幼潛第 3 期第 2 堂

好攰呀!!  每次上堂都要捉雞仔看牛仔咁追住小明, 要佢坐定佢仲不停掙扎同我鬥力, 監佢坐唔夠 1 分鐘又走左去, 不停跑圈, 捐枱底, 拍壁報板.... 咁自由奔放成個坐左幾十年監終於重獲自由咁款, 都唔知係好事定壞事?!  張姨姨都有留意到小明每次返黎都好開心鍾意跑, 冇話佢, 只係成日叫住小明個名, 往好處想, 都好過弟弟坐係度喊既 @.@

遊戲一 -- 視覺追蹤刺激

先有心理準備係小朋友面前熄燈再開電筒, 將電筒光照向小朋友腳仔, 引到佢地望住之後就將光源照上牆, 再上天花板, 除左可以訓練小朋友專注力之外, 仲可以擴闊小朋友既視線, 平時佢地多數平望物件, 利用電筒光線教佢地望上下左右, 平時出街都可以教佢地望下天空既飛機雀仔, 地下既花花草草等都有同樣既效果

遊戲二 -- 拼圖

請小朋友砌有小扶手係中間既木製拼圖方便小手操控, 拼圖不宜複雜, 2-3 塊請小朋友幫 bear bear 著衫著褲形狀簡單比砌 A-Z or 1-10 效果較好

遊戲三 -- 包春卷

預備一條長大毛巾請小朋友訓係邊沿, 連手仔連腳用毛巾好似包春卷咁包住佢, 包既過程可以按摩手擘大脾及背脊肌肉, 弟弟係陌生環境唔肯訓低, 返屋企捉住佢玩先得

弟弟呢套波衫著得佢好醒目呢!

水餃團

秋記水餃端午節後應市出爐, 一班痴心粉絲聞風而至, 一開張 130 隻水餃全數填飽左 9 個大人 4 個小朋友既肚仔, 童工小慈都有幫手包餃子

慶祝開張今日仲有特別嘉賓 Smokie~~~

小慈真係好鍾意 Smokie

攬住唔放, 抱完又抱

仲問我點解屋企唔養得狗?

當左 Smokie 係海馬公園既海獅, 將屋企既膠圈套晒入佢條頸, Smokie 真係好乖, 全晚一聲都冇吠過, 俾 4 個小朋友追住又摸又摔都唔反抗, 超乖~~~

反而弟弟冇小慈咁肉緊, 只係指住 Smokie 叫 "A dog A dog", 有野食就咩都冇所謂

畫班第 4 堂

星期六, 小慈知道唔駛返學就要上畫班, 已經好接受到自己去學畫畫, 仲識催我快 d 行就黎遲到 Miss Wong 等緊!  我估令佢接受畫班既其中一個原因係冒險樂園, 仲因為冒險樂園而學識初步加減數, 而家每次一出畫班課室門口展示完佢既傑出之後就會問我攞 coins, 佢最鍾意玩冒險樂園既保齡球, 要 5 個 coins, 跟住就最鍾意玩扑傻瓜遊戲, 要 4 個 coins, 而每次我只會俾 10 個 coins 佢玩, 咁淨番 1 個 coin 點算呢?  哈~~ 小慈係會走遍全場去搵邊個遊戲要只需要 1 個 coin 而佢又想玩既 :D

Hello Kitty 已經係第 2 幅完成既作品, 背景油單一隻色去左半支蠟筆

呢隻係一隻熟口熟面既公仔, 小慈好堅持佢係一隻狗?!  我真係唔識

開心就好了!

弟弟 19 個月大 -- 14 隻牙

1 歲 7 個月喇!!  吽左好耐既上顎犬齒終於冒出頭來, 2 隻一齊出, 白色一點尖尖地成隻魔鬼仔咁, 下顎個兩隻犬齒就仲係腫腫地未出世, 加加埋埋而家已經出左 14 隻牙仔 :D

唔知係咪因為出牙, 弟弟好惡死, 一不如意就會打人, 掉玩具, 有時仲係無端端都打人!!  不過佢唔算係好大力好快好狼死個隻, 有一次佢舉起手作勢想打時俾我喝止住, 咁弟弟就改變方向轉打 cushion, 態度唔好, 所以我鬧到佢飛起, 咁佢又必然大喊, 通常數 10 聲佢就會收, 問番佢知唔知錯又話知 (連 "知道" 都識講呀!), 叫佢 say sorry 摸番錫番又會做, 好似好乖仔好後悔咁, 仲有古古惑惑學識扮野, 每逢佢攪攪震時我地 stop 佢叫 no, 弟弟會望住你, 雙眼突然閃令令好似發現左 d 咩新野咁然後講: 

"爸爸 Hello~~ 媽媽 Hello~~" 

跟住走去搵小慈咋咋帝帝分散我地既注意力, 真係 bear 左一聲   @.@

佢又試過死扭一樣野我唔想俾佢, 佢即喊, 好啦, 都要收聲先俾佢架, 點知佢唔肯仲喊得大聲 d, 於是我走入房唔睬佢, 佢又跟住黎喎, 入到房 repeat 多次又係喊咁我又走番出廳, 佢又死跟, 呢次係喊得最耐既一次, 訓練有素我冇動氣, 有時望住佢喊得好盡情, 擘到個口大到可以塞個雞包仔入去個樣我仲覺得好可愛 ^^

學野好快呀, 岩岩教佢 "bread 包包" 轉頭就學識仲活學活用, 仲有 water 水水, hot 熱熱, raining 落雨... 冇計啦, 工人姐姐教佢好多英文, 咁我就要用英文教中文為免佢混淆!

終於識講個 "要" 字, 仲係咬字好正個隻, 講完要仲搭多個 please 俾你, 幾有禮貌呀!

考佢觀察力, 屋企有塊 pooh pooh 地墊, 我用膠圈圈住 pooh pooh 頭同佢講 pooh pooh, 再問佢 where is flower?  弟弟已經好醒咁自己攞個膠圈去圈住朵花, 跟住叫佢圈咩都識搵, 弟弟肯即時模仿, 即時表演呢一點真係叻過當年小慈好多!

叫 Mickey 做 Minnie, 叫 Minnie 做 Mi Mi, 弟弟真係好爆笑, 小慈當年叫 Mickey 做 Kitty 都好攪鬼

識分 big and small, 有兩個一樣大既波, 弟弟會講 two ball ball

最鍾意車, 每次抱佢出街都不停要我望馬路既車, 識得分辨 bus, taxi, minibus, car

手眼協調都唔錯, 識得配對形狀顏色, 屋企有個 shaker 6 個不同形狀弟弟已經識自己入晒, 百法百中快而準!  玩切生果幫佢瞄準就一定切到仲好大力, 揸刀姿勢則有待改善

學識 open and close, 會自己開手合手咁玩, 有時爸爸坐梳化佢會專登走去擘大爸爸個大脾自己走入去又走出黎, 當爸爸對腳係閘咁玩 open & close

扭抱時要佢講 "媽媽抱抱弟弟", 講到變左 "媽媽蒲煲梯梯", 成隻鬼佬學廣東話咁 :DD

最鍾意食野, 5 分鐘前飲完 240 ml 奶奶, 可以再飲 BB 麥精 / 食晒成盒魚仔餅 / 半包童星點心麵 / 1 個迷你菠羅包 or 腸仔包.... 由朝食到黑但又唔見佢肥喎?!  

都有試過飲奶飲剩 50 ml 唔想飲, 工人姐姐話佢曳曳, 咁又大喊啦, 姐姐唔睬佢行開左, 弟弟就入房搵我淚眼汪汪好可憐咁, 我咪問佢做咩喊?  攬住佢時發現佢個肚仔硬硬地?!  衰仔原來收埋左支奶係件衫入面!!!  真係想笑但我又要扮嚴肅, 費事佢以為我鍾意佢咁, 於是我攞番支奶出黎問佢, 做咩唔飲奶奶呀?  弟弟答我: "No 奶奶~~~ Bye bye~~"  佢唔想食係冇人逼到佢既!

今日朝早 8:00 am 已經攞住咁大條餅條, 轉頭食晒

最令我心痛係呢個月弟弟狂俾蚊咬!  成腳都係蚊爛仲要腫晒變豬蹄, 醫生都睇左 2 次呀!!  咩蚊片蚊香蚊貼花露水都用過晒, 最有效既方法都係關窗開冷氣

我已經 2 個星期冇開過窗喇, 真係怕怕!!

百厭姐弟

小時候既我好鍾意跳阿爸阿媽張床, 彈下彈下當彈床咁跳, 超級開心!!  大個之後, 我其實係好憎彈簧床, 每次去旅行都瞓得差就係因為佢!  我非常醒瞓, 搖搖下咁真係成晚眼光光, 所以, 而家屋企既所有床都係用椰棕, 簡直係木板咁堅硬呀!  雖然係咁, 都無損小慈小明爬上我地張床玩既意慾, 明明都彈唔起架啦, 佢兩個都鍾意係大床度跳 @.@

弟弟早兩日都仲係 up up up 咁要我地幫佢爬上床, 今日已經自己黎

小明最鍾意跟風, 小慈做咩佢又跟住做咩, 兩個拉高件衫露肚臍真係笑瓜我 :DDD

弟弟扮暈中~~ 睇見佢兩個玩得咁開心都有少少想買張細彈床佢地玩 

小慈係一個好稱職既家姐, 每朝早既 morning call 聲音係:

小慈: "弟弟~~~ 擦牙喇!  快 d 黎!  你頭先飲完奶奶要擦牙架, 過黎呢度!"

弟弟: "No~~~~~~"

又有時

小慈: "紅色, red, 擺邊度呀?"

弟弟: "........"

小慈: "叻仔喎!  岩呀!  好叻呀你!

之後送小慈返學, 每日返學都會行相同既路, 我通常都會教小慈 "擔天望地" 留意身邊既人事物, 講得最多既係天氣, 其次就係觀察其他人, 如有個小朋友仲係爛瞓豬俾爸爸揹住返學... 久而久之, 小慈都會將佢既所見所聞同我分享 :)

上學途中對面馬路有幾棵唔同高度既樹, 小慈已經將佢地命名為 "爸爸樹", "媽媽樹", "小慈樹", "弟弟樹" 同埋 "姐姐樹", 人人有份永不落空

第一次命名時我已經覺得小慈好攪笑, 諗住佢隨便講下, 第二次見到, 佢又好興奮咁叫我望下我地既 "家人樹", 今日佢又記起叫我望下

小慈: "媽媽!  我地 d 家人樹呀!"  獨自陶醉ing.... 

再話: "媽媽, 肥左呀你!  睇下你開曬花咁!" :)

笑死我喇 :DDD

7 年之癢

今日係我同秋秋結婚 7 周年紀念!!  傳聞中既 7 年之癢應該係由今日開始 :D

但我同秋秋既感覺就係 "下?!  7 年架拿?  咁快既?"

講真, 咁多年黎我同秋秋既感情生活無風無浪, 平靜安穩, 所謂輕舟已過萬重山, 我地視自己為有福之人呢!  感謝神 ^^ 

今晚又同秋秋去食餐勁既, 揀左尖沙咀麗景酒店咖啡亭, 佢地做緊豪華亞拉斯加海鮮自助晚餐, 有我最鍾意既亞拉斯加蟹腳, Parma Ham 同埋即開生蠔, 勁岩我地食!  第一次黎呢間酒店, 差 d 盪失路, 酒店細細但樓底高, 都算舒服

基本上我今晚就係主攻呢張枱, d 蟹腳有 2 隻手指咁粗, 好甜好鮮味, 我覺得好食過 Conrad 同埋文華東方添, 仲有源源不絕既供應真係太好, 完全唔駛爭食

Parma Ham 略咸, 一定要夾蜜瓜哈密瓜食

食到好飽返屋企兩隻豬仔都仲未訓, 影張全家幅先

小慈小明, 多謝你地令到我同秋秋既婚姻生活更完美, 更加懂得愛與被愛 ^8^

今日好開心!  I love you 秋秋!

慶祝父親節

一年一度既父親節適逢世界盃, 我請秋秋同埋弟弟著父子裝, 平時秋秋會話我老土唔睬我, 今日破例!  有咁岩得咁橋, 今晚真係有意大利同巴西出場, 秋係巴西 die hard fans, 襯番弟弟先著作客波衫, 如果唔係佢就羅件黃色戰衣出黎架喇 :)

爸爸父親節快樂!!  兩隻衰豬非常一致地鼓埋泡腮... 想點先?!

小慈係學校整左個小擺設送俾爸爸, 仲有保溫袋, 好有心思

小慈話佢有幫手貼自己個樣上去扮兔仔, 仲有油顏色冇出界

請爸爸笑納

幼潛第 3 期第 1 堂

幸運地又報到幼兒潛能訓練課程, 呢次應該係最後一次, 因幼潛最大係俾 19 個月既 BB!  今次都係張姨姨同埋 Gi Gi 姐姐做導師, 返番去幼兒學校課室上堂環境好好多!  

響應 4 年一度既世界盃, 近來出街都會幫弟弟著波衫 :)

弟弟精力充沛自在非常咁又係課室跑圈

遊戲一 -- 數手指

用軟毛擦擦小朋友手指仔刺激感官發展, 教埋數數唱: 

1 隻 2 隻 3 隻小手指, 4 隻 5 隻 6 隻小手指, 7 隻 8 隻 9 隻小手指, 我有 10 隻小手指

遊戲二 -- 嗅覺刺激

俾小朋友觸摸實物及聞 橙, 檸檬, 香蕉, 餅乾, 朱古力奶, 咖啡等刺激嗅覺!  弟弟咩都肯聞, 但香蕉就聞一下即刻擰歪面, 平時已經唔鍾意食蕉, 都唔知佢唔鍾意香蕉 d 咩呢?  不過橙同檸檬就聞到成個鼻同個嘴都黐住黎索, 好好笑!  之後就點氹都唔肯放手, 死攬住個檸檬唔肯 pass 俾其他小朋友 @.@

遊戲三 -- 推呀推呀推個大波波

估唔到張姨姨一攞個波出黎, 弟弟唔理三七廿一即刻黐埋個波度仲遞隻腳上去係咁叫:

 "Up~~ Up~~ 爬~~ 爬~~ 抱抱~~" 

佢所有識得既單字都講晒非常心急想爬上個波度, 張姨姨話佢係挑戰型既小朋友, 好大膽, 咩都想試, 有好奇心

玩到唔想落番黎

坐大波波可以發展平衡力, 適應重心轉移, 刺激前庭發展

大成功!!

今日係小慈第三堂畫班, 為左俾佢認真看待呢個畫班, 我又出招買左個 Elmo 袋俾小慈裝住自己既畫簿, 畫筆, 水樽, 外套, 仲要佢自己拎住!  小慈今日狀態好好, 一早已經話自己好勇敢唔駛媽媽陪, 見到個 Elmo 袋雙倍開心  :)

去到見到 Miss Wong, 非常忙碌咁為 Miss Wong 展示佢袋入面既鉛筆擦膠顏色筆, 我同佢 bye bye 都唔得閒理我, 於是, 我就關門行出課室, 真係 1 分鐘都唔駛我陪呀 ^^

都怕佢反口, 於是我 15 分鐘後又返去裝下, 見到課室門仲係關埋應該冇事, 應承左小慈我會係課室出面等佢, 於是落堂前 5 分鐘我已經返去等, 今次開左門喎!  小慈坐個個位見唔到我但我見到佢, 佢表現得非常自在, 笑得好靚表情多多, 同攪笑兩姊妹仲有講有笑添!  真係太好喇~~~~  

今次轉左俾小慈用細蠟筆油顏色即刻冇出界靚左好多, 叻女!!

Well Done 小慈!!!

Children Learn What They Live

第一次睇呢一篇文章, 係張貼係一間幼稚園既整幅外牆上, 每一隻字都係一張 A4 紙, 當時年青既我睇到好震撼好感動, 即刻用紙筆企係人地學校門口一字一句咁抄低!!

第二次睇呢篇文章, 係我讀 QKT 時, 導師提醒我要切記既重點, 要小心自己既一言一行, 因為生命影響生命, 教育要有愛!

今日當我清理混亂既書桌時再見到佢, 已經成為兩子之母既我, 又再一次俾佢深深既感動及提醒! 

Children Learn What They Live  吉諾特 1965 年

在批評中長大的孩子, 學會譴責

If a child lives with criticism, he learns to condemn

在敵對中長大的孩子, 常懷敵意

If a child lives with hostility, he learns to fight

在嘲笑中長大的孩子, 畏首畏尾

If a child lives with ridicule, he learns to be shy

在羞辱中長大的孩子, 總覺有罪

If a child lives with shame, he learns to feel guilty

在忍耐中長大的孩子, 富有耐心

If a child lives with tolerance, he learns to be patient

在鼓勵中長大的孩子, 滿懷信心

If a child lives with encouragement, he learns confidence

在讚美中長大的孩子, 懂得感激

If a child lives with praise, he learns to appreciate

在正直中長大的孩子, 有正義感

If a child lives with fairness, he learns justice

在安全中長大的孩子, 有信賴感

If a child lives with security, he learns to have faith

在讚許中長大的孩子, 懂得自愛

If a child lives with approval, he learns to like himself

在接納和友誼中長大的孩子, 尋得了世界的愛

If a child lives with acceptance and friendship, he learns to find love in the world!

在家的一天

尋晚睇巴西對北韓, 真係不復當年勇, 捱一晚夜我地兩老頭又痛眼又腫, 工人姐姐仲要今日放假  @.@  天氣報告又話全日都 over 30 度, 本來想去沙灘但又間唔中落雨, 都係算罷啦, 今日休市在家休息!  不過係屋企都好忙碌架, 首先要用珍寶珠塞住弟弟把口....

弟弟唔會食晒, 我地亦都唔會俾, 通常 lam 一陣, 俾件玩具分散佢注意就唔記得支糖

跟住同兩個小寶貝剪頭髮, 你睇小慈幾乖幫手揸兜, 佢千叮萬囑叫我唔好剪佢後面 d 頭髮 :D

弟弟個新 look 係唔係好型仔呢?

仲有練琴!  小慈已經彈到 d r m, m f s, s f m, m r d

呢張相佢兩個個背影好可愛 ^^

玩下跳下笑下又過一日

唔識死既弟弟將隻腳插左去椅背, 真係咁都俾佢諗到

何其大膽!!

奇蹟~~

 戰戰兢兢咁請小慈換衫上第 2 堂畫班, 又係個三幅被.... 

小慈: "我想同媽媽一齊上畫班!" 

我 (堅定不移地): "媽媽咪應承左你坐遠少少囉!?  拿拿拿~~ 唔好喊呀!  你要學習勇敢 d 架!"

小慈忍住眼淚: "我想玩保齡球呀!"

我: "得!  上完畫班就去玩保齡球!"

入到課室, 攪笑兩姐妹已經到左, Miss Wong 未到, 我先安頓小慈, 今次帶左支粗鉛筆同埋新擦膠俾小慈起稿用, 小慈似乎好滿意, 跟住我就坐另一張枱, 今次小慈背對住我, 突然同我講....

小慈: "媽媽, 我今日好勇敢冇喊呀!"

我: "叻叻!!  我既小慈最乖, 俾 2 隻手指公你!"   (暗自歡喜)

Miss Wong 黎到吩咐小慈油藍天白雲, 係藍天白雲, 所以個天空係藍色, d 雲係唔駛油既, 跟住草地就要好似寫好多個 1 字咁油, d 草先會生動!  小慈埋頭苦幹, 見佢真係好努力!  油咁大幅畫怕且我都會手軟, 小慈又突然擰轉頭同我講

"得喇, 媽媽!  你係課室出面等我啦!"

我以為我聽錯!!  望下個鐘仲有 15 分鐘落堂, 我即刻把握呢個機會同小慈 confirm 多次 " 媽媽出去等你" 即刻 piss~~~~~~~  

出到門口我好似打劫完銀行咁, 個心跳得幾快呀 ^^

呢個世界真係有奇蹟架!  只要誠心禱告, 神真係會應許, 多謝神 ^8^

你睇小慈笑到咁!  錫晒你呀, 乖女!!  你既表現真係令到媽媽好驚喜, 連 Miss Wong 都估唔到, 所以獎左 2 個貼紙俾你 ^8^

小慈已經起稿, 下堂幫 Hello Kitty 上色

加油呀, 小慈!  你得既!

夜訪黃俊琛

7 小福全部都做晒哥哥姐姐 ^^  

今晚仲要好人齊, 總共有 6 個小朋友一齊探熙熙細佬鬼仔黃俊琛, 琛仔鼻高高, 眼皮深深, 真係好靚仔呀 !

熙熙媽媽仲要預備左好多好美味既食物招呼我地

小朋友們要食晒飯先可以玩熙熙既玩具

實在太心急想玩, 所以個個都食得好少

不過薯片就食唔停

3 位家姐

大合照

多謝琛仔你俾機會我地借 d 椅又上你屋企攪攪震, 祝你快高長大, 身體健康, 孝順父母快 d 戒夜奶, 同熙熙哥哥相親相愛