小慈今日 4 歲, 祝我既乖女生日快樂, 健健康康, 笑口常開, 同弟弟相親相愛 ^^
可惜生日前病左 2 日, 星期日食晚餐時已經話個肚好痛好唔舒服, 食得好少連奶都冇飲, 半夜就嘔勒, 好可憐呀! 3:00 am 嘔一次, 4:00 am 又嘔一次, 嘔到小慈話:
"點解咁耐都未天光? 我好辛苦想快 d 睇醫生呀....."
真係聞者心酸, 到星期一朝早見到佢個樣冇晒心機同我講
"媽媽我好辛苦, 今日唔可以返學喇...."
未試過咁架佢! 就算幾唔舒服都只會要求戴口罩, 未試過話唔返學架! 終於有得睇醫生就話佢腸胃有事, "估" 佢係感冒菌入腸, 遲 d 會有感冒病徵如咳 / 乞嚏 / 鼻水, 如果係腸胃炎晏 d 應該會屙爛屎... 下? 連醫生都靠估!?! 開 d 好難食既消炎藥, 仲吩咐沖淡奶俾小慈飲, 係咁多, 都係要靠自己打仗
今日正日 4 歲生日, 見小慈仲係好虛弱就係屋企休息多一日冇返學, 不過我要返工, 小慈好唔開心, 佢同爸爸講:
"爸爸點解你唔搵多 d 錢既? 你搵多 d 錢媽媽就可以去買野..."
(佢既 concept 係返工賺錢黎買野, 爸爸賺多 d 錢媽媽就可以唔駛返工係屋企咁既意思!) 聽到爸爸好無奈 @.@ 本來決定帶小慈去沙灘玩沙慶祝, 一度因為大霧有微雨想取消改去溜冰, 點知溜冰場竟然因為有比賽活動而關閉, 即是天意要去沙灘啦, 好, 出發!! 去到天氣又唔太差, 大霧只係令到 d 沙冇咁乾爽, 不過都玩得好開心!
小慈 4 歲喇~~
最鍾意玩呢支水槍
大踏步神情確威武! 成個沙灘冇人真係爽 ^^
壽星女話要食壽司, 一坐低又斟豉油又落綠茶粉忙過不停!
最鍾意食三文魚子同蟹子, 話係口入面爆炸好好玩!
你睇佢幾狼吞虎嚥 :)
返屋企切生日蛋糕, 小慈竟然識改歌詞唱 "Happy Birthday to ME"
呢張相影得小慈好靚女, 笑容甜美 ^^ 唱生日歌, 去片~~
小慈真係好開心, 蠟燭都吹左 2 次
專登點咁多支蠟燭俾佢都一口氣吹晒
你睇下弟弟既眼神, 估佢想做咩?
冇錯! 弟弟係偷食左粒士多啤梨
爸爸媽媽錫晒你呀, 小慈乖囡~~
Happy Happy Birthday to Grace!!!!
沒有留言:
張貼留言