白石 BBQ

Cherrie 姨姨生日, 天氣太好大家都想多 d 戶外活動, 於是就決定去白石 BBQ!!

我地等埋小慈公主訓醒晏覺先出發, 去到都 3:45pm, 同何柏曦 social 左一陣就到佢訓晏覺, 反而小慈同 Wendy 姨姨玩 1 2 3 jump 跳路駁跳到好 high, 呢度都大大地可以俾小慈跑下吹下 bubbles

小慈好耐冇 bbq 喇, 對上一次係一年前同埋昊昊都係黎呢度, 個時仲係乖乖地坐定定俾嫲嫲一人一啖餵蕃薯, 今年大個女做左 '不求人' 咩都要自己黎! 

燒腸仔, 燒粟米, 咩都要自己叉住黎燒, 燒左都冇 1 分鐘就同我講 "食得喇~~ 小慈 um 丫!"  真係俾佢食就毒瓜佢呀! 

又坐唔定, 爸爸抱佢出去行個圈返黎雙手一定有野渣住!!  烏龍茶啦, bubbles 啦, 雪條啦.... 見到其他人有咩佢又要, 秋秋又真係買俾佢!!!  名副其實 "慈父" 啊~~~ 縱壞晒

唔~~~ 雪條好凍.... 但又要食

到秋秋燒野食時就到我帶小慈出去玩下 bubbles 啦, 玩下狗仔啦, 白石呢度真係好多人放狗!  小慈見到 d 狗狗真係太熱情, 不停咁摸人地 d 狗又攬又錫, 有隻狗仔頂唔順咬左小慈隻手仔一下, 好在唔係太大力冇流血.... 我目睹整個過程, 不過我唔想大叫太大反應怕小慈從此怕狗, 所以我只係話 "走喇!  狗狗攰喇, 我地俾狗狗休息啦!"  反而係狗主人鬧佢隻狗咬人 No 佢時, 小慈聽到又加把嘴話: "狗狗曳曳唔咬小慈架!"  即係佢都知狗狗真係咬佢 @.@  影低凶手個樣先

由天光跳到跳黑, 好 high

好玩!