去昊昊會所玩

今日約左昊昊去會所一齊玩, 呢個會所幾好呀, 有分大 B 區同埋細 B 區, 小慈同昊昊咁細個好易俾 d 大哥哥姐姐撞親, 分開玩好好多呢~~

昊昊細小慈半年, 就黎同小慈一樣高, 果然高大威猛

呢度係昊昊既地頭, 佢非常熟絡又非常熱情咁帶小慈玩呢樣玩個樣

玩完一齊去爺爺嫲嫲屋企食飯

有伴玩當然零舍開心 :D

美麗姨姨

美麗姨姨搬新屋, 俾左個機會我地一班老友記聚首一堂, 我仲俾左個驚喜大家, 因為太耐冇見, 佢地唔知我大肚呀 :)

美麗姨姨屋企靚到 dom 一聲, 裝修好得, 掂!!!

第一次開學校生日會

小慈夜晚咳, 訓得差, 半夜喊, 朝早又訓唔醒... 辛辛苦苦氹到佢出門口返學點知工人姐姐話佢 bye bye 完我地之後一直喊住行返學, 亦唔想入學校

放學老師有打電話俾我話小慈全日都喊!!   10:00am 食完早餐玩大肌肉已經喊唔肯玩, 拖住老師又指住門口叫姐姐示意想走.  陳老師見佢心情咁差俾枕頭佢攬住有番 d 安全感就好少少冇再喊.  今日學校生日會, N1 同 K1 合班玩遊戲, 玩聽指示跳入呼拉圈, 又聽鼓聲做律動, 小慈肯玩都有笑 (我想像緊佢攬住枕頭玩遊戲個樣)  仲有齊齊戴生日帽唱生日歌切蛋糕又有燒賣蟹柳食, 我聽到都覺得開心!  陳老師話小慈 enjoy 既, 不過今日同平時上堂唔同就冇左安全感!  今日訓覺有進步訓左個幾鐘, 估佢係因為唔舒服所以特別攰, 不過醒左去完廁所食茶點又喊, 又要俾個枕頭佢攬住!

陳老師仲要我為意下小慈咳既程度, 而家咳但有痰聲可能要再睇醫生, 仲有問我小慈係唔係體溫比較高 d?  成日摸佢手心都比較熱以為佢發燒但探熱又冇野.  老師真係細心咁都留意到!!  不過我估小慈係似我熱底, 手仔腳仔唔會凍冰冰個類人啦~

聽完陳老師個電話我真係好安心, 佢地真係好細心好留意小慈既進展呀!  一萬個放心

病好返學又打風

真係估唔到上星期五病左之後, 星期日覆診醫生勸籲星期一都唔好返學!  醫生話小慈仲有咳, 體弱, 會傳染俾人, 人地又會傳染俾佢, 病緊心情又唔好返學都會扭計云云..... 既然醫生都咁講就再請多一日病假.....  雖然唔想斷左佢既進度不過真係冇辦法, 解釋俾小慈聽因為佢咳咳發燒唔駛返學時, 衰妹既反應係歡呼  @.@

星期二, 預備返學時竟然打風?!!  教育署一早宣佈朝早會改發 3 號風球, 我地返工時小慈仲訓緊

星期三, 風球黑格比來得快去得快, 尋晚 8 號風球今朝都仲有 3 號風球小慈又唔駛返學, 仲唔想我返工拖返我入屋話唔要 bye bye 添

今日星期四終於要返學喇~~ 竟然鬧鐘響 2 次小慈都聽唔到, 工人姐姐又由佢訓!?!  果然急急腳整醒小慈衰妹就扭計, 叫佢換衫返學仲大喊大叫: "唔要呀~~ 唔要換校服唔返學呀~~ "  我攬下佢又拍下佢膊頭安慰佢話返學好開心, 同小朋友一齊多謝天父食茶點, 老師又會講故事, 做 exercise, 又玩滑梯又坐車車砌大 lego..... 小慈本來成個人伏左係我膊頭度喊到好傷心, 但聽我講講下就收聲仲搭嘴話: "唔玩滑梯!  要排隊洗手, 溫希倫排隊羅!"  咁快記得同學仔個名返學都開心啦!  就係咁氹氹下就肯換校服, 自己揹書包, 揹功課袋仲帶埋枕頭返去訓覺.  跟住工人姐姐返學 look sad only, 冇喊了~~

2:30pm 打俾陳老師問小慈情況, 因為我唔知今日應該 3:30pm 定 4:30pm 接小慈放學?  陳老師話恩慈今日 ok 呀!  12:40pm 訓到 1:20pm, 醒左自己坐係床仔同老師傾計, 好乖.  只係一開始訓覺時未有枕頭, 又係替工老師去拍佢, 小慈唔熟個個老師先冇安全感大喊!  之後陳老師俾番枕頭佢攬住又去拍佢就好快訓著.  氹下佢都安靜, 好 ok 所以可以 4:30pm 放學!!!

感謝神!  本來我好擔心小慈尋晚咳已經訓得唔好, 係學校又訓咁少會好扭計添!  點知佢全日都好乖喎, 真係太好喇~~

何柏曦

Cherrie 姨姨個仔何柏曦做左電視明星呀!!!! 

佢機緣巧合之下拍左一個奶粉廣告賺左佢人生入面第一個 $8000, 於是請我地呢一班契媽上去佢屋企慶祝~~

不過主角唔肯上鏡, 但係同小慈玩得好開心

Day 14 發燒冇返學

小慈今日 2 歲 5 個月大, 只係返左 2 個星期學就病左, 都知道返學會多病痛但冇諗過咁快!!  雖然由開學到而家小慈 d 咳都未停過, 但冇估到會發燒, 今朝仲成個火爐仔咁有 38.8 度 

帶小慈睇醫生佢極度興奮, 自己係診所上磅得番 23 磅, 已經冇增長仲要打回頭....  不知幾精靈既小慈完全唔似病緊, 指揮醫生又話要睇佢耳仔又話聽背脊仲自動擘大口 "丫" 一聲咁俾醫生睇喉嚨仔!  醫生話佢喉嚨紅腫發炎所以有燒, 仲好話我咳咁耐都唔帶佢黎睇醫生會氣管炎變哮喘!!  咁... 小慈又唔算咳得好嚴重, 耐唔耐先一兩聲個隻, 似係 d 痰尾清極都清唔到已經俾緊鹽蛇散佢食, 點同醫生講喎~~  之後睇完醫生返屋企小慈唔俾我走,  攬住我對腳話: "媽媽唔返工過黎 sit down 丫"  我都好想呀女.... 我同佢講 "工人姐姐係屋企陪你"  佢又話 ok, 好乖好生性

陳老師 1:15pm 打電話俾我問候小慈, 佢話學校冇小朋友病緊, 之前有一個咳得好厲害已經冇返學幾日, 其他有咳既都有戴口罩, 得小慈 1 個請病假冇返學咋!  咁我就唔知點解小慈會無端端發燒喇?!   Anyway, 陳老師都提我發燒唔返學係岩既, 仲要退左燒要休息 2 日先好再返學, 仲話小慈尋日食午餐已經冇胃口, 食下停下唔係好願食咁, 仲將自己隻匙放左去隔離同學隻碗度添!  食得慢要老師餵, 呢樣真係要慢慢改善, 可能佢尋日唔舒服先係咁, 不過強調小慈係好聽話, 係話得聽既小朋友, 叫我放心

我順便問埋陳老師尋日小慈係學校訓覺訓成點?  陳老師話小慈好乖, 俾個枕頭佢攬住有少少飲泣但冇大喊, 同佢講陳老師去抱下喊緊既小朋友一陣返黎拍佢, 佢又話好, 好乖, 真係轉頭返去拍佢佢就訓, 不過訓半個鐘就醒左, 自己坐係床仔好安靜, 個個老師都讚佢乖, 陳老師去陪佢傾偈傾到夠鐘先落床!  今日仲好野呀, 只係第 2 日係學校訓覺, 全班 N1 1:00pm 前全部訓著晒!!  如果唔係陳老師都冇時間打電話俾我, 勁!!  所以陳老師好有信心小慈星期一返黎係返足全日冇問題既

Day 13 係學校訓晏覺

Day 13 -- 連續第 3 日見到套校服就喊勒, 希望陳老師今日同佢傾下偈啦!  氹佢都係喊, 於是我今朝完全唔理佢照幫佢換校服換片著鞋著襪羅書包仲要擺個枕頭落功課袋... 奇蹟就係呢個時候發生喇, 小慈突然對功課袋發生濃厚興趣, 話入面有書書, 小慈吸, 小慈架咁.... 揹完書包仲要自己羅功課袋, 突然變得好積極, 唔記得左自己頭先仲扭緊計眼淚都未抹!!   一路行一路數同學名, 我只係聽得明曾芷蔚, 溫希倫, 瑤瑤.  拖住我行行下停低, 自動自覺同我 say goodbye 叫我返工!  佢又知我每日係呢個 stop point 同佢分手喎, 好醒!

3:30pm 放學小慈有笑!  工人姐姐話佢係學校訓左 30 分鐘咋!!  於是 4:00pm 返到屋企就扭眼訓, 大喊又成個訓左係地下唔肯換衫, 夾硬抱佢去沖涼就由頭喊到落尾, 沖完出黎就係梳化訓左!  4:45pm 訓到 5:30pm 自己碌起身入廚房拉工人姐姐出黎陪佢再訓到 6:20pm!!  咁都得?!

到我地放工返屋企佢都表現開心, 問佢係學校有冇訓覺佢都答有.  不過今晚都好扭計, 又係屙左臭臭死都唔肯換片, 同佢玩玩下仲無端端大喊添!  呢呢 lur lur 都唔知佢想講咩要咩, 我叫佢用嘴仔講俾媽媽聽之麻, 佢竟然可以越喊越大聲!  要佢安靜仲駁我嘴話唔要安靜 !!!!!!

佢發緊爛渣我唔望佢自己睇電視, 佢又爬上我大脾要我抱喎, 我堅持要佢收聲先抱佢又大喊大叫 No~~~ 我又唔睬佢!  好在拉鋸左一陣佢都自己安靜, 壓低把聲講媽媽抱, 羅紙巾俾我要我幫佢抹眼淚.  我一邊抹一邊哦佢話唔要喊架, 媽媽唔開心, 小慈喊冇人睬小慈云云.... 講講下摸到佢額頭好熱, Oh No~~~ 小慈發燒!!!!!!!    岩岩飲完奶想等一陣先俾退燒水佢飲怕佢嘔, 點知我攬住佢一陣已經訓著左.... 唉~~ 點解會無端端發燒架!!!!

假期後遺症

Day 11 -- 經過 3 日中秋節長假期節目多姿多彩, 小慈日日都對住我地開心到飛起已經對返學拋諸腦後!  果然一見到套校服就大叫 "No 呀~~~~~~~"  推工人姐姐走, 又推我入房唔俾我地幫佢換衫之餘仲大喊添!!  氹佢收左聲之後又冇咩野, 係返學個樣有 d 傷感, 工人姐姐話佢之後都冇喊, 陳老師又冇打俾我應該冇事掛?

點知小慈半夜大喊!!  姐姐抱住佢都係大喊叫媽媽!  3:40am 呀女~~  我都知我一出去接手就甩唔到身, 算啦, 橫掂聽到佢喊我都訓唔著架勒, 果然小慈公主一見到我已經飛身撲埋黎, 但我都係要佢收聲先抱佢, 攬住佢係梳化好快訓著, 小慈不停發開口夢, 我淨係聽得明個 No 字!  佢 No 咩我都唔知咁就係梳化訓天光....

Day 12 -- 同小慈講換衫返學媽媽換衫返工又即刻大喊!!  仲要今次點氹都喊!!  聞到佢屙左臭臭仲衰到唔肯換片!!  時間緊迫, 我地唯有使用暴力, 秋按住小慈雙手我按住小慈雙腳工人姐姐同佢抹 pat pat!  秋又喝佢, 我又喊打, 加埋小慈既大喊聲簡直亂七八糟慘不忍睹, 隔離屋可能已經報左警.....

好在小慈都仲會要 "媽媽抱", 佢有野求我就可以治佢!  終於都喊夠肯收聲, 我哦佢返學唔喊架, 換校服都唔喊架... 佢冷靜左又識答我 "知" "唔喊"..... 工人姐姐話佢 all the way look sad, 喊到眼腫腫冇里神氣

放學我忍唔住打俾陳老師講換校服大喊呢個問題!  陳老師話小慈叻左呢兩日返學冇喊冇眼紅紅又冇飲泣, 只係表現得緊張唔係好自然, 好被動唔係好 enjoy, 不過有 d 活動如聽故事做熱身就有開心笑, 唔講真係唔知佢唔肯換校服, 應承我會同佢傾下!  暫時全班 N1 都適應得幾好個個都冇喊, 好乖~~  係常規要 keep 因為佢地未知幾時做咩, 返左學 2 個星期有咁既表現陳老師已經好滿意

今日開始派 "功課袋", 入面會裝通告, 宗教書, 英文書等, 逢星期一會收手冊, 星期二會派番咁家長就會知道學校上一周教過咩野, 教左既野會吸一個紅色既 "已授" 印仔, 陳老師係會俾小朋友自己吸印仔既, 唔怪得小慈成日叫 "小慈吸" 啦!

另外問下小慈係學校既食飯情況, 陳老師話小慈係受氹既小朋友, 食飯食食下會停左, 等下又望下人咁, 要老師餵飯, 自己唔會主動食, 但老師餵就會食晒細半碗飯同埋飲晒半碗湯, 飲湯最叻!

聽日開始要係學校訓覺, 陳老師都覺得小慈可以, 問小慈訓覺要唔要輔助工具?  我咪答佢有個枕頭仔羅!  老師就請我地記得帶埋枕頭返學等佢有安全感, 就算佢唔肯訓, 訓唔著, 老師都有方法氹佢既! 

好緊張呀~~ 希望小慈 ok 啦~~

靚 B 會去沙灘~~

天氣好好, 於是約埋一班朋友仔一齊去沙灘玩 

4:00pm 集合原來係冇車位架!!!  爸爸們各自等位泊車, 我唯有同小慈去沙灘搵位玩沙先啦!

d 沙涼涼地感覺好舒服

不過坐一陣小慈已經熱到出晒汗

爸爸及時駕到!!  可以落水玩喇

小慈好開心~~~

借左巧巧個水泡黎玩

游完水又返上岸玩沙玩水槍, 好忙呀

搴搴爸爸帶左張沙灘枱黎玩, 好正呀! 玩到唔捨得走

夜晚一人帶一個燈籠去布袋澳食海鮮, 我地帶左個媽媽至愛小白兔燈籠, 小慈嘟晒嘴咁問巧巧借個燈籠黎玩

小慈呢個小白兔燈籠係環保燈籠黎架!!  已經玩左 2 年, 抵呀!

好難集合所有小朋友, 照影大合照先

要返屋企喇

開心!

做節

一年易過又中秋, 今晚返爺爺嫲嫲屋企做節呀

中秋月亮份外圓, 兩父女係度曬月光  :)

攝影大師小慈又要影相喇~~

近來鍾意笑到見牙唔見眼

大頭仔昊昊

一人一個燈籠仔

簡單就是開心 ^^

小明照 4D

專登搵番小慈個醫生幫弟弟照 4D, 約都冇咁岩佢兩個都係 26 weeks 6 days 照, yeah!!!! 

想俾小慈多 d 參與生 BB 呢件事, 亦都想佢早 d 同弟弟建立感情, 於是今日等小慈放學返黎訓醒就帶埋佢一齊產檢, 小慈知道帶埋弟弟一齊睇醫生表現得好開心呢

小慈大鬧診所, 又要自己走去磅重, 又爬梳化, 又要睇書, 又跳又笑大叫 "姑娘" 真係怕左佢呀!  好在呢度係婦科診所, 大肚婆對小朋友係包容度高 d 既, 姑娘見到小慈都笑住問我上次係咪都係黎呢度照小慈?  咁快就咁大個女話佢個樣好似媽咪云云..... 係, 時間真係好快過

弟弟明顯地大隻過當年既小慈好多, 小慈 26 weeks 得 913g, 弟弟未夠 26 weeks 已經 991g!  而我就重左 10 磅左右, 暫時都係肥晒係弟弟度, 今胎冇妊娠糖尿我好開心, 不過我都冇亂食野架, 10 磅好克制添啦!  之前有一段時間極度鍾意食榴槤, 係當飯食個隻我幾驚呀, 好在維持左 1 個月就甩左呢條癮, 全家都冇人鍾意榴槤隻味, 連小慈都雞飛狗走, 我係開住抽氣扇都要食個隻呀!  可想而知我條癮幾大~~  我唔想架  @.@ 

秋秋補充話我陀小慈個時鍾意食花園餐廳既牛扒呀, 一星期食幾次都唔厭個隻!  又試過專登出車去觀塘食腩河, 好 "牛精" 呀個時  :p

弟弟今日非常合作, 上次小慈係訓左覺, 等多半個鐘再照都仲訓緊, 要姑娘推我個肚篤醒小慈, 於是衰妹皺晒眉頭扁晒嘴好唔高興, 影左 10 張相佢都係同一表情!?!   弟弟就好唔同喇, 一照就見到佢既盧山真面目~~~  影到 1 張弟弟咧嘴笑得好靚, 1 張舉手 say Hi, 1 張舉腳上面, 動作多多超爆笑氹到大家好開心! 

情人眼裡出西施, 我覺得佢個樣好 man 好靚仔 ^^  秋秋就覺得弟弟勁似佢, 真係連佢自己都覺得照鏡咁呀, 一樣係額闊尖下巴嘴唇有肉, 遺傳真係好神奇啊~~~  不過醫生輕輕帶過話弟弟條頸戴左條頸錬, 臍帶圈住條頸一個圈, 不過係鬆鬆地既.... 下??!!!!???   問佢點算??  醫生又話冇咩野, 冇咩野你又講我聽?!  大肚婆唔嚇得架!

小慈好興奮, 好多野講又成日走去裝 d 姑娘姐姐做緊咩!  終於係電視機度見到弟弟個樣, 不停話弟弟開心笑, 係咁同弟弟 say hello, 又話弟弟偏晒呀!  勁得意呀佢 ^8^

Day 10 中秋節慶祝會

今日係學校既中秋節慶祝會, 小朋友可以著便服返去開 party, 不過非常怪異地要揹書包 !?   準備出門口時, 小慈同我講: "媽媽去街街!"   噢~~ 我都有諗過同小慈照著校服就係怕佢有混亂誤解, 問過陳老師佢又話著便服返學校開 party 開心 d, 每逢喜慶節日同埋每個月既生日會都會係咁安排, 冇計啦, 我照同小慈解釋但佢唔明, 先入為主地覺得換衫係去街著校服先係返學!  所以當我要佢揹書包時佢好抗拒, 係咁 bye bye 書包唔肯揹又話一陣先咁... 係樓下分手, 我幾驚佢要我同佢去街唔肯返學呀!  好在小慈都順灘, 不過由始至終都唔肯揹書包要工人姐姐羅住

我今日要去健康院做妊娠糖尿測試, 見時間岩我就去接小慈放學, 仲以為衰妹見到我會好驚喜, 點知佢冇咩反應!  但我就有機會同陳老師面談唔駛佢打電話俾我  :p   陳老師話小慈今日有喊呀!  唔係大喊, 係飲泣個隻!  可能今日返學程序唔同左, 要同 K1 夾班, 好多小朋友一齊開 party, 同平時唔一樣小慈有 d 唔適應, 所以一諗起就眼紅紅想喊, 但老師攬下佢, 抱佢係大脾坐下佢又 ok!  問佢喊係唔係因為掛住媽咪佢就話

"係掛住呀" 

不過老師叫佢做咩都肯做, 係一個好聽話既小朋友, 只係抑止唔到自己既情緒就會用喊黎表達自己既唔開心, 係好事黎既!  好過佢冇反應, 慢慢黎就好 ok

傻妹, 媽媽都想時時刻刻陪住你, 陪你長大啦!  雖然唔係秒秒鐘都見到對方, 但我心入面有你, 你心入面有我就得架喇!~~  不過呢個道理怕且佢要好大個先明白

回家路途上小慈已經回復真我, 又唱歌又周圍手指指好多野講,  佢話俾我聽其中一個燈籠係 octopus, 又話陳老師幫手拉架, 又話要俾爸爸同姐姐睇, 搭火車又要自己嘟八達通仲識問我羅野食, 俾左盒宅卡 B 佢就食到停唔到口, 開心晒~~

Day 9 返學 3 小時

小慈今日超乖~~ 換校服, 揹書包著波鞋全部都好合作!  去到樓下仲識同我講: "小慈返學, 爸爸媽媽返工" !!  工人姐姐走又冇喊, 不過接放學時見佢眼紅紅似乎喊過??!

陳老師 lunch time 打俾我交代番, 佢話小慈今日係學校有喊, 第一次係入課室放書包, 佢眼紅但冇喊出黎, 安慰完就冇事, 早餐生果食晒, 次次都食晒, 好乖, 唔算太慢添

第二次喊係因為小慈記得自己幾時放學!!  平時 11am 食完生果玩一陣就可以走, 今日又要洗手仲要食飯, 佢唔想食所以喊左出黎.....   唔係大喊只係流眼淚覺得自己好委屈, 但都有食晒個 4-5 匙既蕃茄豆腐飯, 陳老師仲話小慈係一個好肯守規矩既小朋友, 適應得好好, 慢慢習慣學校有規律既生活佢會好 ok!  仲話小慈有眼紅紅既反應係好事代表佢識表達自己, 又肯聽老師講道理又接受安慰, 表現克制咁表達自己唔開心唔係大吵大鬧, 呢種小朋友係最快最能夠適應學校生活既!

聽完小慈喊既原因我有 d 心痛, 點解小慈會知道時間既呢?  咁心急想返屋企?!  係學校渡秒如年?  真係估唔到佢心水咁清, 之前 10:30am 改放 11am 唔多覺, 12pm 食埋 lunch 就即刻知!  真係好醒呀!  對時間咁敏感, 唔知下星期係學校訓覺會點呢?

Day 8 返學冇喊

今朝小慈好精神好醒目, 大大聲叫 "媽媽早晨~~"   本來心情好靚, 但一見工人姐姐羅校服又推開姐姐仲話一陣先 @.@  我就俾個下台階佢話食完早餐就換校服啦?  小慈都應承, 點知到出門口著鞋, 姐姐同佢講 go to school la, go to see teachers la... 小慈大聲叫 NO~~~ 跟住大喊流眼淚!!!!   我薄責左工人幾句, 你明知佢情緒波動已經唔肯換校服你就唔好刺激佢麻!  好在小慈都係喊左 1 分鐘... 唉~~  營造愉快上學既氣氛真係唔容易呢!  不過學陳老師講要小慈習慣返學係生活既一部份, 所以喊都要日日做

之後返學又好順灘喎, 第一次入到學校冇喊!!  可能象徵式係屋企喊左, 放學都冇喊, 今日食左芝士三文治 and 雪梨, 學校仲派左張 "秋季飲食餐單" 列明每日係學校食咩咁就唔駛再問老師, 嘩~~ 真係好好餸呀!  睇到我都流口水~~~  伙食咁好, 希望小慈可以食肥 d

放工返黎我考下小慈學校既野, 問佢記唔記得係學校食咩?  小慈識答我食包包喎!  仲同我講陳老師抹抹抹 (指去完洗手間抹 pat pat)  好野喎!  真係識憶述事情, 同我有問有答有溝通對話 so sweet ^8^

Day 7 返學 2 小時

Day 7 -- 今朝工人姐姐想幫小慈換校服時正正係小慈同我地玩到慶高采烈之際, 於是衰妹就推姐姐 pat pat 趕佢入房, 仲話唔要書包 bye bye 陳老師要搵區老師同 Idy 姐姐仲有柏弦!  真係俾佢激死!  點可以推姐姐架?!  以為返開心豆芽組就可以同爸爸媽媽一齊咩?  小朋友既推斷力真係好攪笑, 我只係話佢推姐姐唔岩, 其他野我冇鬧佢唔想佢喊晒咁返學!  我解釋俾小慈聽學校冇區老師架, 點知小慈堅持話有, 於是我話: "咁你跟姐姐返學睇下有冇區老師返黎話俾媽媽聽啦!"  小慈竟然話好真係笑鬼死我  :DDDDD

係樓下分手時, 我行幾步路就回頭望下小慈, 點知佢又回望我喎, 一見到我望佢即刻再次同我揮手又飛吻, 表現非常依依不捨難捨難離......  工人姐姐話佢之後唔肯自己行呀, 氹佢自己行有糖食, 點知食完粒糖就要抱  @.@   係學校時又係同佢 bye bye 就喊, 但有老師抱住就冇事

之後, 陳老師有打電話俾我匯報小慈返學既情況, 可能我尋日打過俾佢啦  :p  工人姐姐每日接放學時又問得好詳細小慈既情形知我地係緊張家庭就特別照顧!!   陳老師話小慈其實係 ok 既, 不過每朝都象徵性喊下, 唔係真係喊, 眼紅紅想流眼淚個隻唔係真係唔開心

今日貝殼粉同香蕉都食晒, 但飲水時就曳曳放左隻手入杯裡面玩水, 但叫得停, 係學校賴左大便, 嬸嬸幫佢換左片片, 好合作冇麻煩, 知道小慈抗拒除鞋坐地墊點名同埋聽故事, 於是安排左佢可以食住早餐咁坐係枱度聽, 效果好好小慈好自在, 聽故事聽到好有反應會指住本圖書講入面有咩添!!   星期四會開始安排小慈係學校食午餐, 但份量唔會太多寧願佢食晒再舉手添, 所以係食唔飽返到屋企可能要再餵飯, 陳老師最後仲話小慈係醒目女黎既, 每次老師收名牌換鞋就知道放學!  好醒!

嘩~~~ 陳老師你好厲害呀!!!!!   一班咁多個學生要照顧你都咁仔細留意小慈!!  我好感動啊~~~  之後我仲藉機會問下陳老師小慈朝早唔肯換校服既問題, 陳老師教我同佢講: "陳老師等緊你返學呀!  好多小朋友都等緊小慈一齊返學一齊玩呀"  灌輸返學係生活既一部份, 好快就可以習慣星期一至五都返學, 岩岩適應冇媽媽係身邊, 小慈已經做得好好, 叫我放心 ^^

Day 6 工人姐姐湊返學

Day 6 返學, 今日由工人姐姐湊小慈搭火車返學, 好緊張呀!

一早工人姐姐幫小慈換校服又 ok 喎, 我同小慈講定今日爸爸媽媽要返工, 姐姐同小慈返學 ok?  小慈 '唔' 左我一聲表示知道, 仲自己入房羅書包準備出門口, 佢真係好鍾意個書包架, 自己由頭到尾揹住唔會除, 乖女~~

落到樓下 say goodbye, 小慈又好合作咁錫完我就走去錫埋爸爸, 揮手 bye bye 就拖住工人姐姐走, 超級乖!!   不過之後姐姐話返到學校小慈拉住佢唔肯入課室亦唔想換鞋大喊扭抱 @.@  姐姐不敢怠慢一有老師接手佢就走 (good!  我非常欣賞佢跟足我既做法!)

放學時小慈見到姐姐問: "媽媽呢?"  姐姐話媽媽返工佢又冇咩野, 表現開心!

1:00-3:00pm 可以俾家長打去學校搵老師既, 於是我打俾陳老師問下

陳老師話小慈今日好叻叻呀, 淨係返學時有少少眼濕濕, 之後所有野都肯跟, 花生醬三文治同橙都食晒, 冇問題, 仲字正腔圓識叫 "陳老師"~~~~  佢已經當陳老師係佢既水泡啦, 有一個依靠, 有安全感係好好多既!  陳老師仲話小慈成熟, 懂事, 好明白 d 野點做, 又跟得好好, 話小慈遲 d 再熟習學校既時間表知道幾點做咩就完全冇問題

聽到老師對小慈咁有信心我都好安慰, 竟然用成熟黎形容小慈真係好攪笑!  小慈係一個話一就一既小朋友黎架, 非常明白事理, 又肯表達自己, 多謝老師欣賞佢~~~

同爺爺嫲嫲去摸蜆

朋友介紹白石沙灘可以摸蜆, 摸完仲可以炒黎食添!   嘩~~  好玩呀~~

白石沙灘仲要好近我地屋企, 於是請精通天文地理既秋秋上網 check 到今日 3:00pm 潮退, good fit 呀!  3:00pm 小慈訓醒晏覺太陽又唔曬最岩戶外活動!  我地仲請埋爺爺嫲嫲一齊去添, 佢地話以前鄉下都有得摸, 已經十幾廿年冇玩過, 於是今日大家興致勃勃出發喇!

嘩~~ 呢度好大好靚呀~~

同嫲嫲影張合照先!  平時爺爺嫲嫲要湊表弟昊昊, 好少機會同小慈玩

開工喇~~~  一撥開 d 沙就見到蜆, 好易搵

童工小慈都有幫手

每掘到一隻就叫爸爸, 爸爸真係好忙招呼寶貝女

我地仲撞到朋友仔熙熙添

玩完沙就玩水, 小慈好認真咁羅住個筒周圍搵蜆, 又真係俾佢搵到架!

只係掘左 1 個鐘頭, 我地呢度至少有 6 斤!

炒埋有 3 大碟, 嫲嫲又炒得好味, 真係好滿足呀

好好玩, 一定要 encore!

Day 5 返學 1.5 小時

今日星期五, 因為落大雨改由爸爸出車送小慈返學, 出門口前已經心理輔導左小慈話返學有陳老師, 有小朋友一齊玩, 媽媽同工人姐姐一陣黎接你云云.....  小慈有答 OK, 點知落車 bye bye 爸爸就開始扭計!

入到課室要換鞋, 小慈已經喊住將對鞋質番入鞋架仲扭我抱, 我話係學校唔抱就喊得仲厲害! 

有個老師埋黎同我講一陣先幫佢換鞋, 而家抱小慈入課室先問我 ok 唔 ok?  我梗 ok 啦!  頭先我見冇老師幫手我先氹小慈之麻, 如果放低佢就走得我一早走左

於是老師抱起小慈同佢講: "媽媽一陣黎接你, bye bye 媽媽先, kiss 媽媽啦!"  小慈又肯喊住 goodbye kiss 我同揮手 bye bye 喎!  於是我同工人姐姐轉身走, 10:10am 又返去學校門口等, 果然 10:18am 就開門

班主任郭老師話: "慈慈一入班房已經冇喊!  肯食早餐雞蛋三文治, 咩都肯做, 又食晒提子, 好好呀!  今日好叻呀!"  真係估唔到我地一轉背小慈已經冇喊! 

第 2 日只係喊左 5 分鐘, 有進步啦!!!   之後陳老師拖小慈出黎, 小慈見到我地好緊張指住, 但係開心樣黎既, 同尋日想喊個樣已經好唔同, 我專登用相機錄低左佢既表情  ^^

陳老師話小慈好多野講, 今朝不停講 "媽媽 kiss 羅" 應該係指同我 goodbye kiss ^8^  再讚多佢一次話佢喊左一陣就好快收聲, 好叻!  小慈自己就指住個心口張 Pooh 貼紙係咁講:

"Pooh Pooh 陳老師俾羅!" 

表現得好開心我都引以為榮呀!感謝神垂聽禱告, 希望星期一返學唔會咩都唔記得晒啦!  仲有姐姐湊返學放學希望佢攪得掂.... PRAY!

Day 4 自己上堂了

Day 4 -- 小慈今日要自己上堂冇媽媽陪了!  我好緊張, 於是拖住爸爸又拖住小慈一齊祈禱, 希望天父幫助小慈平安渡過學校適應期!  基本上我知道小慈返學係開心架, 只係要習慣沒有媽媽的日子!

出門口了, 今日帶埋工人姐姐一齊熟習返學路線, 下星期一就由姐姐湊小慈了!  上學途中我同小慈講左 3 次: "一陣間自己返學, 學校有陳老師, 有小朋友陪小慈一齊玩, 媽媽好快就會接小慈放學, ok?"  3 次小慈都答我 ok

入到學校, 小慈好叻自己係鞋架羅鞋, 我幫佢換好鞋之後同佢講: "老師帶小慈去洗手手, 一陣媽媽黎接小慈, ok?"  小慈答我 ok 但跟手走去拖住工人姐姐!  Oh~~ 佢誤會左, 於是我講得再明確 d:

"小慈同老師去洗手, 一陣媽媽同埋姐姐黎接你, ok?" 

小慈又話 ok, 仲肯俾老師同埋嬸嬸拖住入課室放低書包!  我見佢肯行即刻帶工人姐姐一齊走!  有擔心, 不過我要學識放手!  同工人姐姐一齊去街市買餸, 呢邊街市價錢平好多種類又多!  以後都係叫姐姐送完小慈返學就係呢度買餸先

今日返 9am 要返 1 個半鐘, 我地都好早就坐係學校對開既公園等, 果然 10:20am 就見到班主任老師開門, 佢話小慈放完書包洗完手就已經搵媽媽, 跟住開始大喊!!   請佢係課室坐低冷靜下, 小慈由 9am 喊到 9:20am!  足足喊左 20 分鐘......  @.@

之後收左聲就肯食通粉早餐, 仲食晒!  跟住肯跟郭老師去跳熱身舞, 之後一直都係跟住郭老師, 10am 入課室食蘋果又食晒, 係有時坐係度諗諗下掛住媽媽就眼圈紅想喊, 但同佢講媽媽一陣黎接你就 ok 有忍住唔喊!  其他同學仔都有喊架, 有 d 仲喊左半個鐘, 真係辛苦晒老師!!

老師拖小慈出黎放學了!  小慈係玻璃門見到我好激動, 好大聲叫我, 但隔住度門佢心急想我抱就扁嘴想喊!  個樣好似好可憐, 好委屈咁...  駛唔駛咁呀, 衰妹?!  我即刻抱住佢講: "媽媽黎接你羅, 係唔係呀?  唔駛喊架!"  小慈想喊又想笑個樣好攪鬼, 一輪嘴咁講野, 自己戴住頂帽同我講:

"有 alligator, 有 elephant, 陳老師幫小慈戴!" 

我話佢食晒通粉又食晒蘋果好叻喎!  小慈又好自豪, 一路行一路都好開心仲唔肯除左頂動物帽, 見到同學仔不停 say Hello, 又叫人等埋佢咪走呀咁!  有承認自己喊, 仲話陳老師幫佢抹抹抹 (指抹眼淚) 

呢個星期小慈都仲未知咩叫返學, 下星期先係戲肉呢!  返學既新鮮感過左知道返學係咩一回事之後, 一要換校服就知佢真係鍾意定唔鍾意返學!  好緊張呀~~~ 

小慈喊左 20 分鐘係有 d 心痛, 不過已經比我想像中好!  小慈加油!!

伴讀 Day 3

Day 3 返學~~  今日係 last day 陪小慈一齊上堂了!  3 日既家長陪同眨下眼就過, 我就開始熟悉返學既程序, 希望小慈都一樣適應同埋投入啦!  尋日做所有野之前我都預先講俾小慈聽, 佢有心理準備就表現得好好多!

今日都好順利, 不過都係唔肯坐地墊點名, 凌空用腳仔撩我小腿要我擘開大脾俾佢坐, 仲大聲話:

"一陣先!  No 呀!!" 

唉~~ 咩事唔肯同小朋友一齊坐呢?  不過有進步肯去廁所洗手, 但行兩步會回頭搵我仲拖實我,  慌死我走左去咁!

小慈祈禱食生果個樣超爆笑, 咪晒眼但又想偷睇!

今日又係食橙, 小慈已經連續 3 日食清晒碟生果, 連老師都讚佢叻, 又肯收拾!

希望聽日冇我幫手都 ok 啦, 擔心佢食得論盡又食得慢... 不過呢 d 都係要佢自己學習

今日安排有少少唔同, 跳完熱身舞玩大肌肉時要開家長會, 陳老師過黎幫我氹小慈等我甩身, 佢話媽媽要去廁所我就閃入另一間課室!  不過唔夠 3 分鐘已經聽到小慈大喊,  大叫 NO~~~~~  原來小慈唔俾陳老師拖又唔俾佢抱, 要自己搵媽媽, 大喊住周圍搵, 搵唔到先返去陳老師度要佢抱, 抱住就唔喊.  之後第二個小朋友喊陳老師就放低左佢, 小慈收左聲就肯俾第二個老師拖住, 不過咩都唔肯玩 @.@  到我見番佢時, 小慈即刻用手箍住我條頸黐到實!  陳老師就話: "係咪呀?  媽媽返黎接小慈喇!  媽媽去左廁所丫麻!  唔駛喊架!"  我又 repeat 一次媽媽會接小慈返屋企, 頭先去廁所咁夾晒口供

陳老師話小慈懂事, 受安慰, 肯聽人講道理, 好叻!  仲叫我唔駛擔心, 小慈會好快適應學校生活!  小朋友一開始返學就喊係好事黎架, 代表佢識表達自己情緒, 最重要就係明白道理就最易教!  陳老師仲問小慈之前係唔係返過 playgroup?  有冇離開過我?  我話有呀, 做左好多準備工夫先返學架!  之前離開我都 ok 架, 突然又倒退唔知關唔關我大肚事?  不過係屋企佢扭計我地都係唔睬佢既, 由得佢喊一陣, 佢會識返轉頭同我講: I love you!  陳老師都笑, 佢對小慈好有信心, 佢話佢頭先都冇理小慈由得佢自己搵媽媽, 搵唔到就返去搵佢!  小慈就係咁, 大喊時氹佢佢係聽唔入耳既, 唔理佢一陣反而仲快收聲!  忽視法現階段係最有效既方法!

我都好驚唔知聽日點?  我點甩身要小慈自己上堂呢?  唔係次次握佢去廁所呀麻?  陳老師就話佢地有足夠人手氹, 但咁多小朋友一齊喊係好難攪架喎!  我有咩事前工夫可以做左先呢?  陳老師就教我同小慈講....

"小慈自己返學, 媽媽一陣間黎接你返屋企, 而家有老師有小朋友陪小慈一齊玩, 好開心架!  玩一陣媽媽就會黎接你!"

希望真係 work 啦!  將一切交托俾神

伴讀 Day 2

Day 2 返學喇~~

今朝 6:30am 就醒左, 好合作換衫著波鞋, 仲揹住個書包唔肯除添!  知道我同佢返學就好興奮, 又咁岩撞到同學仔一齊搭火車返學添!

今日連我都熟習學校程序, 教小慈係學校鞋架羅鞋換, 教佢先洗手再入課室放書包就可以玩玩具, 玩左一陣老師要點名, 小慈又係唔肯去仲爬上我大脾同老師講: "一陣先~~"  我同佢講數話坐一陣就要自己坐架喇!  小慈又話 ok  佢都係慢熱, 未掌握發生咩事前係一定唔會離開我既!  唔知冇我係度佢又會點呢?

點名又識舉手應人喎, 全班 20 人點完名齊齊去洗手小慈又唔肯喇, 要我抱, 同佢講數洗完手有 banana 食先肯去, 老師想拖佢行衰妹仲 fing 開老師叫媽媽添!  惡惡呀!!  好在老師冇介意咋!   茶點前祈禱, 小慈知喇, 仲識同我講: "未食得住要等一陣先, 祈禱先有得食!"

我今日醒目呀, 有錄影段禱文遲 d 就可以係屋企又同小慈祈下等佢多 d 歸屬感麻!   香蕉小慈好鍾意食, 不過太心急連蕉皮都一齊咬埋!  又食得慢, 所有小朋友出去交晒碟小慈都仲食緊, 攪到我忍唔住餵佢飲水等佢可以快少少

大肌肉活動前跳熱身舞, 小慈今日好開心有跟住跳!  最叻係蹲低摸 pat pat 模仿得最似!  錄影佢既可愛樣 ^^  今日肯踏單車同埋自己爬上滑梯, 叻左!  但投訴小朋友推佢, 好大聲同人講:

"唔推小慈架!  小慈痛痛, 小朋友曳曳小慈唔睬!"

話到個小朋友飛起我要即刻輔導佢話個小朋友唔小心, 冇事冇事..... 先平息到小慈公主既怒氣!!  睇黎佢都係八妹仔一名, 但識表達自己既情緒係一件好事

話放學就最開心, 識得去鞋架羅自己對波鞋, 得佢一個著紅色波鞋所以好易認!  一出學校門口就要抱, 佢個樣好眼訓啊~~~  好啦, 抱一陣啦!  我淨係話係學校唔抱之麻, 所以一出門口就識要求啦, 衰妹!  不過佢都乖既, 知道我籮咁大個肚真係唔抱得佢幾耐, 同佢講抱一陣要自己行佢又 ok, 事先聲明小慈有心理準備佢係會講道理既

今日表現有進步, 我都好開心

開學日

開學了~~~ 小慈返學了~~~  小慈人生中第一日返學啊~~~

8:30am 小慈已經醒左飲完奶奶, 我仲有時間幫佢執書包影下相, 仲錄影佢第一次著校服既情形添!  小慈心情好好, 知道我會陪佢返學識講:

"爸爸返工, 媽媽唔駛!"

我都好緊張呀, 學校只係俾家長陪 3 日, 真係唔知之後會點.....  見招拆招啦!

見證歷史時刻

書包大過人仔, 不過好輕架咋

要搭一個站馬鐵返學

返到學校要換波鞋, 又要洗手, 忙碌一輪先入到課室, 好多小朋友已經返到, 由出屋企門口一直都係自己揹書包, 人仔細細揹住個書包淨係見到佢兩隻腳真係好攪笑, 好似不勝負荷好辛苦咁, 揹住大大個龜殼!!  學校書包櫃貼住小慈張相 -- 郭恩慈西瓜組 ^^ 

而家先肯除書包放係櫃入面, 之前我話幫佢都話唔駛, 仲同我講: "小慈架!"

入角聽郭老師講故事, 小慈見到成班同學除鞋坐地墊竟然唔肯去要媽媽抱!  我唔肯抱佢就移動個 pat 坐我大脾!  Oh No~~~  點解又好似返豆芽組咁呀?!  絕對有小朋友排排坐恐懼症.....

講完故事郭老師請小朋友洗手食茶點, 小慈發爛渣箍住我唔肯去!  我同佢講媽媽係學校唔抱小慈, 仲話我對手污漕要去洗佢先尾隨我去, 但行 2 步又要我抱, 堅持唔抱佢就由廁所喊住返課室 @.@ 

最後係見到碟橙先肯收聲, 話: " orange 喎~~  小慈 blue 碟碟!  小朋友 yellow"  食茶點前要祈禱, 小慈好合作咁雙手合十咪曬眼, 跟住用叉仔食晒 4 片橙就開心番, 連水都飲晒 !  食完幫手收杯碟又好合作, 不過之後就唔肯玩大肌肉活動, 只肯企係我旁邊聽住音樂跳舞, 仲笑添!  有歌聽心情就好好

放學老師派小禮物同埋貼紙, 而家先識笑!  真係唔知係小慈慢熱定係安排太快呢?  好似岩岩先適應入角聽故事就要轉地方去洗手, 坐係課室一陣又話又去大肌肉.... 希望聽日好 d 啦, 老師都話最差唔係喊, 坐大脾攬住唔放先難攪啊~~~