾我, 首先佢報告話小慈今日去廁所時玩門夾親右手手指公!  有少少紅瘀不過佢冇喊, 事源係工友姐姐帶小慈同另一位小朋友去廁所, 佢小解另一個大解, 小慈係無人看管既情況下見度門虛掩就走去關門咁就夾親!  返到課室識同陳老師講夾手手, 已經話左佢架喇!  我覺得好小事不過老師有責任要講, 我明, 屋企有 U 型門夾所以小慈從來都冇夾過手, 夾下佢都係好既, 印象深刻

陳老師仲話小慈今日訓得長左, 12:15pm 上床 12:30pm 自己攬枕頭訓著訓到 2:15pm, 訓醒又冇喊, 好安靜, 仲睇住嬸嬸褶被收埋佢個枕頭係被被度先安心晒, 好似好信唔過人咁, 超爆笑!!  又要俾時間佢適應返學放學冇枕頭

食飯方面又有進步, 會自己完成唔會食食下停係度要人餵!  係今日食炒麵比較輪盡要老師幫手, 不過老師話小慈唔肯食湯渣, 會用手攪條脷抹走 d 湯渣!  其實個 d 都唔係真係渣, 係蘿蔔絲, 有時係肉肉要佢食, 小慈都聽話不過睇得出佢唔慣! 

我答老師小慈係屋企係飲清湯架, 仲補充話小慈而家係屋企都係跟學校個餐單同埋份量咁食飯, 大約係半個大人碗, 於是陳老師明晒點解小慈會有明顯既進步, 食得快左, 食得多左 :) 

仲有呢個星期要求工人姐姐放學帶小慈去公園跑跑跳跳至少半個鐘之後, 小慈夜晚訓覺明顯好左!  係公園放下電發洩下精力個人攰 d 訓得好 d, 冇再半夜大喊拍門要我抱住佢訓了, 全家都有覺好訓, yeah!

難得我同陳老師咁緊密聯繫, 希望家校合作, 令小慈能夠養成良好生活習慣, 食多 d 訓多 d 守規矩講道理 

多謝你呀, 陳老師~~