今朝送小慈返學, 佢又係問我今日駛唔駛返工? 我話梗係要啦, 咁小慈已經唔開心咁話點解我成日都唔放假, 好想我放假黎接佢放學, 講完已經眼圈紅紅, 我話媽媽送你返學已經好開心架勒喎, 放學又有工人姐姐同埋弟弟, 點知小慈小姐都係唔滿意, 悶悶不樂, 幫佢換鞋仔又話對鞋細唔想著, 一陣又話自己唔舒服要戴口罩, 心情惡劣咁款, 可能都關星期一事 @.@ 果然 bye bye 佢就流住眼淚咁行入班房, 我已經扮睇唔到冇理到佢, 行出學校門口就聽到佢大喊既聲音, 好無奈, 事隔一年又復發, 又係 bye bye 媽媽黎喊.....
困擾左我一日! 唔得, 要鬧呀! 放工返去小慈又好開心咁依嘩鬼叫, 我問小慈今日返學有冇開心野? 佢話今日學校有火警演習, 要一個跟一個, 望住前面個小朋友個頭黎行直線, 慢慢行出公園唔好跑, 等老師救完火就可以入番課室 :DDD 再問佢學校邊度起火呀? 小慈不慌不忙咁答我:
"係門口個冷氣機著火, 所以我地要係後面門個度走!"
厲害! 厲害! 真係識 d 野架喎, 又考下佢除左老師, 仲有邊個會幫手救火呀? 佢識答我:
"係消防員, 不過我地係火警演習係假架! 消防員唔會黎既!"
好攪笑呀小慈! 差 d 就俾佢分左心! 唔得, 要鬧!
我問佢: "返學係唔係好開心呀?"
小慈: "開心~~"
我: "咁點解你返學會喊既? 媽媽今朝係學校門口聽到小慈喊到好大聲喎!"
小慈有 d 愕然我知道佢喊
小慈: "我喊左少少之麻....."
我: "咩事要喊呀?"
小慈: "我好掛住媽媽攞!"
我: "你知唔知媽媽聽到你喊, 媽媽會開心定唔開心呀?"
小慈: "唔開心..."
我: "係攞! 媽媽會心痛添架! 返學咁開心唔要喊架! 你大個女, 你應承左媽媽做個開心小朋友架喎!"
小慈: "知道勒媽媽, 我大個女讀大學就唔會喊架勒!" @.@ :DDDDDD
真係俾佢激到反白眼又嬲佢唔落, 反應咁快都得既?! 教過佢一次幼稚園讀完就上小學, 中學跟住大學, 好記性既衰妹又活學活用!!
成日都話對鞋仔細, 今晚就 dick 起心肝同佢度下 size
頭 49 cm
肚腩 19.5"
手臂 6.5"
大脾 11"
身長 99.5cm
重 13.5kg = 29.7 磅
腳仔 16.5 cm
腳仔真係大左, 1 年長 1 cm, 不過對鞋都仲著得落只係冇一隻手指位剩, just fit only
既然小慈小姐要求買新鞋仔就買啦, 攪笑地度埋弟弟隻腳仔, 弟弟都已經 14cm, 差少少就追到小慈家姐 :DD
弟弟今日 17 個月大, 攪左成個月終於都回復正常唔再罷奶, 4 隻大牙 2 隻門牙都谷晒出黎, total 12 隻牙, 飲左半支牙仔水真係好有幫助!
繼識講 "小慈冇" 之後, 呢 2 日我問緊小慈知唔知道時, 弟弟係旁邊搭訕答 "知~~~" 真係俾佢笑死!!
識講 攞, 摸, 擺, 執, 錫, ball, moon, sun, teeth, sit, a key, a book
a bird (讀音變左 a beak)
Hello (讀左丫 low)
次子 (跟小慈睇得太多龍貓)
Oh Man & backpack (睇得太多 Dora)
依~~~~~ (自己都嫌棄自己 d 口水)
喔噢~~ (跌左野落地)
I like I like (想要一樣野時就會舉手口講 I like)
仲有識話自己曳曳!
又識得撩人玩, 當我地坐係椅子時, 弟弟會穿過張椅子吱我地背脊配埋音 "吱吱吱", 如果我地俾反應佢, 怕痕咁左郁右郁避開佢既話, 弟弟就會越加興奮起勢咁吱!! 近來仲識做 funny face, 自己拉住自己個面珠 dun 再 "lur" 咁一聲, 未學識我地咁反白眼同埋伸利, 但佢個 funny face 樣已經好攪笑!
脾氣都係大, 之前見到小慈坐低矮過佢, 細粒過佢, 會無端端走去拍小慈個頭! 近來我地話佢 No 同曳曳時, 會走埋黎雙手打我地 @.@ 不過佢知衰喎, 我地都未開聲鬧佢佢已經自己講 "摸~~~~" 咁摸番我地又自動啜一聲咁錫番我地, 即是一時衝動控制唔到自己脾氣姐, 不過我地都會哦佢話佢打人唔岩架, 曳曳呀, 下次唔好呀.... 佢都聽既, 弟弟都算係一個斯文既男仔
天氣真係好好, 小慈發現左一個新公園, 話有一個好大既車呔千秋好好玩, 於是完左幼潛就帶我同弟弟去玩, 好耐都冇見過呢款車呔千秋, 我細個好鍾意玩架
遊戲一 -- 辨認自己物件
張姨姨請小朋友羅出一樣屬於自己而佢又知道係自己既野, 放入籃, 我真係擘大個口得個 loan 左 5 秒, 都唔知小明會知道咩野係屬於佢自己既?! 小慈就話掉個枕頭出去, 小明真係咩都冇所謂架喎, 可能掉塊餅出去佢會搶都未定 :p
見其他家長掉紗巾 / 換片袋 / 水樽 / 衫仔... 無計可施唯有即刻除左小明一隻襪掉出去啦, 小明仲以為可以大解放連另一隻襪都想除埋, 俾我切切咁制止 @.@
今堂有 6 個小朋友返學, 於是圍圈唱一首歌, 請小朋友搵番自己個籃再攞番屬於自己既野, 果然小明係唔知隻襪係自己既, 好在都知咩野叫 "襪襪" 都識羅番俾我!! 16-18 個月既 BB 開始要認識自己, 知道眼耳口鼻既位置, 屬於自己既物品等, 多 d 同佢講
"呢個係小明既奶樽"
"呢件係小明既衫衫" 以發展 "我" 既概念
遊戲二 -- 有 / 冇
話說有日弟弟瞓醒晏覺, 個樣矇矇地咁係個廳行來行去唔知搵咩, 我就食緊 lunch, 弟弟無端端望住我同我講: "小慈冇?" 仲要攤開手板做埋動作! 點解佢會識叫 "小慈" 架?! 小慈去到歲半都仲係叫自己做 "Kitty", 弟弟已經字正腔圓咁講到個 "慈" 字, 個小字就仲係歪歪地似個 "C" 音, 但已經好叻叻!!! 我同弟弟講小慈瞓覺, 佢手指住房門想衝入去, 即刻叫停好在佢都聽, 兩姐弟真係好黐纏邊度都有影皆雙, 見弟弟瞓醒即刻搵小慈就知啦! 雖然都會爭玩具嘈之巴閉, 但都係一齊玩, 你又攬我我又錫你咁, 最鍾意睇佢兩個一齊食野, 你餵我一啖我餵你一啖, 好眼冤架 :)
所以今日幼潛話用毛巾仔包住車仔請小朋友當禮物咁拆開 (引起動機), 再用毛巾仔蓋住車仔問小朋友 "有冇車車呀? 車車呢?" 訓練佢地講 "冇" or 做動作示意冇, 小明連 "小慈冇" 都識講所以冇問題 :DD
延伸活動: 每個小朋友俾隻吉碟佢問佢有冇餅餅? 要佢講 "冇" 先俾餅佢, 仲要教佢講 "謝謝" + 點頭 (真係好似訓練緊狗仔呀!) :D 弟弟既模仿力係我最欣賞佢既地方, 佢係會眼定定望實你, 你講一句佢又跟口水尾咁, 學得超快所以冇問題!
遊戲三 -- 大肌肉訓練之蹲下
一邊放波仔玩具係地下, 請小朋友蹲下去執起再放去另一邊既籃內, 強壯大脾肌肉, 用波仔同埋玩具真係太吸引喇, 個個小朋友攞起件玩具淨係掛住玩, 要家長三催四請先依依不捨放入指定位置
今日已經係第 3 堂上 Yamaha Junior Music Course (JMC), 估唔到要上到第 3 堂小慈先 warm up 到 @.@
第 1 堂, 可能我俾唔夠心理準備佢, 放學返黎好趕咁食完飯沖完涼就俾我捉左出去, 未知發生咩事, 去到班房眼紅紅同我講唔想上堂, 聽到老師話要同其他小朋友出去唱歌仲即刻流眼淚! 就算我陪住佢都金口難開, 好唔開心咁款! 一直到差不多落堂, 有首歌話坐火箭上太空, 可能小慈覺得好聽又有動作同我一齊做先笑下咋! 真係好唔明白佢, 都係音樂班之麻, 類似既班房, 類似既課程, 冇理由會唔鍾意架? 成日話想同媽媽一齊, 我咪大大隻坐係佢隔離囉?! 不過好在佢冇話以後唔上
第 2 堂, 我朝早起身已經預告俾小慈聽今日放學要上 JMC, 個衰妹係可以即刻眼圈紅架噃!! 問佢點解唔開心佢淨係答 "我想同媽媽一齊!" 我話我已經陪住你啦, 佢就答要我同佢一齊出去唱歌, 我話其他小朋友都係自己出去, 媽媽係個位度等你, 佢都係答 "我唔想"! 於是我唔再講野, 點知上堂時我攞本音樂書出黎, 打開第一頁佢已經哼 "La La La Sing it now~~" 點解佢識唱既? 黑口黑面咁上堂原來都有聽噃!? 之後小慈上堂既表現有少少進步, 至少每首歌都有跟住唱, 係出去同老師唱歌都要我陪, 我都係遠遠咁係旁邊陪佢少少
為左提升佢對音樂班既歸屬感都要諗諗計, 於是我地成日播 JMC 隻 CD 佢聽, 星期六日又俾 JMC 隻 DVD 佢睇, 又真係幾好睇, 連弟弟都識 Da Da "Do Do Do" 真係笑死! 聽左幾日真係有 D 用, 小慈竟然點歌!!! 呢個就係我唔明白個衰妹既地方, 明明咁鍾意音樂, 咁熱愛唱歌, 點解咁怕人事物既轉變? 適應力真係真係咁差?? 咁冇安全感??
今日上第 3 堂, 放工返屋企湊佢出去, 估唔到小慈咁同我講:
"媽媽, 我今日會同小朋友出去唱歌架, 你係個位度等我喎, 我會好勇敢架!"
果然講得出做得到, 今堂回復番佢應有既表現, 好開心咁由頭唱到尾, 咁先係架麻!!! 你明明做得到, 之前係班上面 Solo 都係咁, 點會上堂上到喊先得架?! 真係要同佢練下膽, 谷佢上多 d 興趣班, 見多 D 人先!!
小慈家姐 4 歲生日, 帶 1 歲 4 個月既弟弟一齊去沙灘玩沙, 落車見到個海灘好興奮, 弟弟手指指大聲呼叫, 點知一放佢係沙度行就即刻面容扭曲!!! 只係肯企係蓆上面, 手指指嘴蔑蔑
要抱起佢先可以離開沙灘, 點知行唔夠 2 步弟弟就掙扎要落地, 仲出埋英文講 "walk~~ walk~~" 示意要自己落地行, 真係笑爆嘴 :DDDD
好啦, 呢個夏天多 d 帶你去沙灘蒲啦 ^^
小慈今日 4 歲, 祝我既乖女生日快樂, 健健康康, 笑口常開, 同弟弟相親相愛 ^^
可惜生日前病左 2 日, 星期日食晚餐時已經話個肚好痛好唔舒服, 食得好少連奶都冇飲, 半夜就嘔勒, 好可憐呀! 3:00 am 嘔一次, 4:00 am 又嘔一次, 嘔到小慈話:
"點解咁耐都未天光? 我好辛苦想快 d 睇醫生呀....."
真係聞者心酸, 到星期一朝早見到佢個樣冇晒心機同我講
"媽媽我好辛苦, 今日唔可以返學喇...."
未試過咁架佢! 就算幾唔舒服都只會要求戴口罩, 未試過話唔返學架! 終於有得睇醫生就話佢腸胃有事, "估" 佢係感冒菌入腸, 遲 d 會有感冒病徵如咳 / 乞嚏 / 鼻水, 如果係腸胃炎晏 d 應該會屙爛屎... 下? 連醫生都靠估!?! 開 d 好難食既消炎藥, 仲吩咐沖淡奶俾小慈飲, 係咁多, 都係要靠自己打仗
今日正日 4 歲生日, 見小慈仲係好虛弱就係屋企休息多一日冇返學, 不過我要返工, 小慈好唔開心, 佢同爸爸講:
"爸爸點解你唔搵多 d 錢既? 你搵多 d 錢媽媽就可以去買野..."
(佢既 concept 係返工賺錢黎買野, 爸爸賺多 d 錢媽媽就可以唔駛返工係屋企咁既意思!) 聽到爸爸好無奈 @.@ 本來決定帶小慈去沙灘玩沙慶祝, 一度因為大霧有微雨想取消改去溜冰, 點知溜冰場竟然因為有比賽活動而關閉, 即是天意要去沙灘啦, 好, 出發!! 去到天氣又唔太差, 大霧只係令到 d 沙冇咁乾爽, 不過都玩得好開心!
小慈 4 歲喇~~
Happy Happy Birthday to Grace!!!!
遊戲一 -- 唱兒歌 + 做動作
歌詞: 拍手鞠躬~~ 拍手鞠躬~~ 踏踏, 轉呀轉呀轉~~
弟弟淨係唔識鞠躬咋, 仲誤會以為我地要佢打關斗, 笑死!
遊戲二 -- 穿飲管手飾
用絨線將剪開既粗飲管穿入, 弟弟竟然坐足全程穿晒咁多粒飲管
遊戲三 -- '不'通粉
用摌將硬通粉 '不' 去指定位置, 訓練小朋友旋轉手腕
好玩!
鍾意女既我一直都對 "仔" 有 d 保留, 怕仔冇女咁窩心貼心錫阿媽, 又怕佢地粗粗魯魯跳上跳落, 冇時停仲要成日幫佢放電否則失控云云, 當然我知道有 d 例外既, 不過乖既仔又會俾人話裙腳, 女人型, 門口狗... 我個仔已經 1 歲 4 個月大, 係佢開始令到我對 "仔" 有 d 改觀 :)
無錯, 弟弟都係鍾意行來行去爬高爬低冇時停, 又真係好粗魯成日整爛整跌晒 d 玩具, 但佢霖死我既就係佢比小慈更加錫我嗲我 ^8^
一早就會 "媽媽~~ 媽媽~~" 咁嗲聲嗲氣叫我又錫我
由我起身擦牙開始係圍住係我腳邊團團轉 (果然係裙腳)
見我換衫返工就扁嘴跺腳, 工人姐姐要抱佢就將個頭攝係我兩隻腳中間扮鴕鳥
如果爸爸返屋企先而唔見我, 弟弟係會推開爸爸, 自己出門口裝下睇下我有冇係度門後面, 如果門後面冇, 弟弟係會全屋作地毯式搜索, 睇下爸爸有冇收埋我咁既 :DDD
我去廁所就會係門口 knock knock, 又係咁拍門拍到我出黎為止!!
鍾意食野既佢食咩都會咬一啖再分俾我食, 其他人想食係要我叫佢先會俾 ^^
雙手軟綿綿滑嘟嘟, 真係好似化骨綿掌咁, 又成日笑到個樣真係太陽都會溶, 又識聞歌起舞
每次同佢四目交投就會嘟起個嘴黎錫我~~~~
係屋企如果我坐係地下, 佢就會坐上我大脾, 我坐梳化佢就會坐係我隔離, 而家連我食飯都拉衫扯褲咁要我抱住佢係我大脾同我一齊食, 仲好自在咁攞匙羹自己食飯, 無時無刻都要跟住我, 個種感覺真係比痴媽 B 既小慈強烈好多!!
仔係要放電, 今日山長水遠帶小明去九龍仔公園玩, 我做女時好鍾意黎呢個公園玩同埋游水, 可惜今時唔同往日, 個公園走晒樣殘殘舊舊日久失修咁款, 不過, 都無損弟弟既雅慶係公園拔足狂奔
媽媽愛你~~~ 仔 ^8^
